İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 329 Hüküm no: 283 Orijinal metin no: [105-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sabuncu esnafı temsilcilerinin meslek ilkelerine uymayan meslektaşları Praşkova ile Yuvan’ın ihracı talebinde bulundukları Esnâfdan ihrâc Ma‘rûz Derûn-ı arzuhâlde isimleri mezkûr sabuncu esnâfının hâlâ Kethudâsı es-Seyyid Ali Ağa ve esnâf-ı mezkûreden es-Seyyid İsmail Ağa ve Mehmed Ağa nâm kimesneler ile Lefter ve Merkor ve Musayil ve Yuvan ve Nikola ve Yuvakim ve Protomos ve Elaniye ve Anaştaş ve ev Tanaş ve diğer Lefter ve Yordan ve âhar Lefter ve diğer Nikola ve Bodos ve diğer Bodos ve Marat ve Gavril nâm zimmîlerden her biri meclis-i şer‘-i münîrde esnâf-ı mezkûreden arzuhâl sâhibi Praşkova v. Praşkova ve diğer Yuvan v. Lefter nâm zimmîler muvâcehelerinde mersûmân Praşkova ve diğer Yuvan zimmîler esnâfımızdan olup lâkin şurût-ı nizâmımızdan olup lâkin şurût-ı nizâmımızdan bir şarta itâ‘at ve ri‘âyet etmeyip dâimen ve müstemirren mugāyiri harekete cesâret eylediklerinden bi’d-defa‘ât kendilere nush u pend ve tenbîh olundukda ısgā etmeyip ısrâr etmeleriyle mersûmânın vech-i meşrûh üzere ictisâr eyledikleri harekât-ı nâ-bercâlarına tahammül ve tâkatımız kalmamışdır deyü iştikâ ve kisb-i âhara şurû‘ birle esnâfdan ihrâc olunmalarını iltimâs ve istid‘â eyledikleri İstanbul Mahkemesi’nden huzûr-ı âlîlerine i‘lâm olundu. Fî 6 R sene 1258