İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 330 Hüküm no: 284 Orijinal metin no: [105-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tablakâr Süleyman’ın Papazoğlu Dino’dan alacaklı olduğu yolundaki iddiasını ispatlayamadığı Tabla nizâ‘ı Ma‘rûz Francalacı tablakârlarından sâhib-i arzuhâl Kalkandelenli Süleyman b. Hasan nâm kimesne bi’l-ma‘iyye rü’yete memûr evkāf müfettişi izzetlü fazîletlü es-Seyyid Mehmed Âsaf Efendi hâzır olduğu hâlde evvelen şifâhen sâdır olan fermân-ı âlîlerine imtisâlen bi’d-defa‘ât Çarşamba günleri huzûr-ı hazret-i Fetvâ-penâhî’de ve ba‘dehû müfettiş-i mûmâ-ileyh tarafından meb‘ûs Mehmed İzzet Efendi hâzır olduğu hâlde bâb-ı cenâb-ı müşârün-ileyhde İstanbul kādıları dâ‘îlerine tahsî buyurulan dâirede ma‘kūd meclis-i şer‘-i münîrde bâ-irâde-i seniyye evkāf-ı celîle tarafından idâre olunan suyolu kurâsından Küçükköy’de francalacı olan derûn-ı arzuhâlde mastûrü’l-ism Kalkandelenli Papasoğlu Dino v. İstefan nâm zimmî muvâcehesinde mersûm Dino zimmî sene-i sâbıkā Şevvâli’l-mükerreminin beşinci günü ben İstanbul’da Tahtakale civârında vâki‘ Kādı Hanı önünde kendi tablama vaz‘ ve ibâdullâha bey‘ etmek için karye-i mezkûrede vâki‘ dükkânından beher yevm yüzer guruşluk francala ekmeği bana irsâl edecek oldukda ben dahi bey‘ eylediğim francala semeninden zimmetime nesne ta‘alluk eder ise âhara bey‘le semeninden istifâ-yı deyn etmek üzere târih-i merkūmda hân-ı mezkûr kurbünde vâki‘ Sâ‘atcılar Hanı’nın üst katında Salih Efendi nâm kimesnenin odası önünde mâlımdan beheri altmış beşer guruşdan cem‘an yedi bin sekiz yüz guruşluk kıymetli yüz yirmi aded kebîr Tunus fesini mersûm Dino zimmîye def‘ ü teslîm eylediğimde ol dahi ber-vech-i muharrer yedimden ahz u kabz ve zikr olunan fesleri minvâl-i muharrer üzere kabzını mübeyyin ve târih-i merkūm ile müverrah yedime işbu senedi dahi vermiş ise de ancak iki gün doksan guruşluk francala ekmeği bana irsâl ben dahi vech-i muharrer üzere bey‘ edip mâ‘adâ nesne irsâl etmediğinden mâ‘adâ zikr olunan fesler târih-i merkūmdan berü yedinde kalmağla mersûm Dino zimmîden hâlâ taleb ederim deyü da‘vâ ettikde ol dahi cevâbında ben müdde‘î-i mezbûrdan aslâ nesne almadım ve sened-i mezkûru dahi vermedim deyip müdde‘î-i mezbûr Süleyman’ın ber-minvâl-i muharrer müdde‘âsını inkâr etmekle müdde‘î-i mezbûr da‘vâ-yı mezkûresini isbât için işbu sene-i mübâreke Saferi’l-hayrı’nın on birinci gününden berü şâhide havâle olunup müddet-i mehl-i şer‘î kirâren ve mirâren mürûr edip bu vechile isbâta kādir olmamağla talebiyle mersûm Dino zimmîye bi’l-muvâcehe ber-nehc-i şer‘î yemîn verilmeğin mûcebince müdde‘î-i mezbûr Süleyman da‘vâ-yı mezkûresiyle mersûm Dino zimmîye bilâ-beyyine mu‘ârazadan men‘ olunduğu huzûr-ı [âlîlerine i‘lâm olundu] Fî 25 R sene [1]258