İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 331 Hüküm no: 285 Orijinal metin no: [105-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Ağa’nın Mustafa Efendi’ye borcunu ödemesi 20530 [guru]ş hüküm [Ma‘rûz] Bâ‘isü’l-i‘lâm Galatalı Hamamcı el-Hâc Mustafa Efendi b. Mustafa meclis-i şer‘-i münîrde tüccârdan Çorumlu es-Seyyid Ahmed Ağa b. el-Hâc Ahmed muvâcehesinde sene-i sâbıkā yani bin iki yüz elli yedi senesi şehri Rebî‘ülevvelinin yirmi birinci günü ben yirmi beş bin guruş ve mezbûr es-Seyyid Ahmed Ağa dahi kezâlik yirmi beş bin guruş ki cem‘an mâlımızdan elli bin guruş ifrâz ve birbirine halt edip fâide beynimizde beraber iktisâm olunmak üzere vücûh-ı ticâretde akd-i şirket-i inân edip mezbûr es-Seyyid Ahmed Ağa kabzımâl olmağla meblağ-ı merkūmu sene-i mezkûre Zilhiccetü’ş-şerîfesi gurresine değin a‘mâl edip ba‘dehû târih-i merkūmda fesh-i akd-i şirket birle hesâbını İstanbul’da Mısır çarşısında sehv ü galatdan ârî yegân yegân hesâb-ı sahîh ve mu‘teber tüccâr ma‘rifetleriyle rü’yet eylediğimizde lede’l-muhâsebe benim re’s-i mâl-ı mezkûrum olup mezbûr es-Seyyid Ahmed Ağa zimmetinde yirmi beş bin guruş alacağım zuhûr ettikde mezbûr es-Seyyid Ahmed Ağa hesâb-ı mezkûr hesâb-ı sahîh ile olup meblağ-ı merkūm yirmi beş bin guruş cihet-i mezkûreden zimmetinde bana deyni olduğunu ikrâr-ı kat‘î ile ikrâr dahi ettiğinden sonra dört bin dört yüz yetmiş guruşunu mâlından ol-mikdâr meblağa iştirâ ve kabz eylediğim ma‘lûmü’l-aded gâvsâle semeninden istifâ etmemle mâ‘adâ yirmi bin beş yüz otuz guruşu zimmetinde bâkī kalıp ve meblağ-ı bâkī-i merkūm zimmetinde bana deyni olduğunu nâtık yedime işbu bir kıt‘a pusulayı dahi vermekle meblağ-ı bâkī-i merkūm yirmi bin beş yüz otuz guruşu mezbûr es-Seyyid Ahmed Ağa’dan hâlâ taleb ederim deyü da‘vâ ettikde ol dahi cevâbında kaziyye minvâl-i meşrûh üzere olduğunu bi-tamamihâ tâyi‘an ve kat‘iyyen ikrâr ü i‘tirâf [106] edip lâkin mukaddem rü’yet olunan hesâb-ı merkūmda sehv ü > galat olmağla tekrar rü’yet-i muhâsebe olunmak murâdımdır deyü takrîr-i meşrûhu üzere hesâb-ı mezkûru sehv ü galatdan ârî yegân yegân hesâb-ı sahîh ile rü’yet <> eylediklerini mukırr iken mezbûr el-Hâc Mustafa Efendi’nin inkârına mukārin tasaddî eylediği tekrar rü’yet-i muhâsebe da‘vâsı meşrû‘a ve iltifâta şâyân olmayıp mûcebince mezbûr es-Seyyid Ahmed Ağa da‘vâ-yı mezkûresiyle müdde‘î-i mezbûr el-Hâc Mustafa Efendi’ye bî-vechi şer‘î <> mu‘ârazadan ba‘de’l-men‘ sâlifü’l-beyân mezbûr es-Seyyid Ahmed Ağa’nın ikrâr ve i‘tirâfıyla lâzım gelen meblağ-ı bâkī-i merkūm yirmi bin beş yüz otuz guruşu müdde‘î-i mezbûr el-Hâc Mustafa Efendi’ye edâ ve > teslîme mezbûr es-Seyyid Ahmed Ağa’ya tenbîh olunduğu İstanbul Mahkemesi’nden huzûr-ı [âlîlerine i‘lâm olundu] Fî 16 Rebî‘ülâhir sene [12]58