Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 463 Hüküm no: 551 Orijinal metin no: [91a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İsayi v. Kirkor’un Yorgi v. Yani’de kefaletten dolayı alacağı olduğu Mahmiye-i İstanbul’da Kâtib Kasım mahallesinde sâkin işbu bâ‘isü’l-vesîka İsayi v. Kirkor meclis-i şer‘-i şerîf-i enverde mahmiye-i mezbûrda Ayvansarayı kapısı dâhilinde sâkin Yorgi v. Yani muvâcehesinde üzerine da‘vâ ve takrîr-i kelâm edip yine mahalle-i mezbûrda sâkin Nikola nâm nasrânî zimmetinde bundan akdem mülk menzil bahâsından dört yüz guruş ve otuz üç aded alaca bahâsından doksan dokuz guruş ile yedimden istidâne ve kabz eylediği yüz bir guruş ki cem‘an hakkım olan altı yüz guruş bi hükmi’l-kefâle hâlâ merkūm Yorgi’den taleb eylediğimde edâdan imtinâ‘ eder suâl olunup alıverilmesi murâdımdır dedikde gıbbe’s-suâl ve akībe’l-inkâr, müdde‘î-i mezbûrdan sıdk-ı makāline beyyine taleb olundukda udûl-i müslimînden olup mahmiye-i mezbûrda Çakır Ağa mahallesinde sâkin sarrâc el-Hâc Ali b. Mustafa ile Tahta hanında sâkin tüccârdan Minad v. Müler? ve Samatya’da sâkin Agop v. Bedros li ecli’ş-şehâde meclis-i şer‘a hâzırûn olup isre’l-istişhâd fi’l-vâki‘ işbu mezbûr Yorgi müdde‘î-i mezbûr İsayi’nin zikr olunan Ayvansaray kapısı dâhilinde sâkin Nikola Nasrânî zimmetinde yedinden müşterâ ve makbûz Fenerkapısı dâhilinde vâki‘ lede’l-ahâlî ma‘lûmü’l-hudûd mülk menzil bahâsından dört yüz guruş ve yüz üç alaca bahâsından doksan dokuz guruş ile yedinden istidâne ve kabz eylediği yüz guruş ki cem‘an hakkı olan altı yüz guruşa emr ve kabûlü hâviye kefâlet-i sahîha ile bizim huzûrumuzda kefîl oldu. Biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye ettikde mâ vaka‘a bi’t-taleb ketb olundu. Fi’l-yevmi’s-sâlis ve’l-ışrîn min Şa‘bâni’l-mu‘azzam li sene seb‘a ve tis‘în ve elf. Şuhûdü’l-hâl: Mehmed Çelebi b. Hasan, İbrahim Çelebi b. Ahmed, Mehmed Çelebi b. İdris, Hasan b. Mehmed.