İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 332 Hüküm no: 287 Orijinal metin no: [106-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim Ağa’nın Mustafa Ağa’ya sulh bedelinden olan borcunu ödemesi 1500 [guru]şa hüküm [Ma‘rûz] Derûn-ı arzuhâlde mezkûrü’l-ism olup mahrûse-i [İstanbul]da Tuzpazarı mahallesinde sâkin iken bin iki yüz elli senesi hilâlinde fevt olan es-Seyyid el-Hâc Mustafa Dede b. el-Hâc Hüseyin b. Abdullah’ın verâseti zevce-i menkûha-i metrûkesi Selime Hatun bt. Derviş Mehmed ile ol târihde sagīrler ve hâlâ kebîrler olan sulbî oğlu es-Seyyid Mustafa ve sulbiye kızı Şerife Hüsniye Hatun’a ba‘de’l-inhisâr sâhib-i arzuhâl ibn ve bint-i mezbûrân es-Seyyid Mustafa ve Şerife Hüsniye Hatun’dan mezbûre Şerife Hüsniye Hatun’un hâlâ zevci ve taraflarından husûs-ı âti’l-beyânda vekîl-i müseccel-i şer‘îleri Mustafa Ağa b. Mehmed bi’l-ma‘iyye rü’yete memûr evkāf müfettişi İstanbul pâye-i celîlesiyle mübâhî izzetlü fazîletlü es-Seyyid Mehmed Emin Âsaf Beyefendi hâzır olduğu hâlde evvelen şifâhen sâdır olan fermân-ı âlîlerine imtisâlen bi’d-defa‘ât Çarşamba günleri huzûr-ı hazret-i Fetvâ-penâhî’de ve ba‘dehû müfettiş-i mûmâ-ileyh tarafından meb‘ûs Mehmed İzzet Efendi hâzır olduğu hâlde bâb-ı cenâb-ı müşârün-ileyhde İstanbul kādıları dâ‘îlerine tahsîs buyurulan dâirede ma‘kūd meclis-i şer‘-i münîrde mahrûse-i mezkûrede Bâyezidpaşa mahallesi ahâlisinden ve kasab esnâfından olup bâ-mektûb-ı sâmî-i hazret-i Vekâlet-penâhî ihzâr olunan derûn-ı arzuhâl mezkûrü’l-ism Emir İsmailoğlu es-Seyyid İbrahim Ağa b. Hüseyin muvâcehesinde mahrûse-i mezkûrede medfûn Ahî Şemseddin nâm-ı diğer Kasab Cömert Vakfı müsakkafâtından sâlifü’l-beyân Tuzpazarı mahallesinde kâin ma‘lûmü’l-hudûd bir bâb vakıf kasab dükkânı derûnunda mevcûde beyne’l-esnâf gedik ta‘bîr olunur mezbûr es-Seyyid İbrahim Ağa yedinde mülkü olan âlât-ı lâzıme-i ma‘lûmeyi bin iki yüz otuz beş senesi hilâlinde cihet-i karzdan beş bin beş yüz elli yedi buçuk ve ibn-i müteveffâ-yı es-Seyyid el-Hâc Mustafa Dede’ye hayatında ol-mikdâr guruş deyni mukābelesinde bi-tarîki’l-istiğlâl bâ-hüccet bey‘ ü teslîm ve ba‘dehû mezbûr es-Seyyid İbrahim Ağa deyn-i merkūm beş bin beş yüz elli yedi buçuk guruşu mezbûr es-Seyyid el-Hâc Mustafa Dede’ye yine hayatında tamamen edâ ve teslîm ve âlât-ı lâzıme-i mezkûreyi mezbûr es-Seyyid el-Hâc Mustafa Dede’den bâ-i‘lâm ahz u kabz etmekle hâlâ vâzı‘ü’l-yed olup ancak mezbûr es-Seyyid İbrahim Ağa’nın celeb tâifesinden Karayakalı Sarı Mustafa b. Abdullah nâm kimesneye dört bin yedi yüz elli guruş ve Kozlucalı Ali Dayı b. Abdurrahman nâm kimesneye beş bin elli guruş ve yine Karayakalı Tâcir Hamo v. Petro nâm zimmîye dokuz bin guruş ve Kızmazoğlu Serkiz v. Mıgırdıç nâm zimmîye beş bin guruş ki cem‘an yirmi üç bin sekiz yüz guruş zimmetinde deyni olup müteveffâ-yı mezbûr es-Seyyid el-Hâc Mustafa Dede hayatında mezbûr es-Seyyid İbrahim Ağa’nın emriyle bi-hükmi’l-kefâleti bin iki yüz otuz dokuz senesi hilâlinde meblağ-ı mecmû‘-ı merkūm yirmi üç bin sekiz yüz guruşu dâyinleri merkūmûna edâ ve teslîm ve ba‘dehû meblağ-ı mecmû‘-ı merkūmu mezbûr es-Seyyid İbrahim Ağa’dan bi’l-mürâca‘a kable’l-ahz ve’l-istifâ mezbûr es-Seyyid el-Hâc Mustafa Dede fevt ve meblağ mecmû‘-ı mezkûr yirmi üç bin sekiz yüz guruş zevcesi mezbûre Selime Hatun ile oğlu ve kızı müvekkillerim mezbûrân es-Seyyid Mustafa ve Şerife Hüsniye Hatun’a mevrûs olmağla meblağ-ı mecmû‘-ı mezkûrdan müvekkillerim mezbûrânın cem‘an hisse-i irsiyeleri olan yirmi bin sekiz yüz yirmi beş guruşu mezbûr es-Seyyid İbrahim Ağa’dan hâlâ taleb ederim deyü bi’l-vekâle tasaddî eylediğim da‘vâmdan bâ-tavassut-ı muslihîn mezbûr ile an-inkârin kat‘an-li’n-nizâ‘ bin beş yüz guruş üzerine bi’t-terâzî ba‘de-akdi’l-musâlaha ve’l-kabûl sulh-ı mezkûrdan mâ‘adâ ziyâde müdde‘âma ve bi’l-cümle husûs-ı mezkûra ve sâlifü’l-beyân kasab dükkânı ile âlât-ı gedik-i merkūma ve işbu târih-i i‘lâma gelince sâir cemî‘ hukūk-ı şer‘iyeye müte‘allika âmme-i de‘âvîden ben mezbûr es-Seyyid İbrahim Ağa’nın zimmetini ibrâ-i âmm-ı sahîh-i şer‘î ile müvekkillerim mezbûrân es-Seyyid Mustafa ve Şerife Hüsniye Hatun’a izâfetle bi’l-vekâle ibrâ ve iskāt eylediğimde mezbûr es-Seyyid İbrahim Ağa dahi zikr olunan husûslara ve sâire müte‘allika âmme-i de‘âvîden kezâlik müvekkillerim mezbûrânın zimmetlerini ibrâ ve iskāt ve tarafeynden her birimiz ber-minvâl-i muharrer âharın ibrâsını asâleten ve vekâleten kabûl eyledik deyü ba‘de’l-ikrâr ve’t-tasdîk ibrâdan müstesnâ bedel-i sulh-ı mezkûr bin beş yüz guruşu müdde‘î-i vekîl-i mezbûr Mustafa Ağa’ya bi’t-taleb edâ ve teslîme mezbûr es-Seyyid İbrahim Ağa’ya tembîh olunduğu huzûr-ı [âlîlerine i‘lâm olundu] Fî-selhi Ra sene 1258