İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 334 Hüküm no: 288 Orijinal metin no: [106-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Galata ve civarındaki yedi kasap dükkânı gedik hisselerinin satışı Kasab [Ma‘rûz] Cennet-mekân adn-âşiyân Sultan Abdülhamid Han -aleyhi sicâlü’l-gufrân- hazretlerinin evkāf-ı celîleleri müstegallâtından Yedikule hâricinde kâin gayrı ez selhhâne-i mîrî on aded ganem selhhânelerinin şerâit-i mu‘teberelerine ri‘âyet şartıyla ikinci selhhâneye merbût kasab dükkânlarından mahrûse-i Galata’ya muzâfe kasaba-i Kasımpaşa civârında Tatavla karyesinde bir bâb ve mahrûse-i mezkûreye tâbi‘ kasaba-i Beşiktaş’da Paşa mahallesinde kahve dükkânına muttasıl bir bâb ve kasaba-i mezkûrede Hayreddin Paşa Türbesi kurbünde vâki‘ bir bâb ve yine kasaba-i mezkûrede Sinanpaşa Câmi‘-i şerîfi köşe başında bakkāl dükkânları beynlerinde vâki‘ bir bâb ve dördüncü selhhâneye merbût yine kasaba-i mezkûrede sığır kasabına muttasıl [107] bir bâb ve mahrûse-i mezkûreye muzâfe Ortaköy’de selhhâne önünde vâki‘ bir bâb ve A[r]navud karyesinde kapıbaşında vâki‘ bir bâb ki cem‘an yedi bâb kasab dükkânları derûnlarında mevcûde beyne’l-esnâf gedik ta‘bîr olunur vakıf âlât-ı lâzıme-i ma‘lûmelerin sümün hisselerine bi’l-icâreteyn mutasarrıf olan Vasil v. Petro zimmî bundan akdem hâlik olup âlât-ı gedik-i merkūmlardan ber-vech-i muharrer mutasarrıfe olduğu sümün hissesi hâlâ vilâyet-i Rumeli’de medîne-i Ergiri’ye muzâfe Kesturat? karyesinde mütemekkineler sulbiye kebîre kızı Zubice Nasrâniye ve sagīre kızı Katrine’ye hasbe’l-i‘âde münâsafeten intikāl eylediğini hâlâ Kassâbân müdîri es-Seyyid Mehmed Ali Bey ile mazbûtü’l-esâmî kasab ustaları ihbâr ettiklerinden sonra sagīre-i mersûmenin anası ve tesviye-i umûruna kıbel-i şer‘den mansûbe vasîsi olup yine karye-i mezkûrede mütemekkine Zuğa bt. Kosta v. Atam ve mersûme Zubice Nasrâniyeler taraflarından husûs-ı âti’l-beyânda bâ-hüccet vekîlleri olduğu şahıslarını bilirler karye-i mezkûre re‘âyâsından Kric v. Nikola ve Hıristo v. Petro nâm zimmîler şehâdetleriyle sâbit olan Kendiro v. Sava zimmî meclis-i şer‘-i hatîrde kasab tâifesinden bâ‘isü’l-i‘lâm Anaştaş v. Yanaki zimmî muvâcehesinde bi’l-vekâle takrîr-i kelâm edip zikr olunan kasab dükkânları gedik âlâtlarından sagīre-i mersûme ile müvekkilem mesfûre Zubice Nasrâniyeye babaları hâlik-i mersûmdan âdiyen intikāl eden sümün hisselerini bedel-i misli idiği zâhir olan on bin guruş bedel mukābelesinde mersûm Anaştaş zimmîye bâ-re’y-i mütevellî ferâğ-ı kat‘î-i mu‘teber ile bi’l-vekâle ferâğ ve tefvîz eylediğimde ol dahi ber-vech-i muharrer tefevvüz ve kabûl ve hisse-i tevzî‘ini müdîr ve kasab ustaları ma‘rifetleriyle almağa ta‘ahhüd edip fî-mâ ba‘d gedik-i merkūmların sümün hisseleri mesfûr Anaştaş zimmînin hakk-ı müfevvezi olup sagīre-i mersûme ile mesfûre Zubice Nasrâniyenin aslâ ve kat‘a alâka ve medhalleri kalmamışdır deyü ba‘de’l-ikrâr ve’t-tasdîk âlât-ı gedik-i merkūmların sümün hisseleri hâlik-i mersûm Vasil zimmîden kızları mersûmetâna ba‘de’l-intikāl ber-minvâl-i muharrer fâriğ-i vekîl-i mersûm Kendiro zimmînin ferâğından defter-i vakf-ı şerîfde mersûm Anaştaş zimmî uhdesine kayd ve atik temessüğü nâ-mevcûd olduğundan zuhûr eder ise amel ve i‘tibâr olunmamak şartıyla taraf-ı vakfdan müceddeden bir kıt‘a temessük tahrîr ve temhîr ve zabt ü tasarrufi’çün yedine i‘tâ buyurulmak iktizâ eylediği İstanbul Mahkemesi’nden huzûr-ı [âlîlerine i‘lâm olundu] Fî 10 Rebî‘ülâhir sene [12]58