İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 335 Hüküm no: 289 Orijinal metin no: [107-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kasımpaşa’da bulunan kasap dükkânı gediğine ait hissenin müzayede usulüyle kiraya verilmesi Kasab [Ma‘rûz] Cennet-mekân firdevs-âşiyân Sultan Abdülhamid Han -sabbet aleyhi sicâlü’l-gufrân-hazretlerinin evkāf-ı celîleleri kāimmakām-ı mütevellîsi e‘âzım-ı ricâl-i Devlet-i aliyyeden hâlâ Evkāf-ı Hümâyûn Nâzırı atûfetlü Numan Mahir Beyefendi hazretleri taraflarından vekîl-i şer‘îleri Kassâbân müdîri es-Seyyid Mehmed Ali Bey meclis-i şer‘-i münîrde bâ‘isetü’l-i‘lâm Âişe Hatun bt. Hayrullah tarafından zikri âtî husûsda tasdîka vekîl-i şer‘îsi kethudâ-yı muhzırân İsmail Ağa b. Mustafa muvâcehesinde kasab ustalarından mazbûtü’l-esâmî Müslimîn hâzır oldukları hâlde bi’l-vekâle takrîr-i kelâm edip vakf-ı müşârün-ileyh müstegallâtından olup Yedikule hâricinde kâin gayrı ez selhhâne-i mîrî on aded ganem selhhânelerinin şerâit-i mu‘teberelerine ri‘âyet şartıyla birinci selhhâneye merbût kasab dükkânlarından mahrûse-i Galata’ya muzâfe kasaba-i Kasımpaşa’da Ada nâm mahâlde büyük câmi‘-i şerîf kurbünde mumhâne karşısında vâki‘ ma‘lûmü’l-hudûd bir bâb kasab dükkânı derûnunda mevcûde beyne’l-esnâf gedik ta‘bîr olunur vakıf âlât-ı lâzıme-i ma‘lûmenin rub‘ hissesine bâ-temessük-i mütevellî bi’l-icâreteyn mutasarrıf olan müvekkile-i mezbûre Âişe Hatun’un zevci Kasab es-Seyyid Hasan Ağa b. Ali nâm kimesne bundan akdem bilâ-veled fevt olmağla ber-minvâl-i muharrer mutasarrıfe olduğu rub‘ hisse-i mezkûre mahlûl ve cânib-i vakf-ı şerîfe âid ve râci‘ oldukdan sonra hisse-i mezkûre lede’l-müzâyede ve inkıtâ‘u’r-rağbe dört bin guruşda müvekkile-i mezbûre Âişe Hatun üzerinde karâr ve ziyâde ile tâlib-i âharı zuhûr etmeyip ve meblağ-ı mezkûr hisse-i merkūmenin el-yevm mu‘accele-i misli idiği ihbâr olundukdan sonra hisse-i mezkûreyi meblağ-ı merkūm dört bin guruş icâre-i mu‘accele ve icâre-i müeccele-i kadîmesiyle bi’l-vekâle müvekkile-i mezbûre Âişe Hatun’a îcâr ve vech-i lâyıkı üzere teslîm eylediğimde ol dahi ber-minvâl-i muharrer istîcâr ve tesellüm ve kabz ve kabûl etmekle mu‘accele-i mezkûre dört bin guruşu vekîl-i mezbûr İsmail Ağa yedinde olan ilmühaber tezkiresi mûcebince Hazîne-i Evkāf-ı Hümâyûn tarafına def‘ ü teslîm ve emriyle umûr-ı vakf-ı şerîfe sarfla istihlâk olunmağla fî-mâ ba‘d rub‘ hisse-i âlât-ı gedik-i mezkûr mezbûre Âişe Hatun’un dâhil-i havza-i tasarrufu olmuşdur deyü ba‘de’l-ikrâr ve’t-tasdîk bu sûretde gedik-i mezkûrun rub‘ hissesi vech-i meşrûh üzere müteveffâ-yı mezbûr es-Seyyid Hasan Ağa’nın mahlûlünden defter-i vakf-ı şerîfde mezbûre Âişe Hatun uhdesine kayd ve hâmiş-i temessüğe zabt ü tasarrufi’çün taraf-ı vakfdan tahrîr ve temhîr ve yedine i‘tâ buyurulmak iktizâ eylediği İstanbul Mahkemesi’nden huzûr-ı [âlîlerine i‘lâm olundu] Fî 10 R sene 1258