İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 336 Hüküm no: 290 Orijinal metin no: [107-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Karacaahmed’de bulunan vakıf kasap dükkânı gediğinin satışı Kasab [Ma‘rûz] Cennet-mekân adn-âşiyân Sultan Abdülhamid Han -sabbet aleyhi sicâlü’l-gufrân—hazretlerinin evkāf-ı celîleleri müstegallâtından Yedikule hâricinde kâin gayrı ez selhhâne-i mîrî on aded ganem selhhânelerinin şerâit-i mu‘teberelerine ri‘âyet şartıyla altıncı selhhâneye merbût kasab dükkânlarından medîne-i Üsküdar’da Karacaahmed nâm mahâlde vâki‘ ma‘lûmü’l-hudûd kotra ta‘bîr olunur koyun zebh olunacak terbî‘an yüz beş zirâ‘ mahâlli müştemil bir bâb kasab dükkânı derûnunda mevcûde beyne’l-esnâf gedik ta‘bîr olunur vakıf âlât-ı lâzıme-i ma‘lûme ile vakf-ı mahâll-i mezkûra bâ-temessük-i mütevellî bi’l-icâreteyn müstakıllen mutasarrıf olan Dimitri v. Nikola zimmî meclis-i şer‘-i hatîrde kasab tâifesinden bâ‘isiyyü’l-i‘lâm Panayot v. Yani ve Kosti v. Dimitri zimmîler muvâcehelerinde hâlâ Kassâbân müdîri es-Seyyid Mehmed Ali Bey ve sâir mazbûtü’l-esâmî ustaları hâzır oldukları hâlde takrîr-i kelâm edip ber-vech-i muharrer mutasarrıf olduğum âlât-ı merkūme ile terbî‘an yüz beş zirâ‘ mahâll-i mezkûru hüsn-i rızâ ve tayyib-i hâtırım ve ferâğ-ı mu‘teber-i kat‘î ile mersûmân Panayot ve Kosti zimmîlere ale’l-iştirâki’s-seviyy bedel-i ma‘lûm ve makbûz ve müstehlek mukābelesinde bâ-re’y-i mütevellî ferâğ ve tefvîz eylediğimde onlar dahi ber-vech-i muharrer tefevvüz ve kabûl ve hisse-i tevzî‘lerini müdîr ve kasab ustaları ma‘rifetleriyle <> almağa ta‘ahhüd edip fî-mâ ba‘d gedik ve mahâll-i mezkûrlar mersûmân Panayot ve Kosti zimmîlerin seviyyen hakk-ı müfevvezleri olup benim aslâ ve kat‘a alâka ve medhalim kalmamışdır deyü ba‘de’l-ikrâr ve’t-tasdîk âlât-ı gedik-i merkūme ile terbî‘an yüz beş zirâ‘ mahâll-i mezkûr fâriğ-i mesfûr ve Dimitri zimmînin ferâğından defter-i vakf-ı şerîfde mersûmân Panayot ve Kosti zimmîlerin ber-vech-i iştirâk uhdelerine kayd ve der-dest olan temessük-i mezkûru hâmişine zabt ü tasarrufları’çün taraf-ı vakfdan tahrîr ve temhîr ve yedlerine i‘tâ buyurulmak iktizâ eylediği İstanbul Mahkemesi’nden huzûr-ı [âlîlerine i‘lâm olundu] Fî 10 Rebî‘ülâhir sene [12]58