İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 337 Hüküm no: 291 Orijinal metin no: [107-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Firar eden Kürkçü Kostandi’nin kiracı olduğu dükkânı içindeki eşyalarının satılıp bedelinin Kürkçü esnafı ustabaşısı Mihal’in emanetine verildiği Mefkūd i‘lâmı [Ma‘rûz] İstanbul’da Ebu’l-feth Sultan Mehmed Han -aleyhi’r-rahmetü ve’l-gufrân- hazretleri câmi‘-i şerîfi kurbünde Karaman-ı kebîrde vâki‘ Sulu Han ittisâlinde bir bâb dükkânda müşâhereten müstecir olan Kürkçü tâifesinden Kostandi v. Atam nâm zimmî işbu târihden üç ay mukaddem dükkân-ı mezkûru mukaffelen terk birle diyâr-ı âhara firâr etmekle dükkân-ı mezkûrun kuflü küşâd ve derûnunda mevcûde mefkūd-ı mersûmun mâlı tahrîr ve semen-i [108] misilleriyle âhara bey‘ olunup esmânı firârî-i mersûmun hâlî mütebeyyin oluncaya değin li-ecli’l-hıfz yed-i emîne vaz‘ olunmasını tâife-i mersûme ustabaşısı Mihal v. Nikola zimmî bâ-arzuhâl istid‘â ve ol-bâbda sâdır olan fermân-ı âlîlerine imtisâlen savb-ı şer‘-i enverden mezûnen irsâl olunan Kâtib Abdülkerim Efendi mâ‘an meb‘ûs ümenâ-i şer‘le dükkân-ı mezkûra varıp mersûm Mihal zimmî ile sâir cerîdede mazbûtü’l-esâmî kimesneler hâzır oldukları hâlde dükkân-ı mezkûrun kuflünü küşâd birle mefkūd-ı mersûmun hâli mütebeyyin oluncaya değin mâlını hıfza beyne’n-Nasârâ mu‘temed idiği bi’l-ihbâr zâhir olup kıbel-i şer‘den kayyım nasb olunan mersûm Mihal zimmî ma‘rifeti ve ma‘rifet-i şer‘le zuhûr eden eşyâsı tahrîr ve mütesâri‘u’l-fesâd olmağla âhara bey‘ olunup esmânından ba‘de ihrâci’l-mesârif mümzâ ve mahtûm bir kıt‘a defter mantûkunca sahhe’l-bâkī yüz otuz bir buçuk guruşu kayyım-ı mesfûr bi’l-vesâye kabz ve kendi umûruna sarfla istihlâk edip zimmetinde damânen deyni olduğunu ikrâr ve emriyle meblağ-ı bâkī-i mezkûra Kürkçübaşı el-Hâc Mehmed Emin Efendi b. Hüseyin ve Aci Nikola v. Ramezi zimmî dahi başka başka kefîl ve zâmin olduklarında tashîhan li-kefâletin vasî nasb olunan el-Hâc Mahmud Ağa b. Mustafa dahi kefâlet-i mezkûreyi kabûl eylediğini kâtib-i merkūm dâ‘îleri mahâllinde ketb ü tahrîr ve mâ‘an meb‘ûs ümenâ-i şer‘le meclis-i şer‘a gelip alâ-vukū‘ihî inhâ ve takrîr eylediği İstanbul Mahkemesi’nden huzûr-ı [âlîlerine i‘lâm olundu] Fî 6 R sene 1258