İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 338 Hüküm no: 292 Orijinal metin no: [108-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Ali Reis’in vârislerinden Nefise Hatun’un, murisinin Halil Reis’teki alacağından kendisine ait hissesini almaktan vazgeçtiği Meccânen fâriğ [Ma‘rûz] Derûn-ı arzuhâlde mezkûrü’l-ism olup vilâyet-i Anadolu’da Gemlik Kazâsı’na tâbi‘ Emrudlu (Armutlu) karyesinde sâkin iken sene-i sâbıkā şehri Rebî‘ülevvelinin beşinci günü fevt olan Mehmed Ali Reis b. Ahmed’in verâseti zevce-i menkûha-i metrûkesi Emine Hatun bt. İbrahim ile li-ümmin kız karındaşı Nefîse Hatun bt. İbrahim’e ba‘de’l-inhisâr mu‘arrefetü’z-zât mezbûre Nefîse Hatun meclis-i şer‘-i münîrde müteveffâ-yı mezbûrun kayını derûn-ı arzuhâlde mezkûrü’l-ism Halil Reis b. İbrahim muvâcehesinde kız karındaşım ve mûrisim müteveffâ-yı mezbûr Mehmed Ali Reis’in hayatında kaynı mezbûr Halil Reis zimmetinde cihet-i karzdan yedi bin beş yüz guruş alacak hakkı olup kable’l-ahz ve’l-istifâ fevt olmağla meblağ-ı mezkûr benimle zevcesi mezbûre Emine Hatun’a mevrûs olmağla meblağ-ı mezkûr yedi bin beş yüz guruşdan hisse-i irsiyemi mezbûr Halil Reis’den bi’l-verâse hâlâ taleb ederim deyü tasaddî eylediğim da‘vâmdan rızâmla meccânen fâriğa olmamla husûs-ı mezkûra ve işbu târih-i i‘lâma gelince sâir cemî‘ hukūk-ı şer‘iyeye müte‘allika âmme-i de‘âvîden mezbûr Halil Reis’in zimmetini ibrâ-i âmm-ı sahîh-i şer‘î ile ibrâ ve iskāt eylediğimde ol dahi ibrâ-i mezkûrumu kabûl edip bu vechile külliyen kat‘-ı nizâ‘ eyledik deyü ikrâr ve tasdîkleri İstanbul Mahkemesi’nden huzûr-ı âlîlerine i‘lâm olundu. Fî 12 R sene [1]258