İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 339 Hüküm no: 294 Orijinal metin no: [108-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Trabzonlu Mehmed Kavas’ın kendisini yaralayan Rüstem Efendi ile sulh olduğu 500 [guru]şa sulh [Ma‘rûz] Bâb-ı hazret-i Seraskerî kavaslarından sâhib-i arzuhâl Trabzonlu Mehmed Kavas b. Halil İstanbul Mahkemesi’nde meclis-i şer‘-i münîrde medîne-i Üsküdar’da vâki‘ karantinahâne ketebelerinden derûn-ı arzuhâlde mezkûrü’l-ism Rüstem Efendi b. Abdullah muvâcehesinde işbu târih-i i‘lâmdan beş sene mukaddem ben Şebinkarahisârı mütesellimi bulunan Hazînedârzâde Ahmed Paşa’nın Hazînedârı Behram Ağa’nın hizmetinde mezbûr Rüstem Efendi dahi paşa-yı mûmâ-ileyhin mühürdârı iken mezbûr Rüstem Efendi sağ kolumun pazusundan kılıç ile bi-gayrı hakkın darb ve cerh edip ba‘de’l-ber’ cerh-i merkūmun işbu mu‘âyene ve müşâhede olunduğu üzere eseri bâkī kalıp mu‘ayyeb olmamla mûcib-i şer‘îsi icrâ olunmak matlûbumdur deyü tasaddî eylediğim da‘vâmdan bâ-tavassut-ı muslihîn mezbûr Rüstem Efendi ile kat‘an-li’n-nizâ‘ beş yüz guruş bedel-i makbûza bi’t-terâzî ba‘de-akdi’l-musâlaha ve’l-kabûl <> ziyâde müdde‘âma ve bi’l-cümle husûs-ı mezkûra ve ücret-i müdâvât üzere masrûfum olup mezbûrdan mutâlebe eylediğim üç bin beş yüz altmış beş guruşa ve târih-i i‘lâma gelince sâir cemî‘ hukūk-ı şer‘iyeye müte‘allika âmme-i de‘âvîden ben mezbûr Rüstem Efendi’nin zimmetini ibrâ-i âmm-ı sahîh-i şer‘î ile ibrâ ve iskāt eylediğimde ol dahi ibrâ-i mezkûrumu kabûl edip bu vechile külliyen kat‘-ı nizâ‘ eyledik deyü ba‘de’l-ikrâr ve’t-tasdîk mezbûr Mehmed Kavas merkūm Rüstem Efendi’ye mâlından beş yüz guruş idâne ve teslîm ol dahi yedinden istidâne ve kabz ve istihlâk edip meblağ-ı mezkûr zimmetinde mezbûr Mehmed Kavas’a deyni olduğunu ikrâr ü i‘tirâf ve edâ-i deyne ta‘ahhüd eylediği tescîl ve huzûr-ı âlîlerine i‘lâm olundu. Fî 13 R sene [1]258