İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 340 Hüküm no: 295 Orijinal metin no: [109-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim Ağa’nın kefaletten doğan borcunu ödemesi 7486 [guru]ş kefâletden hüküm [Ma‘rûz] Sâbıkā Ayvacık Kazâsı voyvodası derûn-ı arzuhâlde mezkûrü’l-ism es-Seyyid Mustafa Efendi b. Ali meclis-i şer‘-i münîrde Nohudcu esnâfından sâhib-i arzuhâl es-Seyyid İbrahim Ağa b. Süleyman muvâcehesinde benim sâbıkā Kal‘a-i Sultâniye gümrükçüsü olup <> el-yevm ol tarafda olan Mehmed Said Ağa b. Abdullah zimmetinde <> yedime verdiği sene-i sâbıkā Recebi’l-müreccebinin on dokuzuncu günü târihiyle müverrah işbu bir kıt‘a deyn tahvîli mûcebince cihet-i karzdan alacak hakkım olan yedi bin dört yüz seksen altı guruşa sene-i sâbıkā-i merkūm Şa‘bâni’l-mu‘azzamı’nın üçüncü günü İstanbul’da Aksaray nâm mahâlde Kolağası Topuz Mehmed Ağa’nın berber dükkânında işbu mezbûr es-Seyyid İbrahim Ağa yine müteveffâ-yı mezbûrun hayatında kefâlet-i mutlaka-i sahîha ile kefîl ve zâmin olup ben dahi ber-vech-i muharrer kefâletini kabûl etmemle meblağ-ı mezkûr yedi bin dört yüz seksen altı guruşu kefâlet-i mahkiyesine binâen mezbûr es-Seyyid İbrahim Ağa’dan hâlâ taleb ederim deyü da‘vâ ettikde ol dahi cevâbında ben ol târihde dükkân-ı mezkûrda <> gāib-i mezbûr Mehmed Said Ağa’nın hayatında nefsine kefîl oldum ve cihet-i mezkûreden müdde‘î-i mezbûra zimmetinde deyni olan meblağ-ı mezkûr yedi bin dört yüz seksen altı guruşa kefîl olmadım deyip müdde‘î-i merkūmun ber-minvâl-i muharrer kefâlet müdde‘âsını inkâr etmekle müdde‘î-i mezbûr es-Seyyid Mustafa Efendi da‘vâ-yı mezkûresini her biri mahallerinden lede’t-tezkiye adl ve makbûlü’ş-şehâde idikleri ihbâr olunan mahâll-i mezkûr civârında Çakırağa mahallesi ahâlisinden el-Hâc Mehmed Ağa b. Mehmed Nafi ve Baklalı Kemaleddin mahallesi ahâlisinden Attâr Mehmed İzzet Ağa b. İbrahim nâm kimesneler şehâdetleriyle bi’l-muvâcehe vech-i vecîh-i şer‘î üzere isbât etmeğin mûcebince meblağ-ı mezkûr yedi bin dört yüz seksen altı guruşu bi-hükmi’l-kefâleti müdde‘î-i mezbûr es-Seyyid Mustafa Efendi’ye edâ ve teslîme mezbûr es-Seyyid İbrahim Ağa’ya tenbîh olunduğu İstanbul Mahkemesi’nden huzûr-ı âlîlerine i‘lâm olundu. Fî 25 R sene [1]258