İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 340 Hüküm no: 296 Orijinal metin no: [109-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Satılan cariyenin ayıplı olduğunun tesbitiyle iadesi 5250 [guru]ş hüküm [Ma‘rûz] Medîne-i Üsküdar’da Rum Mehmedpaşa mahallesinde sâkine sâhibe-i arzuhâl Şerife Hatice Hanım bt. el-Hâc Mustafa b. Abdullah tarafından husûs-ı âti’l-beyânda vekîl olduğu zâtını ârifân Mustafa <> Behçet Efendi b. Hafız Ahmed ve Mehmed Râşid Ağa b. Abdulkadir şehâdetleriyle sâbit olan Hafız Mehmed Efendi b. İbrahim meclis-i şer‘-i münîrde derûn-ı arzuhâlde mezkûrü’l-ism Esirci el-Hâc Abdurrahman Ağa b. el-Hâc Musa muvâcehesinde müvekkilem mezbûre Şerife Hatice Hanım’ın şehri sâbıkın yedinci günü cemî‘ uyûbdan sâlime olmak üzere beş bin iki yüz elli guruş semen-i medfû‘ ve makbûza mezbûr el-Hâc Abdurrahman Ağa’dan iştirâ ve kabz eylediği işbu hâzıratü bi’l-meclis kara gözlü açık kaşlı tahmînen on yaşında bir re’s Çerkes câriye kasığının sol tarafında cerha şişi ile mu‘ayyebe ve ayb-ı merkūm şirâ târihinden kadîm ve inde’t-tüccâr noksân-ı semen îcâb eder uyûbdan olup ve ayb-ı merkūm elân câriye-i mezkûrede mevcûd ve şirâ târihinden kadîm olduğunu hâlâ Reisü’l-etibbâ-i hazret-i cihân-dârî ve Sadr-ı vâlâ-yı Rumeli devletlü atûfetlü Abdülhak Efendi hazretleri hâmiş-i arzuhâlde mastûr olduğu üzere i‘lâm dahi etmeleriyle redd-i mebî‘ ve istirdâd-ı semen murâdımdır deyü tevcîh-i husûmet bulundukdan sonra bi’l-vekâle da‘vâ ettikde mezbûr el-Hâc Abdurrahman Ağa dahi cevâbında câriye-i mezbûreyi müvekkile-i merkūme Şerife Fatıma Hanım’a ber-vech-i muharrer bey‘ini ve semen-i mezkûru kabzını ikrâr <> ve ayb-ı mezkûrun kıdemini inkâr etmekle müdde‘î-i vekîl-i mezbûr Hafız Mehmed Efendi ayb-ı mezkûr câriye-i mezbûrede şirâ târihinden kadîm olduğunu huzzâk-ı etibbâdan Mehmed Ataullah Efendi b. Mehmed Emin ve es-Seyyid Mehmed Eşref Efendi b. Mehmed Ârif nâm şâhideyn-i mu‘addileyn şehâdetleriyle bi’l-muvâcehe ber-nehc-i şer‘î ba‘de’l-isbât müvekkilesi mezbûre Şerife Hatice Hanım dahi bi’n-nefs gelip zâtı ba‘de’t-ta‘rîfi’ş-şer‘î vech-i şer‘î üzere tahlîf olunmağın mûcebiyle câriye-i mezbûreyi geriye ahz ve makbûzu olan semen-i merkūm beş bin iki yüz elli guruşu mezbûre Şerife Hatice Hanım’a redd ü teslîme mezbûr el-Hâc Abdurrahman Ağa’ya tembîh olunduğu İstanbul Mahkemesi’nden huzûr-ı âlîlerine i‘lâm olundu. Fî 19 Ra sene [12]58