Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 464 Hüküm no: 552 Orijinal metin no: [91a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Emetullah bt. Mustafa’nın Yusuf Efendi b. Mehmed’den boşandığı Mahmiye-i İstanbul’da Etmeydanı kurbunda sâkine Emetullah bt. Mustafa nâm Hâtun zâtını ma‘rifet-i şer‘iyye ile ârifân olan Mehmed b. Ahmed ve Mustafa b. Şaban ta‘rîfleriyle mu‘arrefe oldukdan sonra meclis-i şer‘-i şerîf-i enverde zevci Yusuf Efendi b. Mehmed nâm kimesne tarafından kendini tatlîk ve mehr-i müeccel ve nafaka-i iddetini teslîme vekîl olduğu mahrûse-i Üsküdar’da Atîk Vâlide Sultan câmi‘-i şerîfi kurbunda mekteb mu‘allimi Mehmed Efendi b. Osman ve Mehmed b. Mustafa şehâdetleriyle şer‘an sâbit olan bâ‘isü haze’l-kitâb Mehmed Çelebi b. Mustafa mahzarında ikrâr ve takrîr-i kelâm edip zevcim mezbûr Yusuf Efendi beni tatlîka mezkûr Mehmed Çelebi’yi vekîl etmekle ol dahi vekâlet-i mezbûru kabûl işbu meclis-i şer‘de [ba‘de] isbâti’l-vekâle beni tatlîk etmekle mezbûr Yusuf Efendi zimmetinde ma‘kūdun aleyh olan dört bin akçe mehr-i müeccelimi ve nafaka-i iddet ve me’ûnet-i süknâm mukābelesinde dahi [91b] sekiz yüz akçe ki cem‘an dört bin sekiz yüz akçeyi bana teslîm ben dahi ahz u kabz ve tesellüm eyledim. Mehr ve nafakamdan zimmetinde hakkım kalmamışdır dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’l-ışrîn min Şa‘bâni’l-mu‘azzam li sene seb‘a ve tis‘în ve elf. Şuhûdü’l-hâl: İbrahim Çelebi b. Ahmed, Mustafa Çelebi b. Ahmed, Mustafa Çelebi b. Abdurrahman, Mehmed b. Ahmed.