İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 342 Hüküm no: 298 Orijinal metin no: [109-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İslam b. Sadık’ın Horhor’daki simitçi gediğinden hisse talep eden Fazlı ve İsmail kardeşlerin taleplerinin reddedildiği Horhor’da simidci gediği nizâ‘ına dâir [Ma‘rûz] Vilâyet-i Rumeli’de Debre Kazâsı’na tâbi‘ Dirin? karyesi ahâlisinden derûn-ı arzuhâlde mezkûrü’l-ism İslâm b. Sadık nâm kimesne bi’l-ma‘iyye rü’yete memûr evkāf müfettişi İstanbul pâye-i celîlesiyle mübâhî izzetlü fazîletlü es-Seyyid Mehmed Emin Âsaf Beyefendi hâzır olduğu Çarşamba günü huzûr-ı hazret-i Fetvâ-penâhî’de ma‘kūd meclis-i şer‘-i münîrde karye-i mezkûre ahâlisinden olup zikri âtî gedik âlâtının vakıf altmış sehm hisse-i şâyi‘asına vaz‘-ı yedleri mütehakkık olan Fazlı ve İsmail ibney el-müteveffâ İbrahim Edhem b. Abdullah nâm kimesnelere li-ebeveyn kız karındaşları Mevzune ve Ârife ve Rahime nâm hatunlardan <> nefsinden asıl ve kız karındaşları mezbûrûndan İsmail ve Mevzune ve Ârife ve Rahime hatunlar taraflarından husûs-ı âti’l-beyânda vekîl-i şer‘îleri sâhib-i arzuhâl mezbûr Fazlı muvâcehesinde İstanbul’da Horhor nâm mahâlde manav ve enserci dükkânları beynlerinde vâki‘ bir bâb simidci dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin yüz yirmi sehm i‘tibârıyla altmış sehm hisse-i şâyi‘asına müteveffâ-yı mezbûr İbrahim Edhem ile hayatında li-ebeveyn er karındaşı Osman ale’l-iştirâki’s-seviyy mâlikler iken mezbûrân İbrahim Edhem ve Osman altmış sehm hisse-i şâyi‘a-i gedik-i merkūmu bin iki yüz elli üç senesi şehr-i Rebî‘ülevvelinin yirmi beşinci günü Hudâvendigâr-ı sâbık müstağrak-ı bihâr-ı rahmet-i Hâlık vâlid-i kesîrü’l-mehâmid-i hazret-i Hilâfet-penâhî mazhar-ı gufrân-ı İlâhî Sultan Gāzi Mahmud Han -aleyhi eltâfü Rabbihi’l-Mennân- hazretlerinin evkāf-ı celîlelerine teberru‘ ve tashîh ettirerek yevmî altı akçe icâre-i müeccele ile taraf-ı evkāf-ı celîleden istîcâr ve bir kıt‘a mütevellî temessüğü ahz edip ol-vechile altmış sehm hisse-i şâyi‘a-i merkūmeye müstegallât-ı evkāf-ı celîle-i mezkûreden olmak üzere mutasarrıflar iken mezbûr Osman fevt olup otuz sehm hisse-i şâyi‘ası sulbî kebîr oğlu li-ümmin karındaşım Tâhir’e hasbe’l-âde intikāl ettikde otuz sehm hisse-i şâyi‘a-i merkūme bin iki yüz elli dört senesi Muharremi’l-harâmının on dördüncü günü karındaşım mezbûr Tâhir’in ferâğından olmak üzere defter-i vakf-ı şerîfde ammi ve müştereki mezbûr İbrahim Edhem uhdesine kayd ve temessük-i mezkûr hâmişine zabt u tasarrufi’çün taraf-ı evkāf-ı celîle-i mezkûreden tahrîr ve temhîr olunup ol-vechile mecmû‘ altmış sehm hisse-i şâyi‘a-i âlât-ı mezkûreye mezbûr İbrahim Edhem müstakıllen mutasarrıf iken fevt oldukda evlâdı asıl ve vekîl ve müvekkilûn-ı mezbûrûn altmış sehm hisse-i şâyi‘a-i merkūmeyi babaları müteveffâ-yı mezbûrun intikālinden zabt u tasarruf edip vaz‘-ı yed ederler lâkin karındaşım mezbûr Tâhir mutasarrıf olduğu otuz sehm hisse-i şâyi‘a-i merkūmeyi ammi-i mezbûr İbrahim Edhem’e fâriğ olmayıp fevt oldukda verâseti benimle hâlâ karye-i mezkûrede sâkinler [110] vâlidemiz Sare bt. Abdi nâm hatun ve diğer li-ümmin er ve kız karındaşları Mehmed nâm kimesne ve Âişe ve Gü[n]şah ve Meryem ve Zübeyde nâm hatunlara münhasır olduğundan otuz sehm hisse-i şâyi‘a-i merkūme dahi benimle verese-i sâire-i merkūmesine mevrûs olmuş olup ve ben verese-i gāibûn-ı mezbûrûn taraflarından hisse-i mîrâslarını taleb ve da‘vâya bâ-hüccet vekîlleri olmamla öyle olucak otuz sehm hisse-i şâyi‘a-i merkūmeden keff-i yed edip bir müddetden berü makbûzları olan hâsılâtı ile mâ‘an bana teslîm etmek üzere asıl ve vekîl ve müvekkilûn-ı mezbûrûna cebr olunmak bi’l-asâle ve bi’l-vekâle murâdımdır deyü takrîr-i meşrûhu üzere tasaddî eylediği [da‘vâsı] meşrû‘a ve iltifâta şâyân olmamağla mûcebiyle müdde‘î-i mezbûr İslâm da‘vâ-yı mezkûresiyle asıl ve vekîl-i mezbûr Fazlı’ya bî-vech-i şer‘î mu‘ârazadan men‘ olunduğu İstanbul Mahkemesi’nden huzûr-ı âlîlerine [i‘lâm olundu] Fî 21 R sene 1258