İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 343 Hüküm no: 299 Orijinal metin no: [110-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kuyumcu Nikola’nın Abdülhalim Fethi Efendi’ye olan borcunu ödemesi için yapılan tenbih 27000 [guru]ş hüküm [Ma‘rûz] Defterhâne-i âmire kalemi ketebesinden olup vilâyet-i Anadolu’da Menteşe <> sancağında vâki‘ senevî sekiz bin guruş bedel ile mâliye hazîne-i celîlesinde mukayyed Dadya ze‘âmetine bâ-berât-ı âlî-şân mutasarrıf olan sâhib-i arzuhâl es-Seyyid Abdülhalim Fethi Efendi b. Mehmed Çarşamba günü huzûr-ı hazret-i Fetvâ-penâhî’de ma‘kūd meclis-i şer‘-i münîrde mukaddemâ Büyük Yeni Han sarrâflarından ve hâlâ kuyumcu tâifesinden derûn-ı arzuhâlde mastûrü’l-ism Nikola v. Andon zimmî muvâcehesinde mersûm Nikola zimmî mukaddemâ bir müddet sarrâfım olup mâlından zimmetimde cihet-i karzdan bi-şarti’r-rücû‘ emrimle mahallerine olan medfû‘âtından bâ-tahvîl ve bilâ-tahvîl otuz iki bin guruş alacak hakkı olup ve bin iki yüz elli dört senesi Şa‘bâni’l-mu‘azzamı’nın on beşinci gününe gelince dahi beynimizde cereyân eden ahz ü i‘tâ <> ve cemî‘ hukūk-ı şer‘iyeye müte‘allika âmme-i de‘âvîden zimmî-i mersûmun zimmetini kabûlünü hâvî ibrâ-i sahîh ile ibrâ ve iskāt ve târih-i merkūm ile müverrah yedine bir kıt‘a ibrâ tahvîli dahi i‘tâ eylediğimden sonra beher sene bedel-i merkūm sekiz bin guruşu mahâllinden alıp bin iki yüz elli yedi ve elli sekiz ve elli dokuz ve altmış senelerinde deynim olan meblağ-ı mezkûr otuz iki bin guruşu istifâ etmek üzere ze‘âmet-i merkūmenin ber-vech-i muharrer dört senelik zabtnâmesini mersûm Nikola zimmîye teslîm etmiş isem de yedimde olup sene-i sâbıkā yani bin iki yüz elli yedi senesi Recebi’l-müreccebinin yirmi yedinci günü târihiyle müverah bâ-fermân-ı âlî verilen işbu bir kıt‘a ilmühaber nâtık olduğu üzere zimmî-i mesfûra meblağ-ı mezkûr zimmetimde deynim olduğunu kat‘iyyen ikrâr ve ancak medâr-ı ma‘âşım olan ze‘âmet-i mezkûre hâsılâtı külliyen zimmî-i mersûm tarafına verildiği sûretde evlâd ü iyâlim kemâl-i zarûrete dûçâr olup perîşân olacaklarından deyn-i mezkûrum tediye oluncaya kadar beher sene bedel-i mezkûrun nısfı bana ve nısf-ı diğeri zimmî-i mersûma verilmek üzere istirhâm eylediğime binâen kalem-i mezkûrun çend nefer mütehayyizânı hâzır oldukları hâlde sene-i mezkûrede duhûl eden Ağustos ibtidâsından i‘tibâren zimmî-i mersûm tarafından bana beher şehr ikişer yüz ellişer guruş verilip senesi hitâmına değin ahz eyleyeceğim üç bin guruş ze‘âmet-i mezkûrenin bir senelik bedelinden fürû-nihâde olunarak bâkī beş bin guruş deynime mahsûb ve edâ-i deyn oluncaya değin beher sene bu vechile icrâ olunmak üzere karâr verilip ve tarafeynden her birimiz dahi ol-vechile edâ ve istifâ-i deyne râzı olduğumuzdan sonra mersûm Nikola zimmî ze‘âmet-i mezkûrenin sâlifü’l-beyân elli yedi senesi hâsılâtı olup iki taksîtde olan makbûzu olan sekiz bin guruşun ancak beş bin guruşunu minvâl-i muharrer üzere deyn-i mezkûrumun ol-mikdârına mahsûb edip mâ‘adâ yirmi yedi bin guruş zimmetimde deynim bâkī kalıp lâkin târih-i ilmühaberde ben mersûm Nikola zimmî ile rü’yet-i muhâsebe etmeksizin minvâl-i muharrer üzere ikrâr-ı deyn etmiş idim eğer târih-i merkūmda muhâsebem rü’yet olunmuş olsa idi ikrâr-ı deyn târihinden mukaddem olan teslîmâtım tebeyyün edip aslâ deynim kalmaz idi öyle olucak hâlâ muhâsebemiz rü’yet birle verdiğim zabıtnâme-i merkūmları taleb ederim deyü takrîr-i meşrûhu üzere tasaddî eylediği da‘vâsı meşrû‘a ve iltifâta şâyân olmadığı müdde‘î-i mezbûr es-Seyyid Abdülhalim Fethi Efendi’ye tefhîm ve mûcebince da‘vâ-yı mezkûresiyle mesfûr Nikola zimmîye bî-vech-i şer‘î mu‘ârazadan ba‘de’l-men‘ zimmî-i mersûm meblağ-ı bâkī-i mezkûr yirmi yedi bin guruşu mezbûr Abdülhalim Fethi Efendi’den hâlâ mutâlebe etmeyip bi’t-terâzî ber-mûceb-i ilmühaber istifâ-yı deyne ta‘ahhüd eylediği İstanbul Mahkemesi’nden huzûr-ı [âlîlerine i‘lâm olundu] Fî 21 R sene [12]58