İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 345 Hüküm no: 301 Orijinal metin no: [110-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Elisava’nın damadı Bakkal Bratamoz’a olan borcunu ödediği Mu‘ârazadan men‘ [Ma‘rûz] Arzuhâl eden Bakkāl Bratomos v. Benyat zimmî şifâhen sâdır olan fermân-ı âlîlerine imtisâlen Çarşamba günü huzûr-ı hazret-i Fetvâ-penâhî’de ma‘kūd meclis-i şer‘-i hatîrde hâlâ kayınanası derûn-ı arzuhâlde ismi mastûre şahsı mu‘arrefe Elisava bt. Yorgi Nasrâniye muvâcehesinde gāibûn ani’l-meclis Mikâil ve İstefan zimmîler Hatme? ve Tefarik ve Amasye Nasrâniyeler evlâdi’l-hâlik Lotefi zimmînin bâ-temessük-i mütevellî bi’l-icâreteyn ihmâsen mutasarrıf oldukları İstanbul’da Eğrikapı dâhilinde Çakırağa mahallesinde kâin bir bâb vakıf menzili bin iki yüz elli iki senesi şehri Ramazani’l-mübârekinin yirmi üçüncü günü beş bin yedi yüz elli guruş bedel mukābelesinde kayın anam mersûme gāibûn-ı mersûmûndan bâ-re’y-i mütevellî tefevvüz eylediğinde bedel-i merkūmun beş bin iki yüz elli guruşunu kayın anam mersûmenin bi-şarti’r-rücû‘ emriyle mâlımdan gāibûn-ı mesfûrûna def‘ ü teslîm etmemle meblağ-ı mezkûr beş bin iki yüz elli guruşu kayın anam mesfûre Elisava Nasrâniyeden bi’l-mürâca‘a hâlâ taleb ederim deyü da‘vâ ettikde ol dahi cevâbında ben meblağ-ı mezkûr beş bin iki yüz elli guruşu yine târih-i merkūmda mahalle-i merkūme civârında Tekfur Sarayı nâm mahâlde Berber el-Hâc Mustafa Nazif Ağa b. Mustafa’nın dükkânında güveyim müdde‘î-i mersûm Bratomos zimmîye tamamen edâ ve teslîm etmiş idim deyü inkâra mukārin eylediği def‘ini her biri mahallerinden lede’t-tezkiye adl ve makbûlü’ş-şehâde idikleri ihbâr olunan mezbûr el-Hâc Mustafa Nazif Ağa ile İstanbul’da Balatkapısı dâhilinde Lonca nâm mahâlde mütemekkin Berber Mihayil v. Haçador nâm zimmî şehâdetleriyle huzûr-ı hazret-i müşârün-ileyhde müdde‘î-i mersûm muvâcehesinde bi’l-muvâcehe ber-nehc-i şer‘î isbât etmeğin mûcebince müdde‘î-i mesfûr Bratomos zimmî da‘vâ-yı mezkûresiyle kayın anası mersûme Elisava Nasrâniyeye bî-vech-i şer‘î mu‘ârazadan men‘ olunduğu İstanbul Mahkemesi’nden huzûr-ı [âlîlerine i‘lâm olundu] Fî 21 R sene [1]258