İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 348 Hüküm no: 303 Orijinal metin no: [111-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdulfettah Beyefendi’nin vârislerinden bir kısmının kendilerine intikal eden terekedeki eşyaları zabtettiği iddiasıyla Abdulfettah’ın zevcesi Âdile Hanım’a açtıkları davanın reddedildiği 5400 [guru]ş kıymetli eşyâ men‘i Ma‘rûz Derûn-ı arzuhâlde isimleri mezkûr Rumeli Sadâreti pâyesi olup cennet-mekân adn-âşiyân merhûm Sultan Ahmed Hân-ı Sâlis -tayyebe serâhû mevlâhü’l-bâ‘is- hazretleri evkāf-ı celîleleri müstegallâtından Boğaziçi’nde Bebek nâm-ı diğer Hümâyûnâbad karyesinde sâkinler iken bin iki yüz elli beş senesi Zilhiccetü’ş-şerîfesi hilâlinde merhûm olan Cabbarzâde Abdulfettah Beyefendi neclü’l-müteveffâ Süleyman Bey’in verâseti zevce-i menkûha-i metrûkeleri Âdile Kadın bt. Abdullah ve Şefkat Kadın bt. Abdullah ile zevce-i mûmâ-ileyhâ Âdile Kadın’dan mütevellide sulbiye kebîre kerîmesi Âişe Hanım ve li-ebin birâderleri Abbas Bey ve Mahmud Bey ve Abdülgani Bey ve li-ebin hemşîreleri Leyla Hanımefendi ve Ulviye Hanım ve Havva Hanım ve Meryem Hanım ve diğer li-ebin birâderleri gāibân ani’l-beled ferîkān-ı kirâmdan Mehmed Celaleddin Paşa ve Ahmed Bey ve diğer li-ebin hemşîreleri gāibân ani’l-beled Âişe Hanım ve Esma Hanım ve Sare Hanım ve Rukiye Hanım’a ba‘de’l-inhisâr ashâb-ı arzuhâl gāibûn-ı mûmâ-ileyhim Mehmed Celaleddin Paşa ve Ahmed Bey ve Âişe Hanım ve Esma Hanım ve Sare Hanım ve Rukiye Hanım taraflarından husûs-ı âti’l-beyânda âharı tevkîle mezûnen vekîlleri olduğu mukaddemâ ber-nehc-i şer‘î sâbit olan mûmâ-ileyhâ Leyla Hanımefendi’nin zevc-i mükerremleri sâbıkā Sadr-ı vâlâ-yı Rumeli Arabzâde devletlü atûfetlü Mehmed Hamdullah Efendi neclü’l-merhûmi’l-mebrûr Şeyhülislâm-ı esbak Mehmed Ârif Efendi hazretleri tarafından ve mûmâ-ileyhim Abbas Bey ve Mahmud Bey ve Abdülgani Bey ve Leyla Hanımefendi ve Ulviye Hanım ve Havva Hanım ve Meryem Hanım tarafından husûs-ı mezkûrda vekîl-i müseccel-i şer‘îleri Ahmed Ağa b. Osman bi’l-ma‘iyye rü’yete memûr evkāf müfettişi İstanbul pâye-i celîlesiyle mübâhî izzetlü fazîletlü es-Seyyid Mehmed Emin Âsaf Beyefendi hâzır olduğu hâlde şifâhen sâdır olan fermân-ı âlîlerine imtisâlen bi’d-defa‘ât Çarşamba günleri huzûr-ı hazret-i Fetvâ-penâhî’de ma‘kūd meclis-i şer‘-i münîrde derûn-ı arzuhâlde mezkûretü’l-ism zâtları ta‘rîf-i şer‘î ile mu‘arrefeler olan bint-i mûmâ-ileyhâ Âişe Hanım ve zevce-i mûmâ-ileyhâ Şefkat Kadın ile zevce-i mûmâ-ileyhâ Âdile Kadın’ın dâmâd ve tarafından husûs-ı câi’l-beyânda vekîl-i müsecceli müderrisîn-i kirâmdan Abdurrahman Bey b. el-müteveffâ İçilli Ahmed Paşa muvâcehelerinde merhûm-ı müşârün-ileyh Abdulfettah Beyefendi’nin zâhire ihrâc ve ma‘rifet-i şer‘le tahrîr olunan terekesinden hâric verese-i mezkûresine mevrûs olan mecmû‘u elli dört bin guruş kıymetli bir sagīre bikr Çerkes Nazikter ve biri dahi kezâlik bikr Çerkes İşvereş ve biri kebîre bikr Çerkes Curet? ve biri kebîre seyyib Çerkes Nurcihan ve bir kezâlik seyyib Çerkes Şivenâz ve biri dahi kezâlik seyyib Çerkes Hoşkadem nâm altı re’s câriye ile bir oda döşemesi takımı olarak mecmû‘u yedi bin beş yüz guruş kıymetli yün memlû on bir kılâbdân ile dokuma yasdık ve penbe memlû üç basma münakkaş? koltuk yasdığı ve üç basma şilte ve altı beyaz patiska pencere perdesi ve bir İngiliz keçesini kerîmesi mûmâ-ileyhâ Âişe Hanım fuzûlî müstakılleten zabt ve vaz‘-ı yed ve mecmû‘u on sekiz bin guruş kıymetli biri bikr Abaza Nafize ve biri dahi kezâlik bikr Çerkes Mahinur nâm iki re’s kebîre câriye ile diğer bir oda döşemesi takımı olarak mecmû‘u yedi bin beş yüz guruş kıymetli yün memlû yedi minder ve penbe memlû üç basma şilte ve yün memlû on dört beyaz işleme yasdık ve penbe memlû dört basma koltuk yastığı ve âhar bir oda döşemesi takımı olarak mecmû‘u kezâlik yedi bin beş yüz guruş kıymetli yün memlû on dört mavi şalî üzerine ipek işleme yasdık ve iki basma mak‘ad ve penbe memlû iki basma şilte ve üç erkân minderi ve üç koltuk yasdığı ve bir Selanik keçesi ve altı patiska pencere perdesi ve iki bin beş yüz guruş kıymetli bir mücevher mâşâallâh ve dört bin guruş kıymetli bir çekmece sâ‘ati ve beş yüz guruş kıymetli bir çift zârını dahi zevcesi mûmâ-ileyhâ Şefkat Kadın kezâlik fuzûlî müstakılleten zabt ve vaz‘-ı yed ve mecmû‘u on sekiz bin guruş kıymetli biri bikr Gürciye Halet ve biri dahi seyyib Çerkes Hoşnihal nâm iki re’s kebîre câriye ile diğer bir oda döşemesi takımı olarak mecmû‘u kezâlik yedi bin beş yüz guruş kıymetli yün memlû sekiz minder ve penbe memlû üç beyaz nîm şilte ve yün memlû on sekiz beyaz patiska üzerine sarı ipek işleme yasdık ve üç kezâlik işleme mak‘ad ve penbe memlû dört kezâlik işleme koltuk yastığı ve on üç beyaz patiska pencere perdesi ve bir oymalı sarı çuka kapı perdesi dahi zevcesi ve müvekkile-i mûmâ-ileyhâ Âdile Kadın kezâlik fuzûlî müstakılleten zabt ve vaz‘-ı yed etmeleriyle suâl olunup cümlesinden verese-i sâire-i mûmâ-ileyhin hisse-i irsiyelerini asıl ve müvekkile-i mûmâ-ileyhim Âişe Hanım ve Şefkat Kadın ve Âdile Kadın’dan bi’l-vekâle hâlâ taleb ederim deyü da‘vâ ettikde evvelen kerîme-i mûmâ-ileyhâ Âişe Hanım cevâbında sâlifü’l-beyân on bir kılâbdânlı yasdık ve basma üç mak‘ad ve üç şilte ve üç koltuk yasdığı ve altı pencere perdesi ve bir İngiliz keçesi pederim merhûm-ı müşârün-ileyh Cabbarzâde Abdulfettah Beyefendi neclü’l-müteveffâ Süleyman Bey hâl-i hayatında ve hâl-i sıhhatlerinde bin iki yüz elli iki senesi Muharremi’l-harâmı gurresinde nefsini vekîl-i mûmâ-ileyh Abdurrahman Bey’e tezvîc edeceğim esnâda karye-i mezbûrede vâki‘ sâhilhânelerinde hibe-i sahîha-i şer‘iye ile bana hibe ve temlik ve teslîm ettiklerinde ben dahi ittihâb ve temellük ve tesellüm ve kabz ve kabûl edip ol-vechile eşyâ-i muharrere-i mezkûre mülk-i mevhûbem olmağla bi-hakkın müstakılleten zabt ve vaz‘-ı yed ederim deyü zevce-i mûmâ-ileyhâ Şefkat Kadın ve vekîl-i mûmâ-ileyh Abdurrahman Bey tasdîkleriyle inkâra mukārin da‘vâ-yı def‘ edip müdde‘î-i vekîl-i mezbûr Ahmed Ağa’nın mâ‘adâ ber-minvâl-i muharrer müdde‘âsını dahi inkâr etmekle ve sâlisen mûmâ-ileyhâ Şefkat Kadın ve vekîl-i mûmâ-ileyh Abdurrahman Bey dahi cevâblarında müdde‘î-i vekîl-i mezbûrun minvâl-i meşrûh üzere eylediği da‘vâlarını inkâr etmeleriyle mûmâ-ileyhâ Âişe Hanım def‘-i mezkûrunu ve müdde‘î-i vekîl-i mezbûr Ahmed Ağa dahi ber-vech-i muharrer müdde‘âlarını beyâna ba‘de’l-havâle müdde‘î-i vekîl-i mezbûr mûmâ-ileyhâ Âişe Hanım’ın def‘-i mezkûrunu huzûr-ı cenâb-ı Fetvâ-penâhî’de bi’l-vekâle ikrâr ü i‘tirâf edip ve mâ‘adâ müdde‘âlarını dahi lede’l-istimhâl ve’l-imhâl kirâren ve mirâren müddet-i mehl-i şer‘î mürûr edip bir vechile isbâta kādir olmayıp istihlâf ettikde mûmâ-ileyhâ Âişe Hanım ve Şefkat Kadın’dan her biri bi’l-muvâcehe ber-nehc-i şer‘î ba‘de’t-tahlîf bi’l-iltimâs taraf-ı dâ‘îleri ve müfettiş-i mûmâ-ileyh tarafından mezûnen mürsel Kâtib es-Seyyid Mustafa Rifat Efendi İstanbul’da Mahmudpaşa mahallesinde vâki‘ müvekkile-i mûmâ-ileyhânın sâkine olduğu menzilinde akd eylediği meclis-i şer‘de zâtı ba‘de’t-ta‘rîfi’ş-şer‘î mûmâ-ileyhâ Âdile Kadın müdde‘î-i vekîl-i mezbûr Ahmed Ağa muvâcehesinde vech-i şer‘î üzere tahlîf eylediğini mâ‘an meb‘ûs ümenâ-i şer‘le huzûr-ı hazret-i Fetvâ-penâhî’de müfettiş-i mûmâ-ileyh ile akd olunan meclis-i şer‘-i hatîre gelip alâ-vukū‘ihî inhâ ve takrîr etmeğin mûcebiyle müdde‘î-i vekîl-i mezbûr Ahmed Ağa da‘vâ-yı mezkûreleriyle asıl-ı mûmâ-ileyhâ Âişe Hanım ve Şefkat Kadın ve müvekkile-i mûmâ-ileyhâ Âdile Kadın’a bilâ-beyyine ve bî-vech-i şer‘î mu‘ârazadan men‘ olunduğu İstanbul Mahkemesi’nden huzûr-ı [âlîlerine i‘lâm olundu] Fî 21 R sene 1258