İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 350 Hüküm no: 304 Orijinal metin no: [112-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Cemile Hatun’un Sarraf Artin’deki alacağının tahsili 250 [guru]ş sulh [Ma‘rûz] Sâhib-i arzuhâl mu‘arrefetü’z-zât mühtediye Cemile Hatun bt. Abdullah evvelen şifâhen sâdır olan fermân-ı âlîlerine imtisâlen Çarşamba günü huzûr-ı hazret-i Fetvâ-penâhî’de ve ba‘dehû bâb-ı cenâb-ı müşârün-ileyhde İstanbul kādıları dâ‘îlerine tahsîs buyurulan dâirede ma‘kūd meclis-i şer‘-i münîrde İstanbul’da Büyükyeni Han sarrâflarından derûn-ı arzuhâlde mastûrü’l-ism Tophâneli Artin v. Melkon zimmî muvâcehesinde ben kable’l-hidâye <> Nasrâniye iken mersûm Artin zimmî ile beher şehr yüzer guruş ücret mukāvelesiyle bin iki yüz elli bir senesi Muharremi’l-harâm’ı gurresinden elli beş senesi Zilhiccetü’ş-şerîfesi gāyetine gelince medîne-i Üsküdar’a muzâfe Kandilli karyesinde vâki‘ menzilinde zevcesi Fulyana Nasrâniyeye beş sene müddet hizmet ve ba‘dehû müfârakat etmemle müddet-i mezkûrede zimmetinde müctemi‘ altı bin guruş ecr-i müsemmâmın ancak yüz guruşunu bana edâ edip bâkīsi olan beş bin dokuz yüz guruşu ve mâlım olup hîn-i müfârakatimde menzil-i mezkûrda sarrâf-ı mersûm yedinde kalan mecmû‘u üç bin guruş kıymetli tek taşlı bir elmas yüzük ve bir neftî çuka ferâce ve bir yaşmak ve bir tülbent incilik ve iki yazma yemeni ve bir çift çedik [çetik] ma‘a papuç ve iki sagīr ve kebîr fes ve bir çukaya kaplı nîm semmûr kürk ve bir penbe çukaya kaplı nîm Bosna nâfesi kürk ve bir Selîmiye entari ma‘a şalvar ve bir gülmez entari ve iki canfes şalvar ve bir İngiliz şalı ve yün memlû bir basma yasdık ve penbe memlû iki basma yüz yastığı ve bir basma yorgan ve yün memlû bir Rusya-kârî döşek ve bir canfes hırkamı dahi mersûm Artin zimmîden hâlâ taleb ederim deyü tasaddî eylediğim da‘vâlarımdan bâ-tavassut-ı muslihîn sarrâf-ı mesfûr ile an-inkârin kat‘an-li’n-nizâ‘ 250 guruş üzerine bi’t-terâzî ba‘de-akdi’l-musâlaha ve’l-kabûl bedel-i sulh-ı mezkûrdan mâ‘adâ ziyâde müdde‘âlarıma ve bi’l-cümle husûs-ı mezkûra ve işbu târih-i i‘lâma gelince sâir cemî‘ hukūk-ı şer‘iyeye müte‘allika âmme-i de‘âvîden mersûm Artin zimmî ile zevcesi mersûme Fulyana Nasrâniyenin zimmetini kabûle mukārin ibrâ-i âmm-ı sahîh-i şer‘î ile ibrâ ve iskāt eyledim deyü ba‘de’l-ikrâr ve’t-tasdîk ibrâdan müstesnâ bedel-i sulh-ı mezkûr iki yüz elli guruşu müdde‘iye-i mezbûre Cemile Hatun’a bi’t-taleb edâ ve teslîme mersûm Artin zimmîye tenbîh olunduğu huzûr-ı âlîlerine i‘lâm olundu. Fî 24 R sene [1]258