İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 352 Hüküm no: 306 Orijinal metin no: [112-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Oturakçı Mustafa Ağa’nın alacağının tahsili 2160 [guru]ş tecîl [Ma‘rûz] Sâhib-i arzuhâl Ispartalı Oturakcı Mustafa Ağa b. Abdullah meclis-i şer‘-i münîrde derûn-ı arzuhâlde mezkûrü’l-ism Berber Mehmed Emin Ağa b. Ömer muvâcehesinde benim mezbûr Mehmed Emin Ağa’nın yeğeni süvârî sipâhî yüzbaşılarından gāib ani’l-beled Mehmed Esad Ağa b. Mehmed Said zimmetinde yedime verdiği sene-i sâbıkā şehri Ramazani’l-mübâreki gurresi târihiyle müverrah işbu bir kıt‘a deyn tahvîli mantûkunca cihet-i karzdan iki bin beş yüz guruş alacak hakkım olup meblağ-ı mezkûra işbu hâli mezbûr Mehmed Emin Ağa târih-i merkūmda tarafeynden bi’l-emr ve’l-kabûl kefâlet-i mutlaka ile kefîl ve zâmin olup ve kefâletini hâmiş-i tahvîl-i mezkûra tahrîr ettikden sonra üç yüz yirmi guruşunu bana edâ etmekle mâ‘adâsı olan iki bin yüz seksen guruş zimmetinde bâkī kalmış idi lâkin meblağ-ı bâkī-i merkūmun hâlen ve def‘aten bana edâya kudreti olmamağla işbu târih-i i‘lâmdan beher şehr altmışar guruşdan otuz altı ayda iki bin yüz altmış guruş ve yirmi guruşunu dahi otuz altı ay on gün mürûrunda tamamen bana edâ ve teslîm etmek üzere kefîl-i mezbûr Mehmed Emin Ağa’yı tecîl ve taksît eylediğimde ol dahi kabûl ve ber-minvâl-i meşrûh edâ-i deyne ta‘ahhüd edip bu vechile kat‘-ı münâza‘a eyledik deyü ikrâr ve tasdîkleri tescîl ve İstanbul Mahkemesi’nden huzûr-ı [âlîlerine i‘lâm olundu] Fî 5 Ca sene 1258