İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 353 Hüküm no: 307 Orijinal metin no: [112-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Alacak talebinden vazgeçme 2639,5 [guru]ş meccânen fâriğ [Ma‘rûz] Şekerci esnâfından derûn-ı arzuhâlde mezkûrü’l-ism Süleyman Ağa b. Ahmed meclis-i şer‘-i münîrde yine esnâf-ı mezkûreden sâhib-i arzuhâl Ali Ağa b. Osman muvâcehesinde gāibûn ani’l-meclis ma‘lûmü’l-esâmî tüccâra, mezbûr Ali Ağa’nın deyni olup bi-şarti’r-rücû‘ emriyle bi-hükmi’l-kefâleti bâ-i‘lâm edâ eylediğim dört bin dokuz yüz on dört buçuk guruşdan bâkī bi’l-mürâca‘a mezbûr Ali Ağa zimmetinde alacağım olan iki bin altı yüz otuz dokuz buçuk guruşu mezbûr Ali Ağa’dan hâlâ taleb ederim deyü tasaddî eylediğim da‘vâmdan rızâmla meccânen fâriğ olmamla bi’l-cümle husûs-ı mezkûra ve işbu târih-i i‘lâma gelince sâir cemî‘ hukūk-ı şer‘iyeye müte‘allika âmme-i de‘âvîden tarafeynden her birimiz âharın zimmetini kabûlümüzü hâvî ibrâ-i âmm-ı sahîh-i şer‘î ile ibrâ ve iskāt edip bu vechile kat‘-ı münâza‘a eyledik deyü ikrâr ve tasdîkleri tescîl ve İstanbul Mahkemesi’nden huzûr-ı [âlîlerine i‘lâm olundu] Fî 2 Ca sene 1258