Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 465 Hüküm no: 553 Orijinal metin no: [91b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Cemile bt. Resul’ün Mustafa b. Halil’den boşandığı Vilâyet-i Anadolu’da Hanlıca? kazâsına tâbi‘ Yalak nâm karye sâkinelerinden Cemile bt. Resul nâm hâtun tarafından husûs-ı âti’l-beyâna vekîl olduğu zâtı ma‘rifet-i şer‘iyye ile ârifân olup karye-i mezbûr ahâlîsinden Mustafa b. Abdullah ve Halil b. Mahmud nâm kimesneler şehâdetleri ile şer‘an sâbit olan li ebeveyn karındaşı Mustafa nâm kimesne meclis-i şer‘-i şerîf-i enverde müvekkile-i mezbûrenin zevc-i mutallıkı bâ‘isü hâze’l-kitâb Mustafa b. (…) [Halil?] mahzarında bi’l-vekâle ikrâr ve takrîr-i kelâme edip mezbûr Mustafa kız karındaşım mezbûre Cemile’yi bâyinen tatlîk etmekle zimmetinde mütekarrir ve ma‘kūdun-aleyh olan sekiz bin akçe mehr-i müecceli ile bi’t-terâzî ta‘yîn olunan üç yüz akçe nafaka-i iddet-i mu‘ayyene ve me’ûnet-i süknâsı mukābelesinde mezbûr Mustafa emlâkinden olup karye-i mezbûrede vâki‘ müvekkilim mezbûr Cemile yedinden mazbûta olan bir re’s kara sığır öküzü ve bir re’s kara sığır ineği ve bir sagīr kazgan ve bir tava ve üç sahan ve iki saban demiri ve beynimizde ma‘lûm bir demir zincir verip ben dahi eşyâ-i mezkûreyi mehr-i mezbûr ve nafaka-i iddet ve me’ûnet-i süknâsından müctemi‘ meblağ-ı mezbûr mukābelesinde kabûl edip hukūk-ı zevciyyete müte‘allika âmme-i da‘vâdan her birimiz âharın zimmetini bi’l-asâle ve bi’l-vekâle ibrâ-i kātı‘ü’n-nizâ‘la ibrâ ve iskāt eyledik dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’l-hâmis ve’l-ışrîn min Şa‘bâni’l-mu‘azzam li sene seb‘a ve seb‘în ve elf. Şuhûdü’l-hâl: Mustafa b. Halil, Mustafa b. Mehmed, Mahmud b. Şaban, Ahmed Beşe b. Ali.