İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 353 Hüküm no: 308 Orijinal metin no: [113-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Lekeci dükkânına yapılan müdahalenin men edilmesi Lekeci dükkânı keşfi Ma‘rûz İstanbul’da Sultan Bâyezid Han Câmi‘-i şerîfi avlusunda Kürkçüler kapısı dâhilinde vâki‘ mukaddemâ bâ-irâde-i seniyye berber dükkânına tebdîl olunan bir bâb lekeci dükkânı derûnundan müstahlas ve mevcûde beyne’l-esnâf gedik ta‘bîr olunur Evkāf-ı Haremeyn-i Muhteremeyn müstegallâtından âlât-ı lâzıme-i ma‘lûmeye bâ-temessük-i mütevellî bi’l-icâreteyn müstakıllen mutasarrıf olup gedik-i mezkûru mahzûrdan sâlim mahâll-i âhara nakl birle icrâ etmek üzere kendine izin ve ruhsat-ı âlî erzân buyurulan sâhib-i arzuhâl Lekeci es-Seyyid Süleyman Ağa b. İbrahim hâlâ zevcesi mu‘arrefetü’z-zât Hanife Hatun bt. Hüseyin ve bâ-irâde-i seniyye hazîne-i evkāf-ı mezkûre tarafından idâre olunan merhûm Ferhad Paşa Vakfı’nın bi’l-meşrûta hâlâ mütevellîsi müderrisîn-i kirâmdan Derviş Beyzâde el-Hâc Mehmed Said Beyefendi tarafından mürsel câbî-i vakf es-Seyyid Mehmed Emin Efendi bir mahâlde hâzır oldukları hâlde bi’l-ma‘iyye rü’yete memûr evkāf müfettişi İstanbul pâye-i celîlesiyle mübâhî izzetlü fazîletlü es-Seyyid Mehmed Emin Âsaf Beyefendi hâzır olduğu hâlde Çarşamba günü huzûr-ı hazret-i Fetvâ-penâhî’de ma‘kūd meclis-i şer‘-i münîrde câmi‘-i şerîf-i mezkûr civârında Eminbey mahallesinde Parmakkapı’nın sağ cânibinde beylik fırın tarafına giden Çatalhan sokağı denmekle arîf tarîk-i âm üzerinde kâin dekâkin mutasarrıflarından derûn-ı arzuhâlde mezkûriyyü’l-ism Lekeci Hüseyin Ağa ve Ali Ağa ibney Abdurrahman ve Na‘lçacı İbrahim b. Hasan nâm kimesneler ile eskici haffâf esnâfından Manuk v. Atam ve Papasoğlu İstani v. Ligori ve Asvador v. Karabet ve Kozma v. Marat nâm zimmîler muvâcehelerinde mûmâ-ileyh Ferhad Paşa Vakfı müsakkafâtından tarîk-i âmm-ı mezkûr üzerinde eskici ve muhallebici dükkânları beynlerinde kâin zevcem hâzıra-i mezbûre Hanife Hatun ile bâ-temessük-i mütevellî bi’l-icâreteyn münâsafeten mutasarrıf olduğumuz âhar gedikden ârî terbî‘an yirmi altı zirâ‘ vakıf arsa üzerine bâ-izn-i mütevellî teberru‘an li’l-vakf kendi mâlımızdan nizâmı üzere altı zirâ‘ kaddinde bir bâb Lekeci dükkânı binâ ve inşâ murâd eylediğimizden mâ‘adâ ben mutasarrıf olduğum gedik-i merkūmu zevcem hâzıra-i mezbûre izniyle dükkân-ı mezkûra vaz‘ ve derûnunda lekecilik icrâ etmek murâd eylediğimde mezbûrûn Hüseyin Ağa ve Ali Ağa ve İbrahim ve mersûmûn Manuk ve İstani ve Asvador ve Kozma zimmîler bî-vech mümâna‘at etmeleriyle suâl olunup ber-vech-i muharrer mümâna‘atları men‘ ü def‘ olunmak matlûbumuzdur deyü zevcesi hâzıra-i mezbûre ve mütevellî vekîl-i hâzır-ı mezbûr es-Seyyid Mehmed Emin Efendi ile mâ‘an da‘vâ ve istid‘â ettiklerinde onlar dahi cevâblarında zevcân-ı mezbûrân ber-vech-i muharrer lekeci dükkânı binâ edip ve mezbûr es-Seyyid Süleyman Ağa dükkân-ı mezkûrda lekecilik eylediği sûretde tarîk-i mezkûr atik olduğundan mezbûr es-Seyyid Süleyman Ağa lekelerini izâle edip dükkân-ı mezkûra ta‘lîk edeceği elbise ve eşyâ-i sâire ve [sâir] mâddenin baş ve omuzlarına dokunup müte’ezzî olacakları ihtimâli olduğundan mümâna‘at ederiz dediklerinde istikşâf-ı hâl için taraf-ı dâ‘îlerinden irsâl olunan müderrisîn-i kirâmdan Kâtib Abdülkerim Efendi ve müfettiş-i mûmâ-ileyh tarafından mürsel Kâtib es-Seyyid Abdüssamed İsmet Efendi ebniye-i hâssa müdîri efendi bendeleri hulefâsından Mehmed Necib ve Mehmed Salih halîfeler ile arsa-i mezkûre üzerine varıp tarafeyn ve mütevellî vekîl-i mezbûr hâzır oldukları hâlde bi’l-ma‘iyye keşf ve mu‘âyene ettiklerinde önünde olan tarîk-i âm halîfetân-ı mezbûrân misâhalarıyla dört zirâ‘ on sekiz parmak arzında olup dükkân-ı mezkûr altı zirâ‘ kaddinde binâ olunup ber-vech-i muharrer elbise ve eşyâ-i sâire ta‘lîk olunduğu sûretde kimesneye isâbet etmeyeceği altı zirâ‘ irtifâ‘a vaz‘ ettikleri bir ağaç sırığa ta‘lîk ettikleri bir takım elbiseden zâhir olup dükkân-ı mezkûr binâsında bir mahzûr-ı şer‘î olmadığını tahkīk ettiklerini mahâlline ketb ü tahrîr ve mâ‘an meb‘ûs ümenâ-i şer‘le Çarşamba günü huzûr-ı hazret-i Fetvâ-penâhî’de müfettiş-i mûmâ-ileyh tarafından meb‘ûs Mehmed İzzet Efendi hâzır olduğu hâlde akd olunan meclis-i şer‘-i hatîre gelip tarafeyn muvâcehelerinde mütevellî vekîl-i mezbûr ve halîfetân-ı merkūmân hâzır oldukları hâlde alâ-vukū‘ihî inhâ ve takrîr ve halîfetân-ı mezbûrân dahi husûs-ı mezkûra ihrâc eyledikleri resmi ibrâz ve irâe ve tarafeyn dahi tasdîk etmeğin mûcebiyle mezbûrûn Hüseyin Ağa ve Ali Ağa ve İbrahim ve mersûmûn Manuk ve İstani ve Asvador ve Kozma zimmîlere müdde‘iyân-ı zevcân-ı mezbûrân es-Seyyid Süleyman Ağa ve Hanife Hatun’un ber-minvâl-i muharrer dükkân binâlarına mümâna‘at ettirilmeyip dükkân-ı mezkûru binâ ve inşâ ettiklerinde mezbûr es-Seyyid Süleyman Ağa’nın yedinde olan gedik-i merkūmun atik temessüğü battal hıfz birle gedik-i mezkûr mahâll-i evvelinin kaydı terkīn ve mahâll-i sânî-i mezkûrda mu‘teber ve müstekarr olarak defter-i vakf-ı şerîfe kayd ve taraf-ı vakfdan müceddeden mezbûr es-Seyyid Süleyman Ağa yedine bir kıt‘a temessük i‘tâsı menût-ı re’y-i âlîleri idiği İstanbul Mahkemesi’nden huzûr-ı [âlîlerine i‘lâm olundu] Fî 2 Ca sene [1]258