İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 355 Hüküm no: 309 Orijinal metin no: [113-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bakkal Sava’nın alacağının tahsili 8008,5 [guru]ş hüküm [Ma‘rûz] İstanbul’da Şehremîni kurbünde Deniz Abdal mahallesinde bakkāl olup arzuhâl eden Sava v. Tegofiyoş zimmî meclis-i şer‘-i münîrde dergâh-ı mu‘allâ kapıcıbaşılarından derûn-ı arzuhâlde mezkûrü’l-ism Mehmed Ramiz Bey b. el-müteveffâ Ali Namık Paşa tarafından husûs-ı âti’l-beyânda vekîl olduğu el-Hâc Hüseyin Ağa b. el-Hâc Abdurrahman ve Mehmed Ağa b. Mehmed nâm kimesneler şehâdetleriyle sâbit olan teba‘adan Ömer Ağa b. Receb muvâcehesinde müvekkil-i mûmâ-ileyh es-Seyyid Mehmed Ramiz Bey’in zimmetinde mâlımdan ve yedimden iştirâ ve kabz eylediği bakkāl emti‘ası semeninden gayrı ez-teslîmât sahhe’l-bâkī sekiz bin beş yüz buçuk guruş on dört para alacak hakkım olup hattâ meblağ-ı bâkī-i mezkûr cihet-i merkūmeden zimmetinde bana deyni olduğunu sene-i sâbıkā Recebi’l-müreccebinin on birinci günü ikrâr ve târih-i i‘lâm-ı merkūm ile müverrah işbu bir kıt‘a pusulayı dahi yedime i‘tâ ettikden sonra beş yüz guruşunu bana edâ etmekle bâkīsi olan sekiz bin sekiz buçuk guruş on dört parayı dahi müvekkil-i mîr-i mûmâ-ileyhden hâlâ taleb ederim deyü da‘vâ ettikde vekîl-i mezbûr Ömer Ağa dahi cevâbında müdde‘î-i mersûmun ber-vech-i muharrer müdde‘âsını bi-tamamihi ikrâr ü i‘tirâf etmeğin mûcebince meblağ-ı bâkī-i mezbûr sekiz bin sekiz buçuk guruş on dört paranın müdde‘î-i mersûm Sava zimmîye edâsıyla müvekkil-i mûmâ-ileyh Mehmed Ramiz Bey’e izâfetle vekîl-i mezbûr Ömer Ağa ilzâm olunduğu huzûr-ı [âlîlerine i‘lâm olundu] Fî 2 Ca sene [1]258