İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 355 Hüküm no: 310 Orijinal metin no: [113-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tacir İbrahim’in alacaklarının tahsili 800 [guru]ş hüküm [Ma‘rûz] Derûn-ı takrîrde ismi mezkûr İran tüccârından el-Hâc İbrahim b. el-Hâc Nebi meclis-i şer‘-i münîrde kezâlik derûn-ı takrîrde isimleri mastûr şahısları mu‘arrefeler olan Anna bt. Agop ve Karyana bt. Samak Nasrâniyeler muvâcehelerinde mersûmetândan mesfûre Anna Nasrâniye zimmetinde işbu târih-i i‘lâmdan bir sene mukaddem mâlımdan ve yedimden iştirâ ve kabz eylediği Acemkârî bir fermâyiş şalı semeninden sekiz yüz guruşdan bâkī iki yüz guruş ve mersûme Karyana Nasrâniye zimmetinde dahi kezâlik mâlımdan ve yedimden iştirâ ve kabz eylediği yine Acemkârî bir fermâyiş semeninden dokuz yüz guruşdan bâkī altı yüz guruş ki cem‘an alacak hakkım olan sekiz yüz guruşu mersûmetân Anna ve Karyana Nasrâniyelerden hâlâ taleb ederim deyü ba‘de’d-da‘vâ ve’l-ikrâr mûcebiyle meblağ-ı mecmû‘-ı merkūm sekiz yüz guruşun müdde‘î-i mezbûr el-Hâc İbrahim’e edâsıyla mesfûretân Anna ve Karyana Nasrâniyeler ilzâm olundukları İstanbul Mahkemesi’nden huzûr-ı [âlîlerine i‘lâm olundu] Fî 2 Ca sene 1258