İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 357 Hüküm no: 312 Orijinal metin no: [114-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ütücü Mıgırdıç’ın alacaklarının tahsili 7000 [guru]ş hüküm [Ma‘rûz] Ütücü Esnâfından arzuhâl sâhibi Mıgırdıç v. Parsih zimmî bi’l-ma‘iyye rü’yete memûr evkāf müfettişi İstanbul pâye-i celîlesiyle mübâhî izzetlü fazîletlü es-Seyyid Mehmed Emin Âsaf Beyefendi tarafından meb‘ûs Mehmed İzzet Efendi hâzır olduğu hâlde Çarşamba günü huzûr-ı hazret-i Fetvâ-penâhî’de ma‘kūd meclis-i şer‘-i münîrde yine esnâf-ı mezkûreden zikri âtî vakıf gedik âlâtlarının nısf hisse-i şâyi‘alarına bâ-temessük-i mütevellî bi’l-icâreteyn mutasarrıflar ve vaz‘-ı yedleri mütehakkık olan derûn-ı arzuhâlde isimleri mezkûr İsmail Ağa b. Mustafa ve es-Seyyid Halil Ağa b. Mehmed muvâcehelerinde merhûm ve mağfiret-nişân Sultan Mustafa Han -tâbe serâhû- hazretlerinin İstanbul’da Laleliçeşme civârında vâki‘ câmi‘-i şerîfi ve imâret-i âmiresi vakf-ı şerîfinin kāimmakām-ı mütevellîsi ecille-i ricâl-i Devlet-i aliyyeden hâlâ Evkāf Nâzırı atûfetlü semâhatlü Numan Mahir Beyefendi taraflarından mürsel vekîl-i şer‘îleri teba‘adan Halil Ağa b. Mahmud hâzır olduğu hâlde vakf-ı şerîf-i mezkûr müstegallâtından İstanbul’da Kalpakçılarbaşı’nda Baltacı Hân’ı derûnunda kâin bir bâb ütücü dükkânı derûnunda mevcûde beyne’l-esnâf gedik ta‘bîr olunur vakıf âlât-ı lâzıme-i ma‘lûmenin nısf hisse-i şâyi‘asına esnâf-ı mezkûreden Avanis ve Takfor veledey Gabril v. Mıgırdıç nâm zimmîler bâ-temessük-i mütevellî bi’l-icâreteyn seviyyen mutasarrıflar iken mersûmân Avanis ve Takfor zimmîler ber-vech-i muharrer mutasarrıf oldukları nısf hisse-i şâyi‘a-i gedik-i merkūmu bin iki yüz kırk iki senesi Zilhiccetü’ş-şerîfesinin yirmi üçüncü günü altı bin guruş bedel-i makbûz mukābelesinde bana bâ-re’y-i mütevellî kat‘iyyen fâriğ olmuşlar iken bu esnâda bilâ-veled hâlik olduklarından mezbûr İsmail Ağa nısf hisse-i şâyi‘a-i mezkûreyi bi-gayrı hakkın fuzûlî zabt ve vaz‘-ı yed ve yine vakf-ı şerîf-i mezkûr müstegallâtından İstanbul’da Çarşı-yı Kebîr’de Câmi‘li Han derûnunda kâin bir bâb ütücü dükkânı derûnunda mevcûde beyne’l-esnâf gedik ta‘bîr olunur vakıf âlât-ı lâzıme-i ma‘lûmenin nısf hisse-i şâyi‘asına bâ-temessük-i mütevellî bi’l-icâreteyn mutasarrıf olan kezâlik esnâf-ı mezkûreden Artin v. İstefan v. Karabet nâm zimmî dahi nısf hisse-i şâyi‘a-i merkūmeyi bin iki yüz kırk altı senesi Zilka‘detü’ş-şerîfesinin yedinci günü kezâlik altı bin guruş bedel-i makbûz mukābelesinde bana bâ-re’y-i mütevellî kat‘iyyen fâriğ olmuş iken mersûm Artin zimmî dahi kezâlik bilâ-veled hâlik olduğundan mezbûr es-Seyyid Halil Ağa hisse-i mezkûra fuzûlî zabt ve vaz‘-ı yed etmeleriyle suâl olunup keff-i yedlerine tenbîh olunmak murâdımdır deyü da‘vâ ettikde onlar dahi cevâblarında hâlikân-ı mersûmân Avanis ve Takfor zimmîler sağlıklarında ber-vech-i muharrer mutasarrıf oldukları nısf hisse-i şâyi‘a-i gedik-i merkūmu sâlifü’l-beyân bin iki yüz kırk iki senesi Zilhiccesinin yirmi üçüncü günü târihinde müdde‘î-i mersûm Mıgırdıç zimmîye cihet-i karzdan üç bin guruş deynleri mukābelesinde bâ-re’y-i mütevellî vefâen fâriğler olup ve hâlik-i mesfûr Artin zimmî dahi sağlığında vech-i muharrer üzere mutasarrıf olduğu nısf hisse-i şâyi‘a-i mezkûreyi mârrü’z-zikr bin iki yüz kırk altı senesi Zilka‘desinin yedinci günü târihinde müdde‘î-i mesfûra kezâlik cihet-i karzdan dört bin guruş deyni mukābelesinde bâ-izn-i mütevellî vefâen fâriğ olup ba‘dehû her biri bilâ-veled hâlik olduklarından vakf-ı müşârün-ileyhin bâ-hatt-ı hümâyûn düstûrü’l-amel olan şurûtu mûcebince deyn-i merkūmlar cânib-i vakfdan müdde‘î-i mersûma tamamen verilmek üzere nısf hisse-i şâyi‘a-i gedik-i merkūmlar mahlûl ve cânib-i vakf-ı mezkûra âid olup ve ferâğ-ı mezkûrlar minvâl-i meşrûh üzere vefâen olduğunu müdde‘î-i mersûm Mıgırdıç zimmî işbu târih-i i‘lâm şehrinin on dokuzuncu günü müfettiş-i mûmâ-ileyh huzûrunda tâyi‘an ikrâr ü i‘tirâf ettikde hâlikân-ı mersûmân Avanis ve Takfor zimmîlerin mahlûl olan nısf-ı hisse-i şâyi‘a-i merkūmeleri sekiz bin guruş mu‘accele-i makbûza ve icâre-i müeccele-i kadîmesiyle mezbûr İsmail Ağa bana ve hâlik-i mesfûr Artin zimmînin dahi mahlûl olan nısf hisse-i şâyi‘a-i merkūmesi altı bin yedi yüz elli guruş mu‘accele-i makbûza ve icâre-i müeccele-i kadîmesiyle mezbûr es-Seyyid Halil Ağa bana bâ-temessük cânib-i vakf-ı mezkûrdan îcâr ve tefvîz olunmağla bi-hakkın vaz‘-ı yed ederiz deyü kāimmakām-ı mütevellî vekîli hâzır-ı mezbûr Halil Ağa tasdîkiyle eyledikleri def‘lerini müdde‘î-i mersûm Mıgırdıç zimmî inkâr etmekle mezbûrân İsmail Ağa ve es-Seyyid Halil Ağa müdde‘î-i mersûmun ikrâr-ı meşrûhunu her biri mahâllinden lede’t-tezkiye makbûlü’ş-şehâde idikleri ihbâr olunan esnâf-ı mezkûreden Haçador v. Karabet ve Artin v. Ohannes ve Avadis v. Manuk ve Simaven v. Agop ve Avanis v. Abram ve Parsih v. Barsam ve Ohan v. Kasbar ve Ohannes v. Karabet ve Agop v. Ohannes ve Sotiri v. Yorgi Dimitri v. Nikola nâm zimmîler şehâdetleriyle huzûr-ı cenâb-ı Fetvâ-penâhî’de bi’l-muvâcehe vech-i şer‘î üzere isbât etmeğin mûcebiyle müdde‘î-i mersûm Mıgırdıç zimmî da‘vâ-yı mezkûresiyle mezbûrân İsmail Ağa ve es-Seyyid Halil Ağa’ya bî-vech-i şer‘î mu‘ârazadan men‘ olundukdan sonra müdde‘î-i mersûm Mıgırdıç zimmî hâlikûn-ı mersûmûnun kendine ber-vech-i muharrer deynleri olan cem‘an yedi bin guruşun ber-mûceb-i şurût-ı vakf-ı müşârün-ileyh cânib-i vakfdan kendine usûlü üzere i‘tâsını istid‘â ve istirhâm eylediği İstanbul Mahkemesi’nden huzûr-ı [âlîlerine i‘lâm olundu] Fî 28 R sene 1258