İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 358 Hüküm no: 313 Orijinal metin no: [114-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bayezid b. Hayrullah’ın alacaklarının tahsili 400 [guru]ş sulh [Ma‘rûz] Sâhib-i arzuhâl Arnavud Bâyezid b. Hayrulah meclis-i şer‘-i münîrde Kapan-ı dakīk tüccârından iken bundan akdem fevt olan Musa Yazıcı b. Mehmed Emin b. Abdullah’ın sulbî kebîr oğlu ve terekesine vaz‘-ı yedi zâhir olan derûn-ı arzuhâlde mezkûrü’l-ism Mehmed Emin Ağa muvâcehesinde müteveffâ-yı mezbûr Musa Yazıcı b. Mehmed Emin b. Abdullah hayatında İstanbul’da Çarşambapazarı civârında Mehmed Ağa mahallesinde vâki‘ mülküm olan ma‘lûmü’l-hudûd beş horoslu bir bâb ekmekçi değirmeni derûnunda mevcûde beyne’l-esnâf gedik ta‘bîr olunur yirmi re’s bârgir ve onlara isâbet eden sâir âlât-ı lâzıme-i ma‘lûme ve değirmen-i mezkûra merbût yine mahalle-i mezkûrede vâki‘ kezâlik mülküm olan ma‘lûmü’l-hudûd bir bâb habbâz fırını derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmeden beher şehr yüzer guruş kirâ ile bin iki yüz kırk dört senesi Muharremi gurresinden bin iki yüz kırk yedi senesi şehri Ramazani’l-mübâreki gāyetine değin kırk beş ay müddet müstecirim olup kirâ-i mezkûreden müddet-i mezkûrede zimmetinde müctemi‘a dört bin beş yüz guruşu bana kable’l-edâ fevt olmağla meblağ-ı müctemi‘-i merkūm dört bin beş yüz guruşu mezbûr Mehmed Emin Ağa’nın vâzı‘ü’l-yed olduğu babası müteveffâ-yı mezbûrun tereke-i vâfiyesinden hâlâ taleb ederim deyü tasaddî eylediğim da‘vâmdan bâ-tavassut-ı muslihîn mezbûr ile an-inkârin kat‘an-li’n-nizâ‘ dört yüz guruş bedel-i makbûza bi’t-terâzî ba‘de-akdi’l-musâlaha ve’l-kabûl ziyâde müdde‘âma ve bi’l-cümle husûs-ı mezkûra ve işbu târih-i i‘lâma gelince sâir cemî‘ hukūk-ı şer‘iyeye müte‘allika âmme-i de‘âvîden ben müteveffâ-yı mezbûr Musa Yazıcı ile oğlu mezbûr Mehmed Emin Ağa ve gāibûn ani’l-meclis müteveffâ-yı mezbûrun zevce-i menkûha-i metrûkesi Ümmügülsüm Hatun bt. Salih ve vâlidesi Fatıma Hatun bt. Ömer’in zimmetlerini kabûle mukārin ibrâ-i âmm-ı sahîh-i şer‘î ile ibrâ ve iskāt edip bu vechile külliyen kat‘-ı nizâ‘ eyledik deyü ikrâr ve tasdîkleri tescîl ve İstanbul Mahkemesi’nden huzûr-ı [âlîlerine i‘lâm olundu] Fî 4 Ca sene 1258