İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 359 Hüküm no: 314 Orijinal metin no: [115-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Hurşid Efendi’nin borçlarını ödemesi 65621 [guru]ş hüküm [Ma‘rûz] Medîne-i Üsküdar’da vâki‘ Selîmiye Kışlak-ı Hümâyûnu ebniyesinin bin iki yüz elli altı ve elli yedi senelerinde ta‘mîrât müdîri olan derûn-ı arzuhâlde mezkûrü’l-ism Mehmed Hurşid Efendi b. Abdullah’dan ashâb-ı arzuhâl olup mezbûrun ta‘mîr eylediği ebniye-i mezkûrede kendi ile ücret-i ma‘lûme mukāvelesiyle bir müddet eylediği nakkāşlık ecr-i müsemmâsından ve ebniye-i mezkûre için mâlından iştirâ ve kabz eylediği ma‘lûmü’l-mikdâr ve’l-fiyât elvân boya semeninden on dört bin beş yüz altmış bir guruş iddi‘â eden Nakkāş Osman Ağa b. Mehmed ve kezâlik bir müddet eylediği horasancılık [ecr-i] müsemmâsından bin elli yedi guruş iddi‘â eden Horasancı Ahmed b. Mehmed nâm kimesneler ile kezâlik bir müddet eylediği sıvacılık ecr-i müsemmâsından yedi bin sekiz yüz kırk guruş iddi‘â eden Sıvacı Kosti v. Vasil ve kezâlik bir müddet eylediği neccârlık ecr-i müsemmâsından beş bin dört yüz kırk sekiz guruş iddi‘â eden dülger kalfalarından Aci Dimitri v. Anesti ve kezâlik bir müddet eylediği hamamcılık ecr-i müsemmâsından beş bin iki yüz yirmi guruş iddi‘â eden Hamamcı Artin v. Presil? ve kezâlik bir müddet eylediği neccârlık ecr-i müsemmâsından on bin dokuz yüz seksen iki guruş iddi‘â eden dülger kalfalarından Filip v. Hıristo ve kezâlik bir eylediği hamamcılık ecr-i müsemmâsından bin üç yüz altmış beş guruş iddi‘â eden Hamamcı Danyal v. Kirkor ve kezâlik bir müddet eylediği rençberlik ecr-i müsemmâsından dört bin yedi yüz yetmiş bir guruş iddi‘â eden Rençber Manik v. Avanis ve kezâlik bir müddet eylediği ırgadbaşılık ecr-i müsemmâsından bin beş yüz [guruş] iddi‘â eden Irgadbaşı Anparson v. Artin ve kezâlik bir müddet eylediği silicilik ecr-i müsemmâsından dört yüz yirmi guruş iddi‘â eden Silici Dimitri v. Yani ve kezâlik bir müddet eylediği duvarcılık ecr-i müsemmâsından üç bin yüz seksen beş guruş iddi‘â eden Duvarcı Dimo v. Hıristo ve kezâlik bir müddet eylediği silicilik ecr-i müsemmâsından iki bin beş yüz bir guruş iddi‘â eden Silici Sotiri v. Andon ve ebniye-i mezkûre için mâlından iştirâ ve kabz eylediği ma‘lûmü’l-mikdâr taş semeninden dokuz yüz altmış dokuz guruş iddi‘â eden Taşçı Kosti v. Tanaş ve kezâlik taş semeninden üç bin iki yüz kırk yedi guruş iddi‘â eden Taşçı Nikola v. Yorgi ve kezâlik taş semeninden iki bin dokuz yüz elli guruş iddi‘â eden Taşçı Tanaş v. Yani nâm zimmîler meclis-i şer‘-i münîrde mezbûr Mehmed Hurşid Efendi muvâcehesinde bizim mezbûr Mehmed Hurşid Efendi zimmetinde yedimize verdiği işbu birer kıt‘a pusulalar mûcebince ber-vech-i meşrûh cem‘an altmış beş bin altı yüz yirmi bir guruş alacak hakkımız olmağla meblağ-ı mecmû‘-ı merkūmu mezbûr Mehmed Hurşid Efendi’den hâlâ taleb ederiz deyü da‘vâ ettiklerinde ol dahi cevâbında cihât-ı mezkûreden minvâl-i meşrûh üzere cem‘an ol-mikdâr guruş müdde‘iyûn-ı mezbûrûna sahîhan deyni olduğunu tâyi‘an ve kat‘iyyen ikrâr u i‘tirâf etmeğin mûcebince meblağ-ı mecmû‘-ı merkūm altmış beş bin altı yüz yirmi bir guruşun müdde‘ûn-ı merkūmûna edâsıyla mezbûr Mehmed Hurşid Efendi ilzâm olunduğu İstanbul Mahkemesi’nden huzûr-ı [âlîlerine i‘lâm olundu] Fî 3 Ca sene 1258