İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 360 Hüküm no: 315 Orijinal metin no: [115-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Ağa’nın alacağının taksitlerle tahsili 5495 [guru]ş tecîl [Ma‘rûz] İran tüccârından bâ‘isü’l-i‘lâm el-Hâc Mehmed Ağa b. Ahmed meclis-i şer‘-i münîrde el-Hâc Memiş Ağa b. el-Hâc Feyzullah muvâcehesinde alacehri tüccârından Sarı Mustafa Ağa b. Osman hâzır olduğu hâlde benim hâzır-ı mezbûr Mustafa Ağa zimmetinde cihet-i deyn-i şer‘îden yedi bin dört yüz doksan beş guruş alacak hakkım olup hâzır-ı mezbûrun dahi mezbûr el-Hâc Memiş Ağa zimmetinde semen-i mebî‘-i makbûzdan yirmi bin üç yüz yetmiş guruşdan bâkī bâ-i‘lâm-ı şer‘î mahkûmün-bih yedi bin dört yüz doksan beş guruş alacağı olmağla medyûnum hâzır-ı mezbûr Mustafa Ağa beni deyn-i mezkûruyla medyûnu mezbûr el-Hâc Memiş Ağa’nın üzerine deyn-i merkūmdan edâ etmek üzere üçümüz bir meclisde iken havâle-i mukayyede-i sahîha ile havâle ve her birimiz havâle-i mezkûreyi kabûl ettiğimizden sonra mezbûr el-Hâc Memiş Ağa meblağ-ı mahkûmün-bih-i merkūmun iki bin guruşunu bana edâ etmekle mâ‘adâsı olan beş bin dört yüz doksan beş guruş zimmetinde bâkī kalmış idi lâkin meblağ-ı bâkī-i merkūmu hâlen ve def‘aten bana edâya kudreti olmamağla işbu târih-i i‘lâmdan beher üç ayda bin üçer yüz yetmiş üçer buçuk guruş onar para vermekle târih-i merkūmdan bir sene hitâmında bana tamamen edâ ve teslîm etmek üzere mezbûr el-Hâc Memiş Ağa’yı tecîl ve taksît eylediğimde ol dahi kabûl ve ber-minvâl-i muharrer edâ-i deyne ta‘ahhüd edip bu vechile kat‘-ı münâza‘a eyledik deyü ikrâr ve tasâ[dı]kları tescîl ve İstanbul Mahkemesi’nden huzûr-ı [âlîlerine i‘lâm olundu] Fî 29 R sene 1258