İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 361 Hüküm no: 316 Orijinal metin no: [115-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mirliva Mustafa Paşa’nın borcunu ödemesi 12500 [guru]ş sulh Ma‘rûz Bâ‘isü’l-i‘lâm Ayvaz David v. Karabet zimmî meclis-i şer‘-i münîrde asâkir-i muntazama-i şâhâne mirlivâlarından es-Seyyid Mustafa Paşa b. es-Seyyid Ahmed Paşa tarafından husûs-ı âti’l-beyânda vekîl olduğu Osman Efendi b. Süleyman ve Halil Ağa b. İbrahim nâm kimesneler şehâdetleriyle ber-nehc-i şer‘î sâbit olan teba‘adan Abdullah Ağa b. Halil muvâcehesinde ben müvekkil-i mûmâ-ileyh es-Seyyid Mustafa Paşa’nın beher şehr ellişer guruş ücret tesmiyesiyle bin iki yüz elli dört senesi şehri Rebî‘ülâhiri gurresinden beri ayvazlık hizmetinde olup bu esnâda müvekkil-i mûmâ-ileyhin bi-şarti’r-rücû‘ emriyle umûr-ı ma‘lûmesine mâlımdan masrûfum olan bâ-tahvîl sekiz bin guruşdan bâkī yedi bin guruş ve yine bi-şarti’r-rücû‘ emriyle bâ-defter-i müfredât mahâll-i ma‘lûme-i sâireye mâlımdan masrûfum olan sekiz bin yedi yüz guruş ve ecr-i müsemmâ-yı mezkûremden bin iki yüz elli altı senesi Zilka‘de ve Zilhicce ve işbu sene-i mübâreke şehri Rebî‘ülâhiri’nde iktizâ eden cem‘an yüz elli guruş ki min-haysü’l-mecmû‘ müvekkil-i paşa-yı mûmâ-ileyh zimmetinde alacak hakkım olan on beş bin sekiz yüz elli guruşu hâlâ taleb ederim deyü tasaddî eylediğim da‘vâmdan bâ-tavassut-ı muslihîn vekîl-i mezbûr Abdullah ile kat‘an-li’n-nizâ‘ on iki bin beş yüz guruş üzerine bi’t-terâzî ba‘de-akdi’l-musâlaha ve’l-kabûl bedel-i sulh-ı mezkûr on iki bin beş yüz guruşu dahi bana edâya bi’l-vekâle ta‘ahhüd etmekle bedel-i sulh-ı mezkûrdan mâ‘adâ ziyâde müdde‘âma ve bi’l-cümle husûs-ı mezkûra ve işbu târih-i i‘lâma gelince sâir cemî‘ hukūk-ı şer‘iye müte‘allika âmme-i de‘âvîden ben müvekkil-i mûmâ-ileyh es-Seyyid Mustafa Paşa’nın zimmetini ibrâ-i âmm-ı sahîh-i şer‘î ile ibrâ ve iskāt eylediğimde vekîl-i mezbûr dahi kezâlik husûs-ı mezkûra ve sâir cemî‘ hukūk-ı şer‘iye müte‘allika âmme-i de‘âvîden benim zimmetimi ibrâ-i âmm-ı sahîh-i şer‘î ile müvekkili mûmâ-ileyhe izâfetle bi’l-vekâle ibrâ ve iskāt ve tarafeynden her birimiz ber-vech-i muharrer âharın ibrâsını asâleten ve vekâleten kabûl edip bu vechile kat‘-ı münâza‘a eyledik deyü ikrâr ve tasdîkleri tescîl ve İstanbul Mahkemesi’nden huzûr-ı [âlîlerine i‘lâm olundu] Fî 2 Ca sene 1258