İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 362 Hüküm no: 317 Orijinal metin no: [116-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Hurşid Efendi’nin Arakil v. Kirkor’a olan borcunu ödemesi [Ma‘rûz] Hâlâ Tersâne-i âmirede çöpcübaşı olup arzuhâl eden Arakil v. Kirkor zimmî meclis-i şer‘-i münîrde medîne-i Üsküdar’da vâki‘ Selîmiye Kışlak-ı Hümâyûnu’nun mukaddemâ ta‘mîrât müdîri derûn-ı arzuhâlde ismi mezkûr Mehmed Hurşid Efendi b. Abdullah muvâcehesinde benim dülger kalfalarından gāib ani’l-meclis Serkiz v. Mıgırdıç nâm zimmî zimmetinde cihet-i deyn-i şer‘îden bâ-i‘lâm-ı şer‘î mahkûmün-bih üç bin guruş alacak hakkım olup gāib-i mersûmun dahi mezbûr Mehmed Hurşid Efendi zimmetinde ber-vech-i muharrer ta‘mîrât müdîri iken müddet-i ma‘lûmede zikr olunan kışlak-ı hümâyûn için sebkat eden dülgerlik ecr-i müsemmâsından cem‘an üç bin guruş alacağı olmağla gāib-i mersûm Serkiz zimmî beni deyn-i mezkûruyla medyûnu mezbûr Mehmed Hurşid Efendi’nin üzerine deyn-i merkūmdan edâ etmek üzere üçümüz bir meclisde iken havâle-i mukayyede-i sahîha-i şer‘iye ile havâle ve her birimiz havâle-i mezkûreyi kabûl etmemizle meblağ-ı merkūm üç bin guruşu bi-hükmi’l-havâle mezbûr Mehmed Hurşid Efendi’den hâlâ taleb ederim deyü da‘vâ ettikde ol dahi cevâbında kaziyye minvâl-i meşrûh üzere olduğunu bi-tamamihâ ikrâr ü i‘tirâf etmeğin mûcebince meblağ-ı mezkûr üç bin guruşun bi-hükmi’l-havâle müdde‘î-i mesfûr Arakil zimmîye edâya mezbûr Mehmed Hurşid Efendi ilzâm olunduğu İstanbul Mahkemesi’nden huzûr-ı [âlîlerine i‘lâm olundu] Fî 3 Ca sene 1258