Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 465 Hüküm no: 554 Orijinal metin no: [91b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hasan Paşa b. Süleyman’ın Mehmed Çavuş b. Süleyman’a olan borçlarının vârislerince ödemesi Mahmiye-i İstanbul’da Soğanağa mahallesi sükkânından olup Ser-şıkk-ı evvel defterdârı oldukdan sonra Beç seferi avdetinde Temeşvar eyâletine mutasarrıf iken maktûlen vefât eden Hasan Paşa b. Süleyman b. Himmet’in sagīr oğlu Mehmed ve sagīre kızı Fâtıma’nın, terekesinin kabz ve düyûn-ı müsbetelerin edâ ve tesviye-i emirlerine kıbel-i şer‘den vasî nasb ve ta‘yîn olunan İbrahim Efendi b. Yusuf meclis-i şer‘-i şerîf-i enverde yine mahmiye-i mezbûre Mahmud Ağa mahallesinde sâkin işbu bâ‘isü’l-kitâb Mehmed Çavuş b. Süleyman mahzarında bi’l-vesâye takrîr-i kelâm edip mezbûr Mehmed Çavuş bundan akdem Molla Gürânî mahallesinde sâkin olup cünûn-ı mutbık ile mecnûn olan İstanbul ağası Mehmed Ağa b. Hüseyin nâm müteveffânın hayâtında malını kabz ve düyûn-ı müsbetesi vârislerine edâ ve bi’l-cümle umûrunu ikāmet için kıbel-i şer‘den mansûb vasî olmağla mecnûn-ı mezbûrun cemî‘ malını kabz ve düyûn-ı müsbetesiyçün dâyinlerine edâ edip yedinde habbe kalmamışiken merkūm Hasan Paşa Şıkk-ı sânî defterdârı bulunmağla mezkûr Mehmed Çavuş ihzâr ve İzvornik vâlisi olan Osman Paşa’nın mecnûn-ı mezbûrda bin guruş alacağı vardır ve mezbûr Osman Paşa bilâ-vâris fevt olup terekesi cânib-i beytülmâle âid olsa deyû mezbûr Mehmed Çavuş haps ve kendi malından meblağ-ı mezkûru bi gayri hakkın tahsîl ve ahz u kabz eylediğini mezbûr Mehmed Çavuş benden mukaddem husûs-ı mezbûr için kıbel-i şer‘-i mergûbdan mansûb vasî olan el-Hâc Abdülkerimzâde Ebûbekir Ağa muvâcehesiyle da‘vâ ve müdde‘âsını muvâcehesinde şuhûd-ı udûl ile şer‘an isbât edip ba‘de’t-tahlîfi’l-mu‘teber müteveffâ-yı mezbûr terekesinden red ve teslîme hükm-i şer‘î lâhık ve yedine hüccet-i şer‘iyye verildikden sonra vasiyy-i mezbûr el-Hâc Ebûbekir Ağa bin doksan altı senesi Zilka‘desi’nin on beşinci günü müteveffâ-yı mezbûrun Soğan [Ağa] mahallesinde vâki‘ muhterik mülk menzili arsasından mezbûr Mehmed Çavuş yedinde olan hüccet-i şer‘iyyede hudûdu mastûr tûlen yirmi ve arzen on bi hesâb-ı terbî‘î iki yüz zirâ‘ mülk menzil arsasını ikrâr ve ba‘dehû vâzı‘ü’l-alâmet mezkûr Mehmed Çavuş semen-i misli olan her zirâ‘ı bir buçuk guruşdan üç yüz guruşa bi’l-vesâye bey‘ ve teslîm ol dahi iştirâ ve tesellüm ve zikr olunan meblağ-ı mezbûr üç yüz guruş deyn-i mezbûrdan ol mikdâr takās edip hüccet-i şer‘iyye tahrîr olunmuşiken hâlâ dahi arsa-i mezbûreden bir tarafı yine Mehmed Çavuş’un müşterâsı olan arsa ve bir tarafdan ba‘zan es-Seyyid Mustafa mülkü ve ba‘zan yine arsa-i muhterika-i mezbûr ve bir tarafı tarîk-i âm ile mahdûd tûlen ve arzen [92a] bi hesâb-ı terbî‘î üç yüz zirâ‘ arsa dahi ifrâz ve alâmet-i fâsıla vaz‘-ı ile mümtâz kılındığından sonra semen-i misli idiği şer‘an zâhir ve müte‘ayyin olan her zirâ‘ı bir buçuk guruşdan dört yüz elli guruşa bi’l-vesâye ve bi’l-ezâni’ş-şer‘î bey‘ ve teslîm ol dahi iştirâ ve kabûl ve temellük ve tesellüm eyledikden sonra semeni olan meblağ-ı mezbûr dört yüz elli guruşu deyn-i bâkī-i mezbûr yedi yüz guruşdan dört yüz elli guruşa takās ol dahi mukāssa [ve] kabûl edip deyn-i mezkûrdan bin guruşdan yedi yüz elli guruşdan müteveffâ-yı mezbûrun zimmetini berî ve arsa-i mezbûreden defâ‘atle iştirâ eylediği cem‘an beş zirâ‘ mezkûr Mehmed Çelebi’nin mülk ve hakkıdır keyfe mâ yeşâ mutasarrıf olsun dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’l-ışrîn min Şa‘bâni’l-mu‘azzam li sene seb‘a ve tis‘în ve elf. Şuhûdü’l-hâl: Ömer Efendi b. Yusuf el-İmâm, Mehmed Efendi b. Yusuf el-Müezzin, imâm İbrahim Çelebi b. Mehmed, Mi‘mâr Ahmed Beşe b. Abdullah, Veli b. Osman, es-Seyyid Mustafa b. Mahmud, el-Hâc Mehmed b. Kasım, Osman Ağa el-Mübâşir.