İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 363 Hüküm no: 318 Orijinal metin no: [116-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yahya Efendi Vakfı’na ait tevliyet görevinin yürütülmesinde çıkan anlaşmazlığın giderildiği Tevliyet nizâ‘ı [Ma‘rûz] Derûn-ı arzuhâlde mezkûretü’l-ism mu‘arrefetü’z-zât Şerife Saliha Hatun bt. Ali bi’l-ma‘iyye rü’yete memûr evkāf müfettişi İstanbul pâye-i celîlesiyle mübâhî izzetlü fazîletlü es-Seyyid Mehmed Emin Âsaf Beyefendi tarafından meb‘ûs Mehmed İzzet Efendi hâzır olduğu hâlde Çarşamba günü huzûr-ı hazret-i Fetvâ-penâhî’de ma‘kūd meclis-i şer‘-i münîrde bâ-irâde-i seniyye Hazîne-i Evkāf-ı Hümâyûn tarafından idâre olunan evkāfdan mahrûse-i Galata’ya muzâfe kasaba-i Beşiktaş’da medfûn zübde-i urefâ Yahya Efendi -kuddise sırruhû- hazretleri vakf-ı şerîfinin meşrûtiyet üzere bâ-berât-ı âlî-şân hâlâ mütevelliyesi sâhibe-i arzuhâl kezâlik mu‘arrefetü’z-zât Şerife Necibe Hatun bt. Mehmed muvâcehesinde vakf-ı mezkûrun tevliyeti kadîmden batnen ba‘de-batnin mutlaka evlâd-ı evlâd-ı vâkıfın aslah ve erşedine tevcîh olunagelip ta‘âmül vech-i meşrûh üzere olmağla bundan akdem tevliyet-i mezkûre mahlûle oldukda gerek ben ve gerek mezbûre Şerife Necibe Hatun vâkıf-ı merhûm-ı mûmâ-ileyhin evlâd-ı evlâd-ı evlâdından olup ve aslahiyet ve erşediyetde ve derecede ben mezbûre Şerife Necibe Hatun’a müsâvîye olduğuma binâen ve amel-i kadîm üzere tevliyet-i mezkûrenin nısfı bana tevcîh buyurulmak iktizâ eder iken mezbûre Şerife Necibe Hatun tevliyet-i mezkûreyi mugāyir-i amel-i kadîm müstakılleten üzerine tevcîh ve berât ettirmekle suâl olunup tevliyet-i mezkûrenin nısfı mezbûre Şerife Necibe Hatun ref‘inden bana tevcîh buyurulması murâdımdır deyü da‘vâ eylediğimde ol dahi cevâbında benim evlâd-ı evlâd-ı evlâd-ı vâkıfdan olup derecede kendine müsâviye olduğumu ikrâr ve ber-minvâl-i muharrer aslahiyet ve erşediyetimi inkâr etmekle beynimizde ba‘de vukū‘ı’l-münâza‘a el-hâletü hâzihî mezbûre Şerife Necibe Hatun benim fakr-ı hâlime merhameten tevliyet-i mezkûreden kendine olan âidâtından rızâsıyla bana beher şehr yüz yirmi beşer guruş vermeye ta‘ahhüd etmekle ben dahi râzıye olup da‘vâ-yı mezkûremden fâriğa olmamla bu vechile kat‘-ı münâza‘a eyledik dediğini mezbûre Şerife Necibe Hatun tasdîk ve tahkīk eylediği tescîl ve İstanbul Mahkemesi’nden huzûr-ı [âlîlerine i‘lâm olundu] Fî 28 R sene 1258