İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 363 Hüküm no: 319 Orijinal metin no: [116-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yanan evin tamiri için harcanan paranın iadesi 7000 [guru]ş <> ahz u kabz [Ma‘rûz] Arzuhâl eden Bakkāl Andon v. Yani zimmî bi’l-ma‘iyye rü’yete memûr evkāf müfettişi İstanbul pâye-i celîlesiyle mübâhî izzetlü fazîletlü es-Seyyid Mehmed Emin Âsaf Beyefendi tarafından meb‘ûs Mehmed İzzet Efendi hâzır olduğu hâlde bi’t-terâzî bâb-ı cenâb-ı Fetvâ-penâhî’de İstanbul kādıları dâ‘îlerine tahsîs buyurulan dâirede ma‘kūd meclis-i şer‘-i hatîrde derûn-ı arzuhâlde ismi mastûr şahsı mu‘arrefe Kadinko bt. Atam Nasrâniye muvâcehesinde İstanbul’da Edirnekapısı dâhilinde merhûme ve mağfûrun-lehâ Mihrimah Sultan -tâbe serâhâ- Câmi‘-i şerîfi karşısında vâki‘ Meydancık dükkânı demekle ma‘rûf bir bâb bakkāl dükkânı derûnunda mevcûde beyne’l-esnâf gedik ta‘bîr olunur vakıf âlât-ı lâzıme-i ma‘lûme yüz yirmi sehm i‘tibârıyla altmış sehm hisse-i şâyi‘ası benim ve diğer altmış sehm hisse-i şâyi‘ası dahi mersûme Kadinko Nasrâniyenin bâ-temessük-i mütevellî bi’l-icâreteyn taht-ı tasarrufumuzda <> ve dükkân-ı mezkûr münâsafeten taht-ı icâremizde iken dükkân-ı mezkûr mukaddemâ muhterik oldukda bin iki yüz elli altı senesi hilâlinde mesfûre Kadinko Nasrâniyenin kendi hissesinde bi-şarti’r-rücû‘ emriyle dükkân-ı mezkûrun binâ ve inşâsına mâlımdan kadr-ı ma‘rûf masrûfum olan on dört bin guruşdan mersûme Kadinko Nasrâniyenin hissesine isâbet eden yedi bin guruşun hesâbını hâlâ Nasrâniye-i mersûme ile yegân yegân sehv ü galatdan ârî hesâb-ı sahîh ve bakkāl esnâfının nizâm ustaları ma‘rifetleriyle rü’yet eylediğimizde gayrı ez-teslîmât lede’l-muhâsebe sahhe’l-bâkī mersûme Kadinko Nasrâniye zimmetinde bin elli guruş alacak hakkım zuhûr ettikde meblağ-ı merkūm bin elli guruş bana zimmetinde sahîhan deyni olduğunu kat‘iyyen ikrâr ve meblağ-ı mezkûru tamamen bana edâ ve teslîm ben dahi yedinden ahz u kabz etmemle bi’l-cümle husûs-ı mezkûra ve sâir cemî‘ hukūk-ı şer‘iye müte‘allika âmme-i de‘âvîden tarafeynden her birimiz âharın zimmetini kabûlümüzü hâvî ibrâ-i âmm-ı sahîh-i şer‘î ile ibrâ ve iskāt edip bu vechile külliyen kat‘-ı münâza‘a eyledik deyü ikrâr ve tasdîkleri tescîl ve huzûr-ı [âlîlerine i‘lâm olundu] Fî 6 Ca sene 1258