İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 364 Hüküm no: 320 Orijinal metin no: [116-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vakıf hissesinin satışı 4700 [guru]ş ahz u kabz Ma‘rûz Tarîkat-i Mevlevîye’den sâhib-i arzuhâl es-Seyyid Halil Dede b. es-Seyyid el-Hâc Mehmed Sadık Dede bi’l-ma‘iyye rü’yete [memûr] evkāf müfettişi İstanbul pâye-i celîlesiyle mübâhî izzetlü fazîletlü es-Seyyid Mehmed Emin Âsaf Beyefendi tarafından meb‘ûs Mehmed İzzet Efendi hâzır olduğu hâlde bi’t-terâzî bâb-ı cenâb-ı Fetvâ-penâhî’de İstanbul kādıları dâ‘îlerine tahsîs buyurulan dâirede ma‘kūd meclis-i şer‘-i münîrde derûn-ı arzuhâlde mastûrü’l-ism Bakkāl Dimitri v. Krope zimmî muvâcehesinde bâ-irâde-i seniyye Hazîne-i Evkāf-ı Haremeyn-i Muhteremeyn tarafından idâre olunan evkāfdan İstanbul’da vâki‘ Ayasofya-i Kebîr Câmi‘-i şerîfi Vakfı müsakkafâtından İstanbul’da Balıkpazarı kapısı hâricinde Lüleci sokağında Karaki İskelesi başında kâin ma‘lûmü’l-hudûd fevkānî ve tahtânî yirmi bâb oda ve dört bâb mağaza ve bir kayıkhâneyi müştemil şehriye iki yüz seksen yedi akçe icâre-i müecceleli bir bâb ahşâb handan bâ-temessük-i mütevellî bi’l-icâreteyn mutasarrıf olduğum şehriye on sekiz akçe icâre-i müeccele ile ol-mikdâr sehm hisse-i şâyi‘asını hüsn-i rızâ ve tayyib-i hâtırım ve ferâğ-ı mu‘teber-i kat‘î ile mersûm Dimitri zimmîye dört bin yedi yüz guruş bedel-i makbûz ve müstehlek mukābelesinde bâ-re’y-i mütevellî ferâğ ve tefvîz eylediğimde ol dahi ber-vech-i muharrer tefevvüz ve kabûl edip fî-mâ ba‘d hisse-i şâyi‘a-i mezkûrede benim aslâ ve kat‘a alâka ve medhalim kalmayıp mersûm Dimitri zimmînin dâhil-i havza-i tasarrufu olmağla bu vechile külliyen kat‘-ı münâza‘a eyledik deyü ba‘de’l-ikrâr ve’t-tasdîk mezbûr es-Seyyid Halil Dede mesfûr <> Dimitri zimmîye mâlından dört bin yedi yüz guruş idâne ve teslîm ol dahi yedinden istidâne ve kabz ve istihlâk edip meblağ-ı mezkûr zimmetinde mezbûr es-Seyyid Halil Dede’ye deyni olduğunu ikrâr ü i‘tirâf ve işbu târih-i i‘lâmdan doksan bir gün mürûrunda tamamen edâ-i deyne ta‘ahhüd ettikde mezbûr es-Seyyid Halil Dede dahi râzı olduğu tescîl ve huzûr-ı [âlîlerine i‘lâm olundu] Fî 9 Ca sene 1258