İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 369 Hüküm no: 324 Orijinal metin no: [118-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Liko v. Kiro’nun sahibi olduğu kasap gediği hissesinin bir bölümünü oğlu Kasap Mitro’ya sattığı Kasab [Ma‘rûz] Cennet-mekân adn-âşiyân Sultan Abdülhamid Han - sabbet aleyhi sicâlü’l-gufrân-hazretlerinin evkāf-ı celîleleri müstegallâtından Yedikule hâricinde kâin gayrı ez selhhâne-i mîrî on aded ganem selhhânelerinin şerâit-i mu‘teberelerine ri‘âyet şartıyla yedinci selhhâneye merbût kasab dükkânlarından mahrûse-i Galata’ya muzâfe Fındıklı kasabasında vâki‘ bir bâb ve üçüncü selhhâneye merbût mahrûse-i mezkûreye tâbi‘ Tophâne kasabasında Firuzağa nâm mahâlde vâki‘ bir bâb ve Galatasarayı kurbünde selhhâne civârında vâki‘ bir bâb ve yine kasaba-i Fındıklı’da köşe başında vâki‘ bir bâb ve Dörtyolağzı’nda vâki‘ bir bâb ve Karaki kurbünde vâki‘ bir bâb ve Beyoğlu’nda Ketehorya mahallesinde vâki‘ bir bâb ve Ağa câmi‘i kurbünde vâki‘ bir bâb ve Yazıcı Câmi‘i kurbünde vâki‘ bir bâb ve dördüncü selhhâneye merbût Galatasarayı kurbünde vâki‘ bir bâb ki cem‘an on bâb kasab dükkânları derûnlarında mevcûde beyne’l-esnâf gedik ta‘bîr olunur vakıf âlât-ı lâzıme-i ma‘lûmelerin her birinden südüs ani’n-nısf hums hisselerine bâ-temessük-i mütevellî bi’l-icâreteyn mutasarrıf olan Liko v. Kiro zimmî meclis-i şer‘-i hatîrde sulbî kebîr oğlu kasab tâifesinden bâ‘isü’l-i‘lâm Mitro zimmî muvâcehesinde hâlâ Kassâbân müdîri es-Seyyid Mehmed Ali Bey ve sâir mazbûtü’l-esâmî kasab ustaları hâzır oldukları hâlde takrîr-i kelâm edip ben âlât-ı gedik-i merkūmlardan ber-vech-i muharrer mutasarrıf olduğum südüs ani’n-nısf hums hisselerini hüsn-i rızâ ve tayyib-i ihtiyârım ve ferâğ-ı mu‘teber-i kat‘î ile oğlum mersûm Mitro zimmîye bedel-i ma‘lûm ve makbûz ve müstehlek mukābelesinde bâ-re’y-i mütevellî ferâğ ve tefvîz eylediğimde ol dahi ber-vech-i muharrer tefevvüz ve kabûl ve hisse-i tevzî‘lerini müdîr ve kasab ustaları ma‘rifetleriyle almağa ta‘ahhüd edip fî-mâ ba‘d hisse-i gedik-i merkūmlar oğlum mersûm Mitro zimmînin hakk-ı müfevvezi olup benim aslâ ve kat‘a alâka ve medhalim kalmamışdır deyü ba‘de’l-ikrâr ve’t-tasdîk âlât-ı gedik-i merkūmların südüs ani’n-nısf hums hisselerini fâriğ-i mesfûr Liko zimmînin ferâğından defter-i vakf-ı şerîfde oğlu mersûm Mitro zimmî uhdesine kayd ve der-dest olan temessük-i mezkûru hâmişine zabt ü tasarrufi’çün taraf-ı vakfdan tahrîr ve temhîr ve <> yedine i‘tâ buyurulmak iktizâ eylediği İstanbul Mahkemesi’nden huzûr-ı [âlîlerine i‘lâm olundu] Fî 12 Ca sene [1]258