İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 371 Hüküm no: 326 Orijinal metin no: [119-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Liko v. Kiro’nun sahibi olduğu kasap gediği hissesinin bir kısmını oğlu Kasap Mitro’ya sattığı Kasab [Ma‘rûz] Kezâlik on bâb kasab dükkânları derûnlarında mevcûde beyne’l-esnâf gedik ta‘bîr olunur vakıf âlât-ı lâzıme-i ma‘lûmelerin her biri beşer sehm i‘tibârıyla birer sehmin nısf hisselerine bâ-temessük-i mütevellî bi’l-icâreteyn mutasarrıf olan Liko v. Kiro meclis-i şer‘-i hatîrde sulbî kebîr oğlu kasab tâifesinden bâ‘isü’l-i‘lâm Mitro zimmî muvâcehesinde hâlâ Kassâbân müdîri es-Seyyid Mehmed Ali Bey ve sâir mazbûtü’l-esâmî kasab ustaları hâzır oldukları hâlde takrîr-i kelâm edip ben âlât-ı lâzıme-i merkūmlardan ber-i‘tibâr-ı merkūm mutasarrıf olduğum bir sehmin nısf hisselerini hüsn-i rızâ ve tayyib-i hâtırım [ve] ferâğ-ı mu‘teber-i kat‘î ile oğlum mersûm Mitro zimmîye bedel-i ma‘lûm ve makbûz ve müstehlek mukābelesinde bâ-re’y-i mütevellî ferâğ ve tefvîz eylediğimde ol dahi ber-vech-i muharrer tefevvüz ve kabûl ve hisse-i tevzî‘lerini müdîr ve kasab ustaları ma‘rifetleriyle almağa ta‘ahhüd edip fî-mâ ba‘d hisse-i gedik-i merkūmlar mersûm Mitro zimmînin hakk-ı müfevvezi olup benim aslâ ve kat‘a alâka ve medhalim kalmamışdır deyü ba‘de’l-ikrâr ve’t-tasdîk âlât-ı gedik-i merkūmların hisse-i mezkûreleri fâriğ-i mesfûr Liko zimmînin ferâğından defter-i vakf-ı şerîfde oğlu mersûm Mitro zimmî uhdesine kayd ve der-dest olan temessük-i mezkûru hâmişine zabt ü tasarrufi’çün taraf-ı vakfdan tahrîr ve temhîr ve yedine i‘tâ buyurulmak iktizâ eylediği İstanbul Mahkemesi’nden huzûr-ı [âlîlerine i‘lâm olundu] Fî 12 Ca sene 1258