İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 372 Hüküm no: 327 Orijinal metin no: [119-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kürkçü Simyon’un ortaklıklarını feshettikleri Akşehirli Karabet’teki alacağının ödenmesi için yapılan tenbih 8574[,5] [guru]ş hüküm İhrâc-şüd fî 28 Za sene [12]59 [Ma‘rûz] Kürkçü esnâfından derûn-ı arzuhâlde mastûrü’l-ism Simyon v. Ohannes nâm zimmî meclis-i şer‘-i hatîrde mukaddemâ şerîki arzuhâl eden Akşehirli Karabet v. Artin nâm zimmî muvâcehesinde sene-i sâbıkāda duhûl eden Mayıs ibtidâsında ben mâlımdan on beş bin üç yüz otuz yedi buçuk guruş ve mersûm Karabet zimmî dahi mâlından üç yüz guruş ki cem‘an on beş bin altı yüz otuz yedi buçuk guruş ifrâz ve birbirine halt edip fâide beynimizde beraber iktisâm olunmak üzere İstanbul’da Mahmudpaşa Hanı’nda vâki‘ müsteciren mütemekkin olduğumuz bir bâb odada kürk bey‘ ü şirâsında akd-i şirket-i inân edip mersûm Karabet zimmî kābız-ı mâl olmağla meblağ-ı merkūmu bir müddet a‘mâl edip ba‘dehû işbu târih-i i‘lâmdan bir hafta mukaddem fesh-i akd-i şirket birle hesâbını İstanbul’da Çadırcı Hanı’nda vâki‘ kürkcü esnâfına mahsûs lonca odasında sehv ü galatdan ârî yegân yegân hesâb-ı sahîh ile rü’yet eylediğimizde lede’l-muhâsebe benim gerek re’s-i mâl ve gerek fâide-i hâsıladan hissem olup mersûm Karabet zimmî zimmetinde on beş bin yedi yüz seksen iki buçuk guruş alacağım zuhûr ve ikrâr-ı kat‘î ile ikrâr dahi ettikden sonra yedi bin iki yüz sekiz guruşunu gerek nakden ve gerek havâleten kabz ü istifâ etmemle bâkīsi olan sekiz bin beş yüz yetmiş dört buçuk guruşu mesfûr Karabet zimmîden hâlâ taleb ederim deyü da‘vâ ettikde ol dahi cevâbında kaziyye minvâl-i meşrûh üzere olduğunu bi-tamamihâ tâyi‘an ve kat‘iyyen ikrâr ü i‘tirâf etmeğin mûcebince meblağ-ı bâkī-i mezkûr sekiz bin beş yüz yetmiş dört buçuk guruşu müdde‘î-i mersûm Simyon zimmîye edâ ve teslîme mesfûr Karabet zimmîye tenbîh olunduğu İstanbul Mahkemesi’nden huzûr-ı [âlîlerine i‘lâm olundu] Fî 6 Ca sene 1258