Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 467 Hüküm no: 555 Orijinal metin no: [92a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yetim Musli’ye intikal eden sefine hissesinin vekil tarafından düşük fiyattan satıldığı Ahmed b. Kaya ile yetim vasîsinin sulh oldukları Vilâyet-i Anadolu’da Gönye sancağında Viresne [Viçe?] kazâsına tâbi‘ Nemle? nâm karyede sâkin iken bundan akdem vefât eden Ali b. Mehmed’in sulbî sagīr oğlu Musli’nin tesviye-i umûru için kıbel-i şer‘den mansûb vasîsi olan el-Hâc Ahmed b. Abdullah meclis-i şer‘-i şerîf-i enverde işbu bâ‘isü’l-kitâb Ahmed Bey b. Kaya mahzarında bi’l-vesâye ikrâr ve i‘tirâf edip hâlâ mahrûse-i Galata’da merbût on sekiz zirâ‘ şayka ta‘bîr olunur sefînenin nısfı Süleyman Reis’in mülkü ve nısf-ı âharı müteveffâ-yı mezbûrdan sagīr-i mezbûra müntakil mülkü olup lâkin sagīr-i mezbûrun hissesi bey‘ olunmak enfa‘ ve evlâ olmağla ben bi’l-vesâye mârrü’z-zikr nısf hisseyi semen-i misli ile bey‘ ve kabz-ı semen ve semen-i mezbûru bana teslîme mezkûr Süleyman Reis’i vekîl eylediğimde ol dahi ba‘de’l-kabûli’l-vekâle mârrü’z-zikr nısf-ı sefîneyi bi’l-vekâle mezkûr Ahmed Bey’e yüz elli [bin] guruşa bey‘ ve kabz-ı semen edip lâkin mârrü’z-zikr sefîneyi mezkûr Ahmed Bey’e semen-i mislinden noksân-ı fâhiş ile iştirâ eyledi deyû mezbûr Ahmed Bey’den da‘vâ ve mârrü’z-zikr sefîne müddet-i medîde müzâyede olunup rağabât-ı nâs bi’l-külliye münkatı‘a oldukdan sonra mârrü’z-zikr nısf-ı sefînenin semen-i misli yüz altmış bin guruş idiği sâbit ve mütehakkik olmağla mezbûr Ahmed Bey meblağ-ı mezbûr yüz altmış beş guruşu tekmîl etmek üzre on beş guruş dahi bana teslîm ben dahi bi’l-vesâye ahz u kabz eyledim ba‘de’l-yevm husûs-ı mezbûra müte‘allika mezkûr ile kat‘â da‘vâ ve nizâ‘ım kalmamışdır dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’l-ışrîn min Şa‘bâni’l-mu‘azzam li sene seb‘a ve tis‘în ve elf. Şuhûdü’l-hâl: El-Hâc Ali b. Mehmed, Mahmud Reis b. el-Hâc İbrahim, el-Hâc Ali b. İdris, Mehmed b. İdris.