İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 374 Hüküm no: 329 Orijinal metin no: [119-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe Hatun’un, kocası Veliyüddin Ağa ile ortak oldukları ev hissesini kocasının kendisine ait hissesini sattığı Hasırcı Mehmed Şahin Ağa’ya açtığı satış iptali davasının reddedildiği Kırkçeşme’de bir bâb menzil nizâ‘ı [Ma‘rûz] Mübârek ve mes‘ûd rikâb-ı kamer-tâb-ı merâhim-nisâb-ı şâhâneye takdîm-i arzuhâl eden mu‘arrefetü’z-zât Âişe Hatun bt. Salih Çarşamba günü huzûr-ı hazret-i Fetvâ-penâhî’de ma‘kūd meclis-i şer‘-i münîrde zikri âtî vakıf menzilin nısf hisse-i şâyi‘asına bâ-temessük-i mütevellî mutasarrıf ve vâzı‘ü’l-yed olan derûn-ı arzuhâlde mezkûrü’l-ism Hasırcı es-Seyyid Mehmed Şahin Ağa b. es-Seyyid el-Hâc Musa muvâcehesinde bâ-irâde-i seniyye Hazîne-i Evkāf-ı Hümâyûn tarafından idâre olunan evkāfdan merhûm Harâccı Mehmed Bey Vakfı müsakkafâtından İstanbul’da [120] Kırkçeşme kurbünde Sekbânbaşı İbrahimağa mahallesinde kâin ma‘lûmü’l-hudûd bir bâb vakıf menzil benimle hâlâ zevcim gāib ani’l-meclis Veliyüddin Ağa b. Hüseyin’in bâ-temessük-i mütevellî bi’l-icâreteyn münâsafeten taht-ı tasarrufumuzda iken zevcim gāib-i mezbûr menzil-i mezkûrdan mutasarrıf olduğu nısf hisse-i şâyi‘asını sene-i sâbıkā Zilka‘detü’ş-şerîfesinin beşinci günü mezbûr es-Seyyid Mehmed Şahin Ağa’ya bâ-re’y-i mütevellî fâriğ olmağla hâlâ vâzı‘ü’l-yed olup lâkin ben ve zevcim gāib-i mezbûr menzil-i mezkûrun arsasını ale’l-iştirâki’s-seviyy mutasarrıfları olan Kantarcı es-Seyyid el-Hâc Ali ve zevcesi Şerife Hatice Hatun’dan bin iki yüz elli altı senesi şehri Rebî‘ülâhirinin üçüncü günü bin iki yüz guruş bedel mukābelesinde bâ-re’y-i mütevellî tefevvüz eylediğimizde bedel-i mezkûru ve arsa-i mezkûre üzerine menzil-i mezkûru binâ eylediğimizde mesârif-i inşâiyyesini ben mâlımdan def‘ ü teslîm ve sarf eylediğime binâen zevcim gāib-i mezbûrun nısf hisse-i şâyi‘a-i menzil-i mezkûru merkūm es-Seyyid Mehmed Şahin Ağa’ya ferâğını tecvîz etme[mem]le öyle olucak mezbûr es-Seyyid Mehmed Şahin Ağa zevcim gāib-i mezbûra medfû‘u olan bedelini zevcim gāib-i mezbûrdan geri ahz ve nısf hisse-i şâyi‘a-i menzil-i mezkûru bana ferâğ eylesin yâhûd bedel-i mezkûr bin iki yüz guruş ile menzil-i mezkûrun inşâsına masrûfum olan ma‘lûmü’l-mikdâr meblağın nısflarını bana versin deyü takrîr-i meşrûhu üzere tasaddî eylediği da‘vâsı meşrû‘a olmadığından mâ‘adâ müdde‘iye-i mezbûre Âişe Hatun husûs-ı mezkûru bi-aynihî da‘vâ edip bî-vech-i şer‘î mu‘ârazadan men‘ olunduğunu nâtık işbu sene-i mübâreke Saferi’l-hayrı’nın üçüncü günü târihiyle müverrah mezbûr es-Seyyid Mehmed Şahin Ağa’nın yedinde olup ibrâz eylediği hâlâ Reisü’l-etibbâ-i hazret-i cihân-dârî ve Sadr-ı vâlâ-yı Rumeli devletlü fazîletlü Abdülhak Efendi hazretleri ile Evkāf müfettişi İstanbul pâye-i celîlesiyle mübâhî semâhatlü fazîletlü es-Seyyid Mehmed Emin Âsaf Beyefendi’nin hâtemlerini hâvî Salı günü huzûr-ı cenâb-ı mu‘allâ-elkāb-ı Fetvâ-penâhî’de bi’l-ma‘iyye murafa‘adan verdikleri bir kıt‘a i‘lâm-ı şer‘înin mazmûnunu dahi müdde‘iye-i mezbûre Âişe Hatun ikrâr dahi etmeğin mûcebiyle da‘vâ-yı mezkûresiyle kemâ-fi’s-sâbık mezbûr es-Seyyid Mehmed Şahin Ağa’ya bî-vech mu‘ârazadan men‘ olunduğu İstanbul Mahkemesi’nden huzûr-ı [âlîlerine i‘lâm olundu] Fî 13 Ca sene [1]258