İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 378 Hüküm no: 332 Orijinal metin no: [121-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mariçe bt. Panayot’a ait evi zapt eden Taneyi bt. Sarraf Misak’ın evi tahliye edip Mariçe’ye iade etmesi 3000 [guru]ş edâ birle menzil-i mezkûru tahliye [Ma‘rûz] Arzuhâl eden Mariçe bt. Panayot v. Atam Nasrâniye tarafından husûs-ı âti’l-beyânda vekîl olduğu şahsını bilirler Kosti v. Todori ve Yanko v. Yorgi nâm zimmîler şehâdetleriyle mukaddemâ muvâcehe-i hasm-ı şer‘îde ber-nehc-i şer‘î sâbit olan Yemenici Ligori v. Yorgi zimmî bi’l-ma‘iyye rü’yete memûr evkāf müfettişi İstanbul pâye-i celîlesiyle mübâhî izzetlü fazîletlü es-Seyyid Mehmed Emin Âsaf Beyefendi tarafından meb‘ûs Mehmed İzzet Efendi hâzır olduğu hâlde Çarşamba günü huzûr-ı hazret-i Fetvâ-penâhî’de ma‘kūd meclis-i şer‘-i hatîrde zikri âtî mülk menzile vaz‘-ı yedi mütehakkık olan derûn-ı arzuhâlde ismi mastûr Natani bt. Sarrâf Misak tarafından kezâlik husûs-ı âti’l-beyânda vekîl olduğu şahsını bilirler Agop v. Karabet ve Haçador v. Ohannes nâm zimmîler şehâdetleriyle vech-i şer‘î üzere sâbit olan Attâr Kirope v. Toros zimmî muvâcehesinde kezâlik derûn-ı arzuhâlde isimleri mastûr Tuhfeci Vasilaki v. Uğurlu <> zimmî zevcesi Despina bt. Kostandi Nasrâniye tarafından câi’l-beyânda vekîl olduğu şahsını bilirler Hıristo v. Yorgi ve Yani v. Yorgi nâm zimmîler şehâdetleriyle sâbit olup zevc-i mesfûr Vasilaki zimmî tarafından dahi husûs-ı mezkûrda vekîl-i müsecceli Kosti v. Yorgi zimmî ve bâ-irâde-i seniyye Hazîne-i Evkāf-ı Hümâyûn tarafından idâre olunan evkāfdan gallesi İstanbul’da Edirnekapısı dâhilinde Atik Ali Paşa mahallesinde vâki‘ Aya Yorgi Kilisesi demekle meşhûr Rum tâifesine mahsûs kilise fukarâsının ta‘âmiye ve sâir levâzımâtlarına meşrûta vakfın bâ-hüccet-i şer‘iye hâlâ mütevellîsi Kiryako v. Todori zimmî tarafından zikri âtî husûsda vekîl-i müsecceli câbî-i vakf Kostandi v. Dimitri zimmî hâzır oldukları hâlde mahrûse-i Galata’ya muzâfe İstinye nâhiyesine tâbi‘ Yeniköy’de Aya Nikola mahallesinde vâki‘ bir tarafdan mukaddemâ kürkcü esnâfından Sanan? ve hâlâ Sarrâf Kigork zimmî yalısı ve bir tarafdan Askeroğlu İsteban zimmî yalısı ve bir tarafdan leb-i deryâ ve taraf-ı râbi‘i tarîk-i âm ile mahdûd fevkānî iki bâb oda ve bir sofa ve tahtanî kezâlik iki bâb oda ve bir sofa ve bir kiler ve iki memşâ ve bir bi’r-i mâ ve bir matbah ve bir su limanı ve biri verâ’ tarafına ve biri leb-i deryâ cânibine mekşûf iki sokak kapısı ve müştemilât-ı sâire-i ma‘lûmeyi muhtevî yalı ta‘bîr olunur mülk menzil müvekkilem mersûme Mariçe Nasrâniyenin bâ-hüccet-i şer‘iye müstakıllen yedinde mülk ve hakkı ve kıymeti dahi otuz bin guruş iken müvekkilem mersûme menzil-i mahdûd-ı mezkûru bin iki yüz elli bir senesi Cumâdelûlâsı’nın on yedinci günü zevcân-ı müvekkilân-ı mersûmân Vasilaki zimmî ve Despina Nasrâniyeye cihet-i karzdan on bin guruş deyni mukābelesinde bâ-hüccet sûret-i kat‘iyyede bi-tarîki’l-istiğlâl bey‘ u teslîm eylediğinden sonra menzil-i mezkûr hakīkatde deyn-i mezkûr mukābelesinde rehin olmağla müvekkilem mersûme deyn-i merkūmun altı bin beş yüz guruşunu dâyinleri zevcân-ı müvekkilân-ı mesfûrâna edâ ve teslîm etmekle bâkīsi olan üç bin beş yüz guruşu dahi edâ ile menzil-i mezkûru rehniyetden fekk ü tahlîs üzere iken bin iki yüz elli beş senesi Şevvâli’l-mükerreminin yirminci [yirmi] ikinci günü mütevellî-i müvekkil-i mersûm Kiryako zimmî mütevellîsi olduğu vakf-ı mezkûr gallesinden on bir bin guruş ile zevcân-ı müvekkilân-ı mersûmândan menzil-i mezkûru vakıf için iştirâ murâd ettikde onlar dahi müvekkilem mersûmenin izinsiz fuzûlî menzil-i mezkûru müvekkil-i mütevellî-i mersûm Kiryako zimmîye meblağ-ı mezkûr on bir bin guruşa bâ-hüccet bey‘ ü teslîm ol dahi ber-vech-i muharrer vakıf için iştirâ ve kabz ve ba‘dehû zevcân-ı müvekkilân-ı mersûmân icâre-i müeccele ve mu‘accele ile mülûkâne mütevellî-i müvekkil-i mersûmdan istîcâr ve kabz ve ba‘dehû menzil-i mezkûru sene-i sâbıkā Zilka‘detü’ş-şerîfesinin dokuzuncu günü yine fuzûlî müvekkile-i mersûme Natani Nasrâniyeye ferâğ ve teslîm etmeleriyle menzil-i mezkûra vaz‘-ı yed eder lâkin müvekkilem mersûme Mariçe Nasrâniye zevcân-ı müvekkilân-ı mersûmân Vasilaki zimmî [122] ve Despina Nasrâniyenin ber-minvâl-i muharrer bey‘ [ve] ferâğlarını mücîz olmadığından deyn-i bâkī-i merkūm üç bin beş yüz guruşu zevcân-ı müvekkilân-ı mersûmâna edâ ile menzil-i mezkûru zabt u tasarruf murâd eylediğinde müvekkile-i mersûme Natani Nasrâniye bi-gayrı hakkın mümâna‘at eder suâl olunup ber-vech-i muharrer mümâna‘atı men‘ ü def‘ olunmak matlûbumdur deyü bi’l-vekâle da‘vâ ettikde vekîl-i mersûm Kirope zimmî dahi cevâbında müvekkile-i mersûme Mariçe Nasrâniye mâlike olduğu ol-mikdâr guruş kıymetli menzil-i mezkûru târih-i merkūmda müvekkilân-ı zevcân-ı mersûmân Vasilaki zimmî ve Despina Nasrâniyeye deyn-i merkūmu mukābelesinde bi-tarîki’l-istiğlâl bey‘ ü teslîm eylediğini ve ba‘dehû deyn-i merkūmun altı bin beş yüz guruşunu edâ edip mâ‘adâ üç bin beş yüz guruşu zevcân-ı müvekkilân-ı mersûmâna zimmetinde bâkī deyni kalmadığını hâzırân-ı vekîlân-ı mersûmân Kosti ve Kostandi zimmîler ile mâ‘an her biri bi’l-vekâle ikrâr ü i‘tirâf edip lâkin bin iki yüz elli dört senesi Zilka‘desinin yirmi birinci günü menzil-i mezkûru meblağ-ı merkūm üç bin beş yüz guruş mukābelesinde zevcân-ı müvekkilân-ı mersûmân Vasilaki zimmî ve Despina Nasrâniye yedlerinde rehin iken müvekkile-i mersûme Mariçe Nasrâniye zevcân-ı mersûmâna eğer meblağ-ı bâkī-i merkūmdan fâriğler olup mâ‘adâ bana dört bin guruş dahi verirseniz sâlifü’l-beyân elli bir senesi Cemâziyelevvel’inin on yedinci günü târihinde menzil-i mezkûru size on bin guruşa mübâya‘a-i sahîha ile füruht eylediğimi ve tamamen akçemi aldığımı ikrâr ve menzil-i mezkûrdan ve tağrîr ve gabinden ve sâir hukūkdan sizi ibrâ ederim deyip onlar dahi ol-mikdâr guruş dahi müvekkile-i mersûmeye verdiklerinde ancak zevcân-ı müvekkilân-ı mersûmân müvekkile-i mersûme Mariçe Nasrâniye mukaddemâ menzil-i mezkûru on bin guruşa kendilere mübâya‘a-i sahîha ile füruht edip tamamen akçesini ahz ve bâ-tavassut-ı muslihîn yedlerinden dört bin guruş dahi kabz ve tağrîr [ve] gabnine ve hukūk-ı sâireye müte‘allika âmme-i da‘vâdan zimmetlerini ibrâ ettiğini müştemil ve mârrü’z-zikr elli dört senesi Zilka‘desinin yirmi birinci günü târihiyle müverrah temessük yazmağa bir Müslime emredip ol dahi zevcân-ı mersûmânın emirleri üzere Türkiyyü’l-imlâ olarak minvâl-i muharrer üzere bir kıt‘a temessük yazdıkdan sonra zevcân-ı müvekkilân-ı mersûmân temessük-i mezkûra müvekkile-i mersûme Mariçe Nasrâniyeye parmağını basdırıp ol-vechile menzil-i mezkûr zevcân-ı müvekkilân-ı mersûmânın mülkleri olmuş olduğundan menzil-i mezkûru târih-i merkūmda müvekkil-i mütevellî-i mersûm Kiryako zimmîye minvâl-i muharrer üzere bey‘ ve ba‘dehû istîcâr ve sonra müvekkile-i mersûme Natani Nasrâniyeye ferâğ etmeleriyle vaz‘-ı yed eder deyü müdde‘î-i vekîl-i mesfûr Ligori zimmînin inkârına dahi mukārin temessük-i mezkûru ibrâz ve hâzırân ve vekîlân-ı mersûmân Kosti ve Kostandi zimmîlerin dahi bi’l-vekâle ikrâr ve tasdîkleri ile vekîl-i mersûm Kirope zimmînin bi’l-vekâle takrîr-i meşrûhu üzere îrâd eylediği kelâmı def‘e sâlih cevâb-ı şer‘îsi olmayıp ve zevcân-ı mersûmânın vekîlleri hâzır-ı mersûm meblağ-ı mezkûr dört bin guruşu da‘vâ etmekle mûcebiyle meblağ-ı bâkī-i merkūm üç bin beş yüz guruşu zevcân-ı müvekkilân-ı mesfûrân Vasilaki zimmî ve Despina Nasrâniye müvekkile-i mersûme Mariçe Nasrâniyeden ahz ile menzil-i mezkûrdan müvekkil-i mesfûre Natani Nasrâniye keff-i yed edip menzil-i mezkûru müvekkile-i mersûme Mariçe Nasrâniyenin kemâ-fi’s-sâbık zabt ü tasarrufu iktizâ eylediği İstanbul Mahkemesi’nden huzûr-ı âlîlerine i‘lâm olundu. Fî 13 Ca sene [1]258