İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 381 Hüküm no: 333 Orijinal metin no: [122-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tatar Mehmed Ağa’nın boşandığı zevcesi Ayşe Hatun’da çeşitli eşyalar ve alacağı olduğu davasında haksız bulunduğu 600 [guru]şa sulh [Ma‘rûz] Sâhib-i arzuhâl Tatar Mehmed Ağa b. Ahmed Çarşamba günü huzûr-ı hazret-i Fetvâ-penâhî’de ma‘kūd meclis-i şer‘-i münîrde sâbıkā zevcesi derûn-ı arzuhâlde mezkûretü’l-ism mu‘arrefetü’z-zât Âişe Hatun bt. Mehmed Salih muvâcehesinde mezbûre Âişe Hatun ile zevciyet beynimizde kāime <> ve hâlâ bâ-temessük-i mütevellî bi’l-icâreteyn müstakılleten mutasarrıfe olduğu İstanbul’da Salmatomruk kurbünde Kefevî mahallesinde kâin bir bâb vakıf menzil bâ-temessük-i mütevellî münâsafeten taht-ı tasarrufumda iken menzil-i mezkûr harâb olmağla sene-i sâbıkā hilâlinde mezbûre Âişe Hatun’un kendi hissesinde bi-şarti’r-rücû‘ emriyle menzil-i mezkûrun iktizâ eden mahallerinin işbu yedimde olan ebniye-i hâssa müdîri efendinin bir kıt‘a defteri nâtık olduğu üzere ta‘mîr ve tecdîdine mâlımdan kadr-ı ma‘rûf masrûfum olan dört bin üç yüz doksan dört buçuk guruşdan mezbûre Âişe Hatun’un hissesine isâbet eden iki bin yüz doksan yedi guruş on parayı ve mâlım olup işbu sene-i mübâreke şehri Rebî‘ülâhirinin ikinci günü mezbûre Âişe Hatun’u tatlîk edip müfârakat eylediğimde yedinde kalan mecmû‘u dört yüz yirmi guruş kıymetli üç top Kıbrıs çiti ve elli zirâ‘ Amerikan bezi ve kırk sekiz zirâ‘ lâciverdli basma ve elli kıyye yün ve yine mâlım olup hîn-i müfârakatimizde yedinde kalan mecmû‘u iki bin beş yüz guruş kıymetli bâ-hüccet eşyâ-i ma‘lûmemi dahi mezbûre Âişe Hatun’dan hâlâ taleb ederim deyü da‘vâ ettikde ol dahi cevâbında müdde‘î-i mezbûr Mehmed Ağa husûs-ı merkūmu benden da‘vâ sadedinde iken sâlifü’l-beyân şehri Rebî‘ülâhirin ikinci günü menzil-i mezkûrda da‘vâ-yı mezkûresinden benimle kat‘an-li’n-nizâ‘ bi’t-terâzî altı yüz guruşa sulh olup ben dahi sulh-ı mezkûru kabûl ve müdde‘î-i mezbûr bedel-i sulh-ı mezkûr altı yüz guruşu dahi meclis-i sulhda yedimden tamamen ba‘de’l-kabz ziyâde müdde‘âsına ve bi’l-cümle husûs-ı mezkûra ve sâir cemî‘ hukūk-ı şer‘iyeye müte‘allika âmme-i da‘vâdan benim zimmetimi kabûlümü hâvî ibrâ-i âmm-ı sahîh-i şer‘î ile ibrâ ve iskāt etmiş idi deyü eylediği def‘ini müdde‘î-i mezbûr Mehmed Ağa bi-tamamihi tâyi‘an ve kat‘iyyen ikrâr ü i‘tirâf etmeğin mûcebince müdde‘î-i mezbûr Mehmed Ağa da‘vâ-yı mezkûresiyle mezbûre Âişe Hatun’a bî-vech-i şer‘î mu‘ârazadan men‘ olunduğu İstanbul Mahkemesi’nden huzûr-ı [âlîlerine i‘lâm olundu] Fî 20 Ca sene [12]58