İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 382 Hüküm no: 334 Orijinal metin no: [122-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bahçıvan Nikolaki’yi katleden Çoban Köstendilli Yuvan’ın, diyet olarak vârislere on bin dirhem gümüş ödemesi ve ayrıca kendisine kanunen gerekli cezanın verilmesi İhrâc-şüd fî 28 C sene [12]59 [Ma‘rûz] Bâ-irâde-i seniyye Evkāf-ı Hümâyûn tarafından idâre olunan suyolu kurâsından Bahçe karyesinde mütemekkin iken ber-vech-i âtî hâlik olan Bahçevân Nikolaki v. Vasil zimmînin verâseti zevce-i metrûkesi Pağona bt. Vasil Nasrâniye ile li-ebin er ve kız karındaşları Petro zimmî ve Ezmerağda Nasrâniyeye ba‘de’l-inhisâr arzuhâl sâhibleri mersûm Petro zimmî ve şahısları mu‘arrefeler mesfûretân Pağona ve Ezmerağda Nasrâniyeler bi’l-ma‘iyye rü’yete memûr evkāf müfettişi İstanbul pâye-i celîlesiyle mübâhî izzetlü fazîletlü es-Seyyid Mehmed Emin Âsaf Beyefendi tarafından meb‘ûs Mehmed İzzet Efendi hâzır olduğu hâlde Çarşamba günü huzûr-ı hazret-i Fetvâ-penâhî’de ma‘kūd meclis-i şer‘-i hatîrde karye-i merkūma bir sâ‘at karîb Uskumru karyesi mer‘asında vâki‘ el-Hâc Hasan Ağa nâm kimesnenin mandırasında çoban olup hâlik-i mersûmu katl töhmetiyle ahz olunan derûn-ı arzuhâlde ismi mastûr Köstendilli Yuvan v. Yanko zimmî muvâcehesinde mûrisimiz mersûm Nikolaki zimmî mârrü’z-zikr mandırada olan gübresini zikr olunan Bahçe karyesinde vâki‘ bahçesine nakl için şehr-i sâbık yani şehri Rebî‘ülâhirin on birinci Pazar günü sâ‘at on râddelerinde zikr olunan mandıraya vardıkda işbu mersûm Yuvan zimmî mesfûr Nikolaki zimmînin karnına ve beline bi-gayrı hakkın sopa ta‘bîr olunur âsâ-yı kebîr ile darb ve ayağıyla dahi döğüp ve kara bere edip lâkin cerh etmeyip ba‘dehû mûrisimiz mesfûr ol darblardan sâhib-i firâş olup kalkmadan dört sâ‘at mürûrunda müte’essiren hâlik olmağla mûcib-i şer‘îsi icrâ olunmak matlûbumuzdur deyü da‘vâ ettiklerinde mersûm Yuvan zimmî dahi cevâbında mûrisleri mersûm Nikolaki zimmînin vakt-i mezkûrda nakl-i gübre için zikr olunan mandıraya gittiğini ve ba‘dehû darbdan nâşi hâlik olduğunu ikrâr ve müdde‘iyûn-ı mersûmûnun ber-vech-i muharrer müdde‘âlarını inkâr etmekle müdde‘iyûn-ı mersûmdan Petro zimmî ve Pağona ve Ezmerağda Nasrâniye ber-minvâl-i muharrer müdde‘âlarını her biri mahallerinden lede’t-tezkiye adl ve makbûl ve makbûlü’ş-şehâde idikleri ihbâr olunan sâlifü’l-beyân Bahçe karyesi kurbünde Zekeriya karyesi ahâlisinden Mustafa b. İbiş nâm kimesne ile zikr olunan Bahçe karyesi re‘âyâsından Bahçevân Hıristo v. Yanaki nâm zimmî şehâdetleriyle huzûr-ı hazret-i müşârün-ileyhde mesfûr Yuvan zimmî muvâcehesinde vech-i vecîh-i şer‘î üzere isbât etmeğin mûcebiyle mersûm Yuvan zimmî üzerine lâzım gelen diyet-i recül on bin dirhem gümüşü işbu târih-i i‘lâmdan üç sene tamamında üç taksît ile müdde‘iyûn-ı mersûmûn Petro zimmî ve Pağona ve Ezmerağda Nasrâniyelere bi’t-taleb edâya mesfûr Yuvan zimmîye tenbîh olunup [123] mâ‘adâ kātil-i mersûm hakkında cezâ kānûnnâme-i hümâyûnu ahkâm-ı ma‘delet-ittisâmına nazaran lâzım gelen cezâ dahi hasbe’l-kānûn icrâ buyurulmak muktezâ-yı hâl olduğu İstanbul Mahkemesi’nden huzûr-ı âlîlerine i‘lâm olundu. Fî 20 Ca sene [1]258