İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 384 Hüküm no: 336 Orijinal metin no: [123-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Dülger Aleksi’nin yıkılan kereste dükkânına yaptığı harcamaların bir bölümüne karşılık dükkân gediği hissedârlarından Abacı İsak’ın vârislerinden üç bin kuruş alıp zimmet ibrası yaptığı Keresteci nizâ‘ına dâir [Ma‘rûz] Mübârek ve mes‘ûd rikâb-ı kamer-tâb-ı merâhim-nisâb-ı Husrevâne’ye takdîm-i arzuhâl eden Dülger Aleksi veledü’l-hâlik Keresteci Yuvan v. Kostandi zimmî bi’l-ma‘iyye rü’yete memûr evkāf müfettişi İstanbul pâye-i celîlesiyle mübâhî izzetlü fazîletlü es-Seyyid Mehmed Emin Âsaf Beyefendi hâzır olduğu hâlde evvelen şifâhen sâdır olan fermân-ı âlîlerine imtisâlen Çarşamba günleri huzûr-ı cenâb-ı mu‘allâ-elkāb-ı Fetvâ-penâhî’de ve ba‘dehû bâb-ı hazret-i müşârün-ileyhde İstanbul kādıları dâ‘îlerine tahsîs buyurulan dâirede müfettiş-i mûmâ-ileyh tarafından meb‘ûs Kâtib Hüseyin Hamdi Efendi hâzır olduğu hâlde akd olunan meclis-i şer‘-i münîrde fi’l-asl medîne-i Kayseriye’ye tâbi‘ İstefan karyesi re‘âyâsından olup İslimye kasabasında li-ecli’t-ticâre mütemekkin iken bin iki yüz kırk yedi senesi hilâlinde hâlik olan Abacı İsak v. Sava v. Atam zimmînin verâseti karye-i merkūmede mütemekkineler zevce-i metrûkesi Elisavit bt. Mihal v. Nikola Nasrâniye ile sulbiye kebîre kızı Marya Nasrâniye ve sulbî kebîr oğlu Yuvan zimmîye ba‘de’l-inhisâr nefsinden asıl ve anası ve kız karındaşları mersûmetân Elisavit ve Marya Nasrâniyeler taraflarından husûs-ı âti’l-beyânda vekîlleri olduğu şahıslarını bilir karye-i mezbûre re‘âyâsından Dül[g]er Haralambos v. Vasil ve Taşçı Mihal v. Yuvan nâm zimmîler şehâdetleriyle sâbit olan derûn-ı arzuhâlde ismi mastûr mesfûr Yuvan zimmî ile karye-i mezkûrede mütemekkin diğer Yuvan v. Yuvakim v. İsayi nâm zimmînin yeğeni ve tarafından zikri âtî husûsda vekîl olduğu şâhidân-ı mersûmân şehâdetleriyle sâbit olan Aleksan v. İsteryo zimmî muvâcehelerinde İstanbul hısnı ebvâbından Bahçekapısı’ndan hurûcda cânib-i yesârda vâki‘ bir tarafdan karakolhâne ve bir tarafdan çeşme ve bir tarafdan kömürcü Mahmud Ağa mağazası ve taraf-ı râbi‘i tarîk-i âm ile mahdûd senevî altmış sekiz guruş kirâ-yı kadîmeli mukaddemâ iki ve el-yevm üç bâb fevkānî oda ve bir matbah ocağını müştemil ma‘rifet-i şer‘le mu‘âyene olunan bir bâb vakıf keresteci dükkânı bâ-temessük-i mütevellî bi’l-icâreteyn müstakıllen benim taht-ı tasarrufumda ve derûnunda mevcûde beyne’l-esnâf gedik ta‘bîr olunur vakıf âlât-ı lâzıme-i ma‘lûme dahi yüz yirmi sehm i‘tibârıyla otuz dört sehm bir sülüs hisse-i şâyi‘ası benimle gāibûn ani’l-beled anam Despina bt. Ağban? Nasrâniye ve li-ebeveyn er karındaşlarım Mihail ve Kostandi ve Gavril zimmîlerin ve altmış sekiz sehm iki sülüs hisse-i şâyi‘ası asıl ve müvekkiletân-ı [müvekkilûn-ı] mersûmûn Yuvan ve Elisavit ve Marya Nasrâniyelerin ve mâ‘adâ on yedi sehm hisse-i şâyi‘ası müvekkil-i mersûm diğer Yuvan zimmînin bâ-temessükât-ı mütevellî ve iştirâken taht-ı tasarrufumuzda olup ancak bundan akdem karakolhâne-i mezkûr bâ-irâde-i seniyye inşâ olunduğu esnâda ber-vech-i muharrer müstakıllen mutasarrıf olduğum dükkân-ı mezkûr bi’l-îcâb hedm olunmuş olduğundan emsâli üzere benimle asıl ve müvekkilûn-ı mersûmûn iştirâken inşâya rağbet etmediklerine mebnî ben dükkân-ı mezkûru müştemilât-ı mezkûresiyle mâ‘an müstakıllen kendi mâlımdan sekiz bin guruş harc ü sarfla binâ ve inşâ eylediğimden meblağ-ı merkūm sekiz bin guruşdan asıl ve müvekkilûn-ı mersûmûnun hisselerine isâbet eden meblağı bundan mukaddem da‘vâya tasaddî etmiş idim el-hâletü hâzihî asıl ve vekîlân-ı mersûmûn Yuvan ve Aleksan zimmîler benim ber-vech-i meşrûh masrûfuma i‘âne olarak asıl ve vekîlûn-ı mersûmûnun vech-i muharrer üzere mutasarrıf oldukları sâlifü’l-beyân altmış sekiz sehm iki sülüs hisse-i şâyi‘a ile on yedi sehm hisse-i şâyi‘a için kendi ve müvekkilûn-ı mesfûrûnun mâllarından rızâlarıyla teberru‘an bana üç bin guruş vermeye ta‘ahhüd etmeleriyle ben dahi râzı olup meblağ-ı mezkûr üç bin guruşdan mâ‘adâ bi’l-cümle husûs-ı mezkûra müte‘allika âmme-i da‘vâdan asıl ve müvekkilûn-ı mersûmûn Yuvan zimmî ve Elisavit ve Marya ve diğer Yuvan zimmînin zimmetlerini kabûle mukārin ibrâ ve iskāt edip bu vechile kat‘-ı münâza‘a eyledik deyü ikrâr ve tasâdıkları <> tescîl ve huzûr-ı âlîlerine i‘lâm olundu. Fî 16 Ca sene [12]58