İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 385 Hüküm no: 337 Orijinal metin no: [123-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vakıf simitçi dükkânına yapılan müdahalenin men olunması Simidci dükkânı nizâ‘ına dâir [Ma‘rûz] Vilâyet-i Rumeli’de medîne-i Yanya’ya tâbi‘ Kafesoda karyesi re‘âyâsından olup vilâyet-i Anadolu’da Tarhala nâm-ı diğer Soma Kazâsı’na muzâfe Kırkağaç kasabasında simidci iken bin iki yüz elli bir senesi hilâlinde hâlik olan Yani v. Kosta zimmînin verâseti li-ebeveyn er karındaşı Yorgi zimmî ile hâlâ karye-i mezbûrede mütemekkine anası Nişano bt. Cuf Nasrâniyeye ba‘de’l-inhisâr arzuhâl eden mersûm Yorgi zimmî nefsinden asâleten ve anası gāibe-i mersûme Nişano Nasrâniye tarafından dahi husûs-ı âtîde vekâleten Çarşamba günü huzûr-ı hazret-i Fetvâ-penâhî’de ma‘kūd meclis-i şer‘-i münîrde hâlâ kasaba-i mezkûre müdîri ve zikri âtî bir bâb simidci dükkânına vaz‘-ı yedi mütehakkık olup bâ-mektûb-ı sâmî-i hazret-i vekâlet-penâhî ihzâr olunan derûn-ı arzuhâlde ismi mezkûr Süleyman Ağa b. Ahmed muvâcehesinde mârrü’z-zikr Kırkağaç kasabasında ta‘bîr olunur mahâl karşısında vâki‘ ma‘lûmü’l-hudûd bir bâb simidci dükkânının arsası Karaosmanzâde el-Hâc Mehmed Ağa Vakfı’ndan olarak senevî iki yüz guruş mukāta‘a ile benimle sağlığında ile’l-helâk karındaşım hâlik-i mersûm yani zimmînin münâsafeten taht-ı tasarrufumuzda ve üzerinde mebnî bir örf-i belde gedik ta‘bîr olunur ebniyesi dahi kezâlik benimle karındaşım mersûmun yine münâsafeten yedimizde mülkümüz olup karındaşım mersûm hâlik oldukda ebniye-i mezkûreden mâlik olduğu nısf hisse-i şâyi‘ası benimle anamız gāibe-i mesfûreye mevrûs olmuş iken karındaşım mersûmun hîn-i helâkinde ben dahi anam gāibe-i mersûme ile mâ‘an karye-i mezkûrede bulunduğumdan hâlik-i mersûmun zâhirde vâris-i ma‘rûfu olmayıp terekesi cânib-i beytü’l-mâle âid olmak zu‘muyla kazâ-i mezkûrda bilâ-vâris-i ma‘rûf hâlik olanların terekelerini cânib-i beytü’l-mâl için bâ-fermân-ı âlî kabza memûr bulunan el-Hâc Bilal Ağa mecmû‘-ı ebniye-i dükkân-ı mezkûru tereke-i hâlik-i mersûmdan olmak üzere zabt ettikden sonra emîn-i beytü’l-mâl merkūm el-Hâc Bilal Ağa bin iki yüz elli iki senesi Zilka‘detü’ş-şerîfesinin yirmi beşinci günü mecmû‘-ı ebniye-i mezkûreyi mezbûr Süleyman Ağa’ya bin beş yüz guruş semen-i medfû‘ ve makbûza bâ-hüccet bey‘ ü teslîm ol dahi ba‘de’l-iştirâ ve’t-tesellüm ve’l-kabz vâzı‘ü’l-yed iken kasaba-i mezkûrede vukū‘ bulan harîkde dükkân-ı mezkûr muhterik olup arsa-i sırfa kaldıkda mezbûr Süleyman Ağa arsa-i mezkûre üzerine mütevellî-i vakf-ı mûmâ-ileyh Karaosmanzâde el-Hâc Mehmed Ağa izniyle kendi mâlından nefsi’çün bir bâb simidci dükkân binâ ve inşâ edip dükkân-ı mezkûra mâlik iken bir def‘a dahi kasaba-i mezkûrede vukū‘ bulan harîkde yine dükkân-ı mezkûr muhterik oldukda kezâlik mütevellî-i mûmâ-ileyh izniyle arsa-i mezkûre üzerine nefsi’çün bir bâb simidci dükkânı binâ edip ol-vechile dükkân-ı mezkûra el-yevm mezbûr Süleyman Ağa mutasarrıf olmağla vaz‘-ı yed ve arsasının dahi mukāta‘a-i mezkûresini sâl be-sâl mütevellî-i mûmâ-ileyhe edâ eder ise mücerred dükkân-ı merkūmun muhterik olan ebniye-i mezkûresi karındaşım hâlik-i mersûm ile benim ber-minvâl-i muharrer seviyyen mülkümüz olmağla sonradan mezbûr Süleyman Ağa’nın binâ eylediği dükkân-ı mezkûr dahi benimle karındaşım mersûmun mülkümüz olmuş olur öyle olucak dükkân-ı mezkûrdan mahâllinde keff-i yed edip bana teslîm etmek üzere mezbûr Süleyman Ağa’ya cebr olunmak bi’l-asâle ve anam gāibe-i mersûme Nişano Nasrâniye tarafından dahi vekîli olmamla bi’l-vekâle matlûbumdur deyü takrîr-i meşrûhu üzere tasaddî eylediği da‘vâsı bu mertebe ile meşrû‘a ve iltifâta şâyân olmadığı müdde‘î-i mersûm Yorgi zimmîye tefhîm ve mûcebince da‘vâ-yı mezkûresiyle mezbûr Süleyman Ağa’ya bî-vech-i şer‘î mu‘ârazadan <> ba‘de’l-men‘ dükkân-ı mezkûru mezbûr Süleyman Ağa’nın kemâ-kân zabt ü tasarrufu iktizâ eylediği İstanbul Mahkemesi’nden huzûr-ı [âlîlerine i‘lâm olundu] Fî 27 Ca sene [12]58