Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 467 Hüküm no: 556 Orijinal metin no: [92a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İvaz b. Yancı’nın Ağya v. Karabet’te kefaletten dolayı alacağı olduğu Mahmiye-i İstanbul’da Vezir hanında sâkin işbu bâ‘isü’l-vesîka İvaz v. Yancı nâm Ermeni meclis-i şer‘-i şerîf-i enverde bundan akdem hâlik olan Karabet v. Papa’nın sulbî kebîr oğlu Ağya nâm Ermeni muvâcehesinde üzerine da‘vâ ve takrîr-i kelâm edip târih-i kitâbdan yedi sene mukaddem mezbûr Karabet ve gāib ani’l-meclis Nazar ve karındaşım hâzır bi’l-meclis Bünyad nâm Ermeniler, Mustafa Ağa b. Hasan nâm kimesneden bin yedi yüz yirmi beş esedî istidâne ve kabz ve meblağ-ı mezbûrdan her biri âharın zimmetine lâzım gelen meblağı emir ve kabûlü hâviye kefâlet-i sahîha-i şer‘iyye ile kefîl oldukdan sonra mezbûr Nazar kable’l-edâ gaybet edip ve mezbûr Mustafa Ağa merkūmân Karabet ve Bünyad’ı huzûr-ı hâkimü’ş-şer‘a ihzâr edip mezbûrân husûs-ı merkūmu ikrâr etmeleriyle meblağ-ı mezbûr bin yedi yüz yirmi beş guruşu asâleten ve vekâleten edâya hükm-i hâkimü’ş-şer‘î lâhık oldukdan sonra mezbûr (...) mezbûrân Karabet ve Bünyad’ın asâleten ve vekâleten zimmetlerine edâsı lâzım gelen meblağı emr ve kabûlü hâviye kefâlet-i sahîha-i şer‘iyye ile kefîl olduğumuzdan sonra mezbûr Karabet meblağ-ı mezbûru edâ için cânib-i şer‘den haps olundukdan oğlu mezbûr Ağya babası mezkûr Karabet’in asâleten ve vekâleten zimmetine edâsı lâzım gelen meblağ-ı mezbûr emriyle kefîl olup ve mezbûr Karabet meblağ-ı mezbûru kable’l-edâ hâlik olup deyn bi hükmi’l-kefâle meblağ-ı mezbûru mezbûr Mustafa Ağa’ya edâya ve teslîm eylediğimden sonra bâlâda şerh ve beyân olunan meblağ-ı mezbûru mezbûrân Karabet ve Nazar ve Bünyad’ın ikrâz ve teslîm eyledikleri Zaharya nâm Ermeni’den tahsîl için harc u sarf olunan kadr-i ma‘rûf meblağdan [92b] mâ‘adâ sekiz yüz elli guruşu ahz ve istîfâ edip bâkī sekiz yüz elli guruşdan kefâletine binâen mezbûr Ağya’ya edâsı lâzım gelen dört yüz yirmi beş guruşu taleb eylediğimde bana edâdan imtinâ‘ eder suâl olunup bana edâya tenbîh olunmak matlûbumdur dedikde mazmûnu min külli’l-vücûh takrîr-i meşrûhuna mutâbık hüccet-i şer‘iyye dahi ibrâz etmeğin gıbbe’s-suâl mezbûr Ağya cevâbında baba[mı]z mezkûr Karabet ve Nazar ve Bünyad’ın bâlâda şerh olunan minvâl üzre mezkûr Mustafa Ağa’dan bin yedi yüz guruş istidâne ve kabz ve meblağ-ı mezbûrdan her biri âharın zimmetine edâsı lâzım gelen meblağı emr ve kabûlü hâviye kefâlet-i sahîha ile kefîl olduklarından sonra mezbûr İvaz dahi vech-i meşrûh üzre meblağ-ı mezbûra emriyle kefîl olup bi hükmi’l-kefâle edâsını ikrâr lâkin kendinin vech-i muharrer babası mezbûrun zimmetine lâzım gelen meblağ-ı mezbûre kefâletini inkâr edicek müdde‘î-i mezbûrdan müdde‘âsına beyyine taleb olundukda mahmiye-i mezbûrede Salma Tomruk mahallesinde sâkin udûl-i müslimînden Derviş b. Hasan ve Abdullah Yazıcı b. Yusuf nâm kimesneler li ecli’ş-şehâde meclis-i şer‘a hâzırân olup istişhâd olundukda fi’l-vâki‘ işbu mezkûr Ağya derûn-ı hüccetde mastûr olduğu üzre babası mezbûr Karabet’in asâleten ve kefâleten zimmetine edâsı lâzım gelen meblağ-ı mezbûr bin yedi yüz yirmi beş guruşu ba‘de hükmi’ş-şer‘î tahsîl için haps olundukda oğlu kefâlet-i şer‘a kefîl olmuşidi biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinde gıbbe’t-ta‘dîl ve’t-tezkiyye şehâdetleri makbûle olmağın mûcebiyle ba‘de’l-hükmi’ş-şer‘î ve’l-kazâi’l-mer‘î işbu vesîka bi’t-taleb ketb olundu. Fi’l-yevmi’l-ışrîn min Şa‘bâni’l-mu‘azzam li sene seb‘a ve tis‘în ve elf. Şuhûdü’l-hâl: İbrahim Çelebi b. Ahmed, Mustafa Çelebi b. Ahmed, Mehmed b. İdris, Mustafa Çelebi b. Abdurrahman.