İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 386 Hüküm no: 338 Orijinal metin no: [124-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vakıf un değirmenine yapılan müdahalenin men edilmesi [Ma‘rûz] Sâhib-i arzuhâl Arpacı Hüseyin Ağa b. Süleyman bi’l-ma‘iyye rü’yete memûr evkāf müfettişi İstanbul pâye-i celîlesiyle mübâhî izzetlü fazîletlü es-Seyyid Mehmed Emin Âsaf Beyefendi hâzır olduğu hâlde şifâhen sâdır olan fermân-ı âlîlerine imtisâlen Çarşamba günü huzûr-ı hazret-i Fetvâ-penâhî’de ma‘kūd meclis-i şer‘-i münîrde derûn-ı arzuhâlde mezkûrü’l-ism es-Seyyid el-Hâc İbrahim Edhem Efendi b. el-müteveffâ Uncu el-Hâc Eyüb Ağa b. el-Hâc Süleyman muvâcehesinde bâ-irâde-i seniyye Hazîne-i Evkāf-ı Hümâyûn tarafından idâre olunan evkāfdan defterdâr-ı esbak merhûm Derviş Mehmed Efendi Vakfı’nın evlâdiyet ve meşrûtiyet üzere hâlâ mütevelliyesi Şerife Aliye Hanım tarafından mürsel vekîl-i müsecceli Câbî-i vakf Hafız Ahmed Efendi b. Hüseyin hâzır olduğu hâlde arsası vakf-ı merkūmdan olarak senevî vakf-ı mezkûra üç yüz akçe mukāta‘a-i kadîmesi ve üzerinde mevcûde bi’l-cümle ebniyesi mülk olan İstanbul’da Kapan-ı dakīk kurbünde Arabacılar nâm mahâlde Hızırbey mahallesinde vâki‘ Arnavud kepçeli demekle ma‘rûf üç horoslu bir bâb uncu değirmeninin ebniye-i memlûkesi pederi müteveffâ-yı mezbûr el-Hâc Eyüb Ağa’dan bi-tarîki’l-münâsaha kendine mevrûs olarak mezbûr es-Seyyid el-Hâc İbrahim Edhem Efendi’nin müstakıllen yedinde mülkü iken tedâvül-i eydî ile bey‘ ü şirâ olunarak bin iki yüz kırk beş senesi Cemâziyelevvel’inin on yedinci günü ebniye-i mezkûreye bâ-hüccet-i şer‘iye ben mâlik olup ba‘dehû bin iki yüz kırk dokuz senesi şehr-i Rebî‘ülâhirinin on dördüncü günü vukū‘ bulan Tüfenkhâne-i âmire harîkinde değirmen-i mezkûr muhterik olup arsa-i sırfa kaldıkdan sonra ben binâ <> etmeyip ve târih-i merkūmdan beri arsasının mukāta‘a-i mezkûresini taraf-ı vakf-ı mezkûra vermediğimden el-hâletü hâzihî mezbûr es-Seyyid el-Hâc İbrahim Edhem Efendi arsa-i mezkûrenin icâreteyn ile kendine taraf-ı vakfdan îcâr olunmasına tâlib olduğundan taraf-ı vakfdan dahi arsa-i mezkûre ol-vechile îcâr olunmakda olup lâkin ebniyesi mukaddemâ benim mülküm olmağla öyle olucak ber-vech-i muharrer istîcârdan mezbûr es-Seyyid el-Hâc İbrahim Edhem Efendi men‘ olunup binâ edinceye kadar mukāta‘ası mutâlebe olunmayarak arsa-i mezkûre yedimde ibkā olunmak murâdımdır deyü da‘vâ ettikde mezbûr es-Seyyid el-Hâc İbrahim Edhem Efendi dahi istintâk olundukda cevâbında müdde‘î-i mezbûru vekîli hâzır-ı mezbûr ile mâ‘an tasdîk eylediklerinden mâ‘adâ müdde‘î-i mezbûr Hüseyin Ağa’nın takrîr-i meşrûhu üzere tasaddî eylediği da‘vâsı meşrû‘a ve iltifâta şâyân olmadığı kendine tefhîm ve mûcebince da‘vâ-yı mezkûresiyle mezbûr es-Seyyid el-Hâc İbrahim Edhem Efendi’ye bî-vech-i şer‘î mu‘ârazadan ba‘de’l-men‘ mezbûr Hüseyin Ağa arsa-i mezkûreden keff-i yed edip cânib-i vakf-ı mezkûrdan zabt ü tasarrufu iktizâ eylediği İstanbul Mahkemesi’nden huzûr-ı [âlîlerine i‘lâm olundu] Fî 25 Ca sene 1258