İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 387 Hüküm no: 339 Orijinal metin no: [124-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Berber dükkânı gediğinin satışı 5000 [guru]şa sulh [Ma‘rûz] Fi’l-asl Anadolu’da Bolu sancağında Cıga [Çağa] Kazâsı’na tâbi‘ İbricik karyesi ahâlisinden olup İstanbul’da Ayvansaray kapısı hâricinde Korucu Mehmed Çelebi mahallesinde sâkin iken karye-i mezkûreye gidip onda bin iki yüz kırk beş senesi hilâlinde fevt olan Berber Karabiberoğlu es-Seyyid İbrahim b. Süleyman b. İbrahim’in verâseti zevce-i menkûha-i metrûkesi Şerife Âişetü’s-sıddîka Hatun bt. Mehmed Tâhir ile vâlidesi Şerife Fatıma Hatun bt. Ahmed ol târihde sagīre ve hâlâ kebîre kızı Şerife Ziyneti Hanım ve li-ebeveyn kız karındaşı Şerife Zeliha Hatun’a münhasıra ba‘dehû uht-i mezbûre Şerife Zeliha Hatun dahi fevt olup verâseti zevc-i metrûkü Tütüncü Halil Ağa b. Abdullah ile vâlidesi mezbûre Şerife Fatıma Hatun ve sadrî sagīr oğlu es-Seyyid Mehmed İzzet’e ba‘de’l-inhisâr sâhibe-i arzuhâl mu‘arrefetü’z-zât mezbûre Şerife Ziyneti Hanım vâlidesi ve hâl-i sıgārında tesviye-i umûruna bâ-hüccet-i şer‘iye vasîyy-i mansûbesi kezâlik zâtı mu‘arrefe zevce-i mezbûre Şerife Âişetü’s-sıddîka Hatun hâzıra olduğu hâlde Çarşamba günü huzûr-ı hazret-i Fetvâ-penâhî’de ma‘kūd meclis-i şer‘-i münîrde zikri âtî gedik âlâtına vaz‘-ı yedi mütehakkık olan derûn-ı arzuhâlde mezkûrü’l-ism Mehmed Ağa b. Ali muvâcehesinde İstanbul hısnı ebvâbından Kumkapı hâricinde kömürcü mağazaları karşısında tabgarcı? ve Attâr dükkânları beynlerinde kâin evkāf muhâsebesinde mukayyed bir bâb berber dükkânı derûnunda mevcûde beyne’l-esnâf gedik ta‘bîr olunur otuz bin guruş kıymetli âlât-ı lâzıme-i ma‘lûme babam ve mûrisim müteveffâ-yı evvel-i mezbûr es-Seyyid İbrahim’in hayatında ile’l-vefât yedinde mülkü olup ba‘de-vefâtihî bi-tarîki’l-münâsaha benimle verese-i sâire-i mezkûresine mevrûs olmuş iken âlât-ı gedik-i merkūmu mezbûr Mehmed Ağa fuzûlî zabt ve vaz‘-ı yed etmekle suâl olunup hisse-i irsiyemden keff-i yedine tenbîh olunmak matlûbumdur deyü da‘vâ ettikde ol dahi cevâbında müteveffâ-yı mezbûr Karabiberoğlu es-Seyyid İbrahim b. Süleyman b. İbrahim hayatında bin iki yüz kırk iki senesi Zilhiccetü’ş-şerîfesinin üçüncü günü târihiyle müverraha ve ol târihde İstanbul Bâb mahkemesinde nâibü’ş-şer‘ bulunan sâbıkā Galata kādısı fazîletlü es-Seyyid Veliyüddin Efendi’nin imzâsıyla mümzât ve hâtemiyle mahtûme yedimde olan bir kıt‘a hüccet-i şer‘iye nâtıka olduğu üzere nısf hisse-i şâyi‘a-i âlât-ı gedik-i merkūmu tarafından ber-vech-i âtî vekâleti asâkir-i hâssa-i şâhâne süvârîlerinden es-Seyyid Ahmed b. Mehmed Emin b. Abdullah ve Berber esnâfından Osman Ağa b. İbrahim b. Abdurrahman ve Koltukçu Mahmud Ağa b. el-Hâc Mehmed b. Abdullah nâm şâhidûn-ı mu‘addilûn şehâdetleriyle ber-nehc-i şer‘î sâbit olan gāib ani’l-meclis Sîmkeş es-Seyyid Ahmed Ağa b. İsmail b. Abdullah beş bin beş yüz guruşa bi-safkatin vâhidetin bana bey‘ ü teslîm ben dahi iştirâ ve tesellüm ve kabz ve kabûl ettiğimden sonra semen-i mezkûrun beş bin guruşunu müvekkil-i merkūm es-Seyyid İbrahim’in cânib-i mîrîye olan deyni’çün vekîl-i mezbûrun emriyle kabza memûr ol târihde Muhallefât halîfesi Abdulkadir Efendi’ye ve bâkī beş yüz guruşunu dahi vekîl-i mezbûr es-Seyyid Ahmed Ağa’nın kendisine ben def‘ ve teslîm ve ba‘dehû şehr-i mezkûrun birinci günü târihiyle müverraha nâib-i mûmâ-ileyhe verip mahkeme-i mezbûre sicill-i mahfûzundan kaydı ihrâc olunan bir kıt‘a hüccet-i şer‘iye nâtıka olduğu üzere nısf hisse-i şâyi‘a-i âharını dahi mezbûr es-Seyyid İbrahim Ağa tarafından ber-vech-i câî vekâleti yine şühûd-ı mezbûrûn ile Sarrâc Kara Mehmed Ağa b. Hüseyin b. Abdullah nâm kimesne şehâdetleriyle ber-nehc-i şer‘î sâbit olan mezbûr Sîmkeş es-Seyyid Ahmed Ağa beş bin iki yüz elli guruşa safka-i vâhide ile bana bey‘ ü teslîm ben dahi iştirâ ve tesellüm ve kabz ü kabûl ettiğimden sonra semeni olan meblağ-ı mezkûr beş bin iki yüz elli guruşu vekîl-i mezbûr es-Seyyid Ahmed Ağa’ya tamamen def‘ ü teslîm edip ol-vechile mecmû‘-ı âlât-ı gedik-i merkūm benim mülk-i müşterâm olmağla bi-hakkın vaz‘-ı yed <> eylediğimden mâ‘adâ bin iki yüz elli senesi Saferi’l-hayrı’nın on beşinci günü târihiyle müverrah ve İmâm-ı evvel-i Sultanî ve Sadr-ı Rumeli bulunan es-Seyyid Mehmed Zeynelabidin Efendi merhûmun hâtemlerini hâvî yedinde olan bir kıt‘a i‘lâm nâtık olduğu üzere müdde‘iye-i mezbûre Şerife Zineti Hanım’ın hâl-i sıgārında vasîsi vâlidesi zevce-i hâzıra-i mezbûre Şerife Âişetü’s-sıddîka Hatun ve ümm-i mezbûre Şerife Fatıma Hatun ve sagīr-i mezbûr es-Seyyid Mehmed İzzet’in babası velîsi zevc-i mezbûr Halil Ağa Sadr-ı Rum-ı müşârün-ileyhin Cuma günü arz odasında huzûr-ı hazret-i Sadâret-penâhîde akd eyledikleri meclis-i şer‘-i hatîrde âlât-ı gedik-i merkūmu bi-aynihî benden da‘vâ ettiklerinde ben dahi inkârlarına mukārin minvâl-i muharrer üzere da‘vâ-yı def‘ eylediğimden gayrı isbât edeceğim müdde‘iyûn-ı asıl ve vasî ve velî-i mezbûrûnun ma‘lûmları ve ba‘de’l-isbât kendilere nesne vermeyeceğim mütebeyyin olup ve ber-vech-i âtî sulh sagīrân-ı mezbûrân haklarında enfa‘ ve evlâ olduğu bi’l-ihbâr mütehakkık olmağın bâ-tavassut-ı muslihîn tasaddî eyledikleri da‘vâ-yı mezkûrelerinden benimle nef‘an-li’s-sagīreyni’l-mezbûreyn beş bin guruş üzerine ba‘de’s-sulh ve’l-kabûl bedel-i sulh-ı mezkûr beş bin guruşu yedimden ba‘de’l-kabz husûs-ı mezkûra müte‘allika âmme-i da‘vâdan benim zimmetimi ancak bi’l-asâle ibrâ-i âmm-ı sahîh-i şer‘î ile ibrâ ve iskāt ettiklerinde ben dahi ibrâ-i mezkûrlarını kabûl etmiş idim deyü mazmûnları takrîr-i meşrûhuna mutâbık iki kıt‘a hüccet-i şer‘iye ibrâzıyla eylediği def‘ini ve mazmûn-ı hüccet-i mezkûreleri ve mazmûnu da‘vâ-yı sulhuna muvâfık bir kıt‘a i‘lâm ibrâzıyla eylediği sulh da‘vâsını dahi müdde‘iye-i mezbûre [125] Şerife Zineti Hanım inkâr etmekle mezbûr Mehmed Ağa def‘-i mezkûrunu her biri âlât-ı gedik-i merkūmu mahâllinde ta‘yîn ve işâret dahi edip lede’t-tezkiye adl ve makbûlü’ş-şehâde idikleri ihbâr olunan İstanbul’da Ayasofya-i Kebîr civârında İshakpaşa mahallesi İmâmı el-Hâc Hafız İbrahim Efendi b. el-Hâc Halil ve hâlâ sîmkeş esnâfının Kethudâsı es-Seyyid Ahmed Ağa b. Mehmed Emin nâm kimesneler şehâdetleriyle huzûr-ı hazret-i Fetvâ-penâhî’de müdde‘iye-i mezbûre Şerife Zineti Hanım muvâcehesinde vech-i vecîh-i şer‘î üzere isbât ettikden sonra ber-mantûk-ı i‘lâm sulh-ı mezkûru dahi müdde‘iye-i mezbûre ile vâlidesi hâzıra-i mezbûre Şerife Âişetü’s-sıddîka Hatun ikrâr dahi etmeğin mûcebince müdde‘iye-i mezbûre Şerife Zineti Hatun da‘vâ-yı mezkûresiyle mezbûr Mehmed Ağa’ya bî-vech-i şer‘î mu‘ârazadan men‘ olunduğu İstanbul Mahkemesi’nden huzûr-ı [âlîlerine i‘lâm olundu] Fî 21 Rebî‘ülâhir sene [12]58