İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 390 Hüküm no: 340 Orijinal metin no: [125-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vakıf tütüncü dükkânı hisselerinin satışı Tütüncü [Ma‘rûz] Âsitâne-i aliyye’de vâki‘ tütüncü esnâfından Yuvan v. Yorgi ve Mina v. Kiryako zimmîler meclis-i şer‘-i münîrde bâ‘isiyyü’l-i‘lâm nefsinden asıl ve şerîki el-Hâc Hafız Mustafa Râşid Efendi b. el-Hâc Mehmed tarafından husûs-ı âti’l-beyânda vekîl-i şer‘îsi duhân tüccârından Ömer Efendi b. İsmail muvâcehesinde her biri takrîr-i kelâm edip İstanbul’da Bahçekapısı hâricinde Eminönü nâm mahâlde sebzeciler içinde manav ve berber dükkânları beynlerinde vâki‘ Eshâm Muhâsebesi’nde bizimle gāib ani’l-meclis İsak v. Musayil zimmînin ismimize mukayyed üzerinde bir bâb odayı müştemil üç kepenk bir bâb tütüncü dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin sülüs hisse-i şâyi‘ası gāib-i mesfûr İsak zimmînin ve bir sülüsden sülüsân hisse-i şâyi‘ası dahi akd-i âti’z-zikrin sudûruna değin bizim bâ-sûret yedimizde mülk ve hakkımız olmağla biz ber-vech-i muharrer mâlik olduğumuz sülüsân hisse-i şâyi‘a-i âlât-ı gedik-i merkūmu tarafeynden bi’l-îcâb ve’l-kabûl bey‘-i kat‘î ve safka-i vâhide ve şerîkimiz gāib-i mersûmun izin ve icâzetiyle asıl ve vekîl ve müvekkil-i mezbûrân Ömer Efendi ve el-Hâc Mustafa Râşid Efendi’ye ale’l-iştirâki’s-seviyy yirmi bin beş yüz guruş semen-i medfû‘ ve makbûza bey‘ ve temlik ve vech-i lâyıkı üzere teslîm eylediğimizde onlar dahi ber-vech-i muharrer iştirâ ve temellük ve tesellüm ve kabz ü kabûl etmeğin fî-mâ ba‘d âlât-ı gedik-i merkūmun sülüsân hisse-i şâyi‘a-i mezkûresi mezbûrân Ömer Efendi ve el-Hâc Hafız Mustafa Râşid Efendi’nin seviyyen mülk-i müşterâları ve hakk-ı sırfları olup bizim aslâ ve kat‘a alâka ve medhalimiz kalmamağla meblağ-ı mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlümüzü hâvî ibrâ ve iskāt eyledik deyü ba‘de’l-ikrâr ve’t-tasdîk asıl ve vekîl-i mezbûr Ömer Efendi meclis-i şer‘de esnâf-ı merkūme Kethudâ vekîli İbrahim Efendi ve Yazıcısı Mehmed Emin Efendi ve Yiğitbaşısı el-Hâc Hasan Ağa ve sâir mazbûtü’l-esâmî lonca ihtiyârları hâzır oldukları hâlde bi’l-asâle ve bi’l-vekâle takrîr-i kelâm edip benimle şerîkim ve müvekkilim mezbûr el-Hâc Hafız Mustafa Râşid Efendi’nin ber-vech-i meşrûh şirâen mâlik olduğumuz sülüsân hisse-i şâyi‘a-i gedik-i mezbûrun kaleminde mersûmân Yuvan ve Yorgi ve Mina v. Kiryako üzerlerinde olan kayd-ı atiki ref‘ ve terkīn ve benimle müvekkilim mezbûrun ismimize tashîh-i kayd ile kaleminden müceddeden yedimize birer kıt‘a sûret i‘tâsı bi’l-asâle ve bi’l-vekâle niyâzımdır dedikde fi’l-vâki‘ kalem-i mezbûrdan mersûmân Yuvan v. Yorgi ve Mina v. Kiryako zimmîler isimlerine mukayyed sülüsân hisse-i şâyi‘a-i gedik-i mezkûra şirâen mâlikler olan mezbûrân Ömer Efendi ve şerîki el-Hâc Mustafa Râşid Efendi’nin isimlerine tashîhan yedlerine sûret i‘tâ olunması nizâmlarından idiği esnâf-ı hâzırûn-ı mezbûrûn ihbâr etmeleriyle bu sûretde mezbûrân Ömer Efendi b. İsmail ve el-Hâc Hafız Mustafa Reşid Efendi b. el-Hâc Mehmed’in ber-vech-i istid‘â isimlerine tasrîhan yedlerine başka başka sûret i‘tâsı muktezâ-yı şurût ve nizâm idiği İstanbul Mahkemesi’nden huzûr-ı [âlîlerine i‘lâm olundu] Fî 23 Ca sene [12]58