İstanbul Mahkemesi 172 Numaralı Sicil (H. 1257-1258 / M. 1841-1842) cilt: 96, sayfa: 391 Hüküm no: 341 Orijinal metin no: [125-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kasap Petro, İstirati ve Mitro’nun sahibi oldukları kasap gediğini başka bir dükkâna nakletmelerine izin verildiği Kasab [Ma‘rûz] Hudâvendigâr-ı esbak müstağrak-ı bihâr-ı rahmet-i Hak cedd-i emced-i hazret-i Hilâfet-penâhî mazhar-ı gufrân-ı İlâhî Sultan Abdülhamid Han -aleyhi eltâfü Rabbihi’l-Mennân- hazretlerinin evkāf-ı celîleleri müstegallâtından Yedikule hâricinde kâin gayrı ez selhhâne-i mîrî on aded ganem selhhânelerinin şerâit-i mu‘teberelerine ri‘âyet şartıyla altıncı selhhâneye merbût kasab dükkânlarından mahrûse-i Galata’ya muzâfe kasaba-i Kasımpaşa’da Kulaksız Ahmed Kapudan mahallesinde kâin <> pesmânde ve mu‘attal olan bir bâb kasab dükkânı derûnunda mevcûde beyne’l-esnâf gedik ta‘bîr olunur vakıf âlât-ı lâzıme-i ma‘lûmenin nısf hissesine bâ-temessük-i mütevellî bi’l-icâreteyn mutasarrıf olan kasab tâifesinden Petro v. Dimitri ve sülüs hissesine <> kezâlik bâ-temessük-i mütevellî bi’l-icâreteyn mutasarrıf olan tâife-i mezkûreden İstirati v. Petro ve südüs hissesine kezâlik bâ-temessük-i mütevellî mutasarrıf olan yine tâife-i merkūmeden Petro v. Lazari zimmîler her biri meclis-i şer‘-i hatîrde hâlâ Yedikule ve Eğrikapı Kasablar müdîri es-Seyyid Mehmed Ali Bey ve ustalardan el-Hâc İbrahim Ağa ve el-Hâc Hasan Ağa ve es-Seyyid Mehmed Efendi ve el-Hâc Hüseyin Ağa ve Mehmed Necib Efendi ve el-Hâc Mehmed Haşim Efendi ve Mehmed Ağa ve sâir mazbûtü’l-esâmî kimesneler hâzır oldukları hâlde takrîr-i kelâm edip dükkân-ı mezkûr müddet-i vâfireden beri pesmânde ve mu‘attal olup ve yine kasaba-i mezkûrede Hacı Ahmed mahallesinde Papasköprüsü nâm mahâlde aslâ kasab dükkânı olmayıp ahâlisi muzâyakaya dûçâr olduklarından ber-vech-i muharrer tasarrufumuzda olan gedik-i merkūmu bâ-temessük-i mütevellî bi’l-icâreteyn ale’l-iştirâki’s-seviyy mutasarrıf olduğumuz bâ-irâde-i seniyye Hazîne-i Evkāf-ı Hümâyûn tarafından idâre olunan evkāfdan merhûm el-Hâc Davud Ağa Vakfı müsakkafâtından mahâll-i mezkûrda kunduracı gediğinden ârî bir bâb vakıf dükkâna nakl ve derûnuna vaz‘ olunması ve atik temessük-i mezkûrlar battal hıfz birle mahâll-i evvelin kaydı ref‘ ve terkīn ve mahâll-i sânî-i mezkûrda mu‘teber ve müstakar olarak defter-i vakf-ı şerîfe kayd ve şurûtu derciyle taraf-ı vakfdan müceddeden yedimize birer kıt‘a temessük i‘tâsı murâdımızdır deyü istid‘â ettiklerinde fi’l-vâki‘ bu makūle kasab gediklerinin kasab dükkânı olmayıp da ahâlisi muzâyakaya dûçâr olan mahallerde âhar gedikden ârî dükkân-ı âharlara nakl ve bâ-i‘lâm minvâl-i muharrer üzere taraf-ı vakfdan temessük i‘tâsı hâmiş-i arzuhâlde mastûr derkenâr nâtık olduğu üzere bâ-fermân-ı âlî nizâm-yâfte olan şurût-ı mer‘iyelerden <> idiğini müdîr ve esnâf-ı hâzırûn-ı mezbûrûn ve ahâli-i mahalle-i mezkûr bir bâb kasab dükkânına muhtâc olduklarını ahâli-i mahalle-i mezkûreden Mumcu İstati v. Petro ve Dülger Aleksi v. Yako v. Kiryako ve mersûm Fermeneci Nikoli v. Yorgi ve Tütüncü Yorgi v. Mihal <> Yoğurtçu Vasil v. Todori ve Dellâl Yani v. Vasil ve Tabib Dimitraki v. Yanaki ve Boyacı Todori v. Tanaş ve mersûm Kunduracı Nikoli v. Yani ve Dülger Yasef v. Yani ve Yoğurdcu Foti v. Yani ve Malafatçı Aleksi v. Kostandi ve Fermeneci Yorgi v. Dimitri ve sâir mazbûtü’l-esâmî zimmîler ihbâr ve ahâli-i mahâll-i mersûmûn mahâll-i merkūmda kasab dükkânı olmasını işbu arzuhâlleriyle istirhâm etmeleriyle bu sûretde ber-vech-i istid‘â atik gedik-i mezkûrlar battal hıfz birle gedik-i mezkûr [126] mahâll-i evvelinin kaydı terkīn ve mahâll-i sânî-i mezkûrda mu‘teber ve müstekarr olarak defter-i vakf-ı şerîfe kayd ve şurûtu derciyle taraf-ı vakfdan müceddeden mersûmûn Petro ve İstirati ve Mitro zimmîler yedlerine birer kıt‘a temessük i‘tâsı re’y-i âlîlerine menût idiği İstanbul Mahkemesi’nden huzûr-ı [âlîlerine i‘lâm olundu] Fî 23 Ca sene [12]58